ନୂଆଦିଲ୍ଲୀ,୩୦/୧୨; ବାଂଲାଦେଶର ପୂର୍ବତନ ତଥା ପ୍ରଥମ ମହିଳା ପ୍ରଧାନମନ୍ତ୍ରୀ ଖାଲିଦା ଜିୟାଙ୍କର ଆଜି ପରଲୋକ ହୋଇଛି । ଏହି ଖବର ପ୍ରକାଶ ପାଇବା ପରେ ଅଶାନ୍ତ ଢାକାରେ ଯେମିତି ଏକ ଅଦୃଶ୍ୟ ଶୂନ୍ୟତା ଦେଖିବାକୁ ମିଳିଛି । ଜଣେ ପ୍ରଭାବଶାଳୀ ନାରୀ ନେତ୍ରୀଙ୍କୁ ହରାଇ ସ୍ତବ୍ଧ ହୋଇଛି ବାଂଲାଦେଶୀ ନ୍ୟାସନାଲିଷ୍ଟ ପାର୍ଟି । ଖଲିଦାଙ୍କ ବିୟୋଗରେ ତାଙ୍କର ଚିର ପ୍ରତିନ୍ଦ୍ୱନ୍ଦୀ ତଥା ପୂର୍ବ ପ୍ରଧାନମନ୍ତ୍ରୀ ଖେଶ୍ ହସିନା ଗଭୀର ଶୋକ ପ୍ରକାଶ କରିଛନ୍ତି । ଜିୟାଙ୍କ ଦେହାନ୍ତ ଗଭୀର କ୍ଷତି ବୋଲି କହିଛନ୍ତି ହସିନା ।

​​​​​​​ଖାଲିଦାଙ୍କ ବିୟୋଗରେ ଶୋକ ପ୍ରକାଶ କରି ଶେଖ୍ ହସିନା କହିଛନ୍ତି, ''ବିପିଏନ ଅଧ୍ୟକ୍ଷା ଏବଂ ବାଂଲାଦେଶର ପୂର୍ବତନ ପ୍ରଧାନମନ୍ତ୍ରୀ ଖାଲିଦା ଜିୟାଙ୍କ ଦେହାନ୍ତରେ ମୁଁ ଦୁଃଖିତ । ଦେଶର ରାଜନୈତିକ ଜୀବନ ପାଇଁ ଏହା ବଡ଼ କ୍ଷତି । ଦେଶର ପ୍ରଥମ ମହିଳା ପ୍ରଧାନମନ୍ତ୍ରୀ ଭାବେ ଗଣତନ୍ତ୍ର ପ୍ରତିଷ୍ଠା ସଂଗ୍ରାମରେ ତାଙ୍କର ଭୂମିକା ପାଇଁ ରାଷ୍ଟ୍ର ପ୍ରତି ତାଙ୍କର ଗୁରୁତ୍ୱପୂର୍ଣ୍ଣ ଅବଦାନକୁ ସବୁବେଳେ ମନେ ରଖାଯିବ ।''

ହସିନାଙ୍କ ସହ ଶତ୍ରୁତା- ଖାଲିଦା ଜିୟା ଏବଂ ଆୱାମୀ ଲିଗ୍ ନେତା ଶେଖ୍ ହସିନାଙ୍କ ମଧ୍ୟରେ ଦଶନ୍ଧି ଧରି ଚାଲିଥିବା ରାଜନୈତିକ ପ୍ରତିଦ୍ୱନ୍ଦ୍ୱିତା ବାଂଲାଦେଶର ରାଜନୀତିକୁ ଦୁଇ ଭାଗ କରିଥିଲା । ଦୁଇ ନେତାଙ୍କ ମଧ୍ୟରେ ସଂଘର୍ଷ କେବଳ କ୍ଷମତା ପରିବର୍ତ୍ତନ କରିନଥିଲା ବରଂ ଗଣତନ୍ତ୍ର, ପ୍ରତିଷ୍ଠାନ ଏବଂ ରାସ୍ତା ରାଜନୀତିକୁ ମଧ୍ୟ ପ୍ରଭାବିତ କରିଥିଲା । ଦୁଇ ମହିଳା ନେତ୍ରୀଙ୍କ ମଧ୍ୟରେ ଆଜୀବନ ଶତ୍ରୁତା ରହିଥିଲା । ଗୋଟିଏ ପଟେ ଖାଲିଦା ଆଉ ଗୋଟେ ପଟେ ହସିନା । ଦୁହିଁଙ୍କ ପିତା ଓ ପତି ଥିଲେ ସ୍ଵାଧୀନତା ସଂଗ୍ରାମୀ। ହେଲେ ଦୁହିଁଙ୍କ ବିଚାରାଧାରା ଥିଲା ଭିନ୍ନ। ଖାଲିଦା ଥିଲେ ଭାରତର କଟ୍ଟର ବିରୋଧୀ। ହସିନାଙ୍କ ସମୟରେ ବଦଳିଥିଲା ଭାରତ ସହ ବାଂଲାଦେଶର ସମ୍ପର୍କ ।

ଦୀର୍ଘଦିନର ଅସୁସ୍ଥତା ଯୋଗୁଁ ଆଜି ଶେଷ ନିଃଶ୍ଵାସ ତ୍ୟାଗ କରିଛନ୍ତି ଖାଲିଦା ଜିୟା । ମୃତ୍ୟୁ ବେଳକୁ ତାଙ୍କୁ ୮୦ ବର୍ଷ ବୟସ ହୋଇଥିଲା । ୧୯୯୧ରେ ପ୍ରଥମ ଥର ଦେଶର ପ୍ରଧାନମନ୍ତ୍ରୀ ହୋଇଥିଲେ । ଏହାପରେ ସେ ମୋଟ ଦୁଇ ଥର ବାଂଲାଦେଶ ସରକାରର ନେତୃତ୍ୱ ନେଇଥିଲେ । ଗୃହିଣୀରୁ ରାଜନୀତି ମୈଦାନକୁ ଏଣ୍ଟ୍ରୀ କରିଥିଲେ ଖାଲିଦା । ଦଶନ୍ଧି ଧରି ରାଜନୈତିକରେ ପ୍ରଭାବ ବିସ୍ତାର କରିଥିଲେ ଖାଲିଦା । ତାଙ୍କ ନିଧନରେ ୨୦୨୫ରେ ବାଂଲାଦେଶୀ ରାଜନୀତିରେ ଅନ୍ତ ହୋଇଛି ଖାଲିଦା ଅଧ୍ୟାୟ ।