ଭୁବନେଶ୍ୱର,୨୩/୧୨:ଆଜି ୨୯ତମ ସିନିୟର ମହିଳା ଜାତୀୟ ଫୁଟବଲ ଚାମ୍ପିଅନସିପ୍ ରାଜମାତା ଜିଜାବାଇ ଟ୍ରଫିରେ ଓଡ଼ିଶା ଓ ଶକ୍ତିଶାଳୀ ମଣିପୁର ମଧ୍ୟରେ ଟାଇଟଲ ଲଢ଼େଇ ହେବ । ମଣିପୁର ସର୍ବାଧିକ ୨୨ ଥର ଏବଂ ଓଡ଼ିଶା କେବଳ ଥରେ ମାତ୍ର ଚାମ୍ପିଅନ ହୋଇଛି । ଦୀର୍ଘ ବର୍ଷ ପରେ ଓଡ଼ିଶା ପୁଣି ଟାଇଟଲ ସ୍ୱପ୍ନ ପୂରା କରିବାକୁ ଲକ୍ଷ୍ୟ ରଖିଛି ।
ଶେଷ ଥର ଓଡ଼ିଶା ୨୦୧୮ରେ ଫାଇନାଲ ଖେଳିଥିଲା । କଟକରେ ଆୟୋଜିତ ଏହି ସଂସ୍କରଣରେ ମଣିପୁର ଓ ଓଡ଼ିଶା ଫାଇନାଲ ଖେଳିଥିଲେ । ମଣିପୁର ୨-୧ରେ ବିଜୟୀ ହୋଇଥିଲା । ପୁଣି ଚଳିତ ସଂସ୍କରଣରେ ଦୁଇ ଦଳ ଫାଇନାଲ ଖେଳିବେ । ତେବେ ପ୍ୟାରୀ ଖା ଖାଙ୍କ ନେତୃତ୍ୱରେ ଓଡ଼ିଶା ପୂର୍ବ ପରାଜୟର ପ୍ରତିଶୋଧ ନେବା ଲକ୍ଷ୍ୟରେ ରହିଛି । ପୂର୍ବରୁ ଓଡ଼ିଶା ମାତ୍ର ଥରୁଟିଏ ଚାମ୍ପିଅନ ଏବଂ ୫ ଥର ରନର୍ସଅପ୍ ହୋଇଛି । ୨୦୧୦ ଫାଇନାଲରେ ଦଳ ୫-୦ରେ ପଶ୍ଚିମବଙ୍ଗକୁ ହରାଇଥିଲା । ଏହାକୁ ମିଶାଇ ଦଳ ସପ୍ତମ ଥର ଫାଇନାଲରେ ପ୍ରବେଶ କରିଛି । ମଣିପୁର ସର୍ବାଧିକ ୨୨ ଥର ଚାମ୍ପିଅନ ଏବଂ ୪ ଥର ରନର୍ସଅପ୍ ହୋଇଛି ।
ଗତକାଲି ସେମି ଫାଇନାଲରେ ଓଡ଼ିଶା ୨-୦ ଗୋଲରେ ହରିଆନାକୁ ଏବଂ ମଣିପୁର ୩-୦ ଗୋଲରେ ପଶ୍ଚିମବଙ୍ଗକୁ ପରାଜିତ କରି ଫାଇନାଲରେ ପ୍ରବେଶ କରିଥିଲା ।
