ନୂଆଦିଲ୍ଲୀ,୨୨/୦୫: ପତ୍ନୀ ଆୟେଶା ମୁଖାର୍ଜୀଙ୍କ ସହ ବିଚ୍ଛେଦ ହେବା ପରେ ଭାରତୀୟ କ୍ରିକେଟ୍ ଦଳର ପୂର୍ବତନ ଓପନର ଶିଖର ଧାୱନ ଏବେ ନିଃସଙ୍ଗ ଜୀବନ ବିତାଉଛନ୍ତି । ପୁଅ ଜୋରାଭର ବି ପାଖରେ ନାହିଁ । ଏହାରି ଭିତରେ ଧାୱନ ଏକ ବିଳାସପୂର୍ଣ୍ଣ ଘର କିଣିଛନ୍ତି । ଯାହାର ମୂଲ୍ୟ ୬୯ କୋଟି ବୋଲି ଜାଣିବାକୁ ମିଳିଛି ।
ସୂଚନା ଅନୁସାରେ, ଧାୱନ ଗୁରୁଗାଓଁରେ ୬୦୪୦ ସ୍କୟାର ଫୁଟର ଏକ ଆପାର୍ଟମେଣ୍ଟ କିଣିଛନ୍ତି । ଘର କିଣା ଖର୍ଚ୍ଚ ୬୫.୬୧ କୋଟି ଏବଂ କାଗଜପତ୍ର ବାବଦକୁ ୩.୨୮ କୋଟି ଟଙ୍କା ଦେବାକୁ ପଡ଼ିଛି । ଗତ ବର୍ଷ ଅକ୍ଟୋବର ମାସରେ ଧାୱନ କ୍ରିକେଟର ସବୁ ଫର୍ମାଟରୁ ଅବସର ନେଇଥିଲେ । ୨୦୧୦ରେ ଦିନିକିଆରେ ପଦାର୍ପଣ କରିଥିଲେ । ୨୦୨୨ରେ ବାଂଲାଦେଶ ବିପକ୍ଷରେ ଶେଷ ମ୍ୟାଚ୍ ଖେଳିଥିଲେ । ଆୟେଶାଙ୍କ ସହ ବିଚ୍ଛେଦ ହେବା ପରେ ଧାୱନ ଏବେ ନୂଆ ବାନ୍ଧବୀ ପାଇଛନ୍ତି ବୋଲି କୁହାଯାଉଛି । ତାଙ୍କ ନାମ ସୋଫିଆ ସାଇନ । ଦୁହିଁଙ୍କ ଫଟୋ ବି ସୋସିଆଲ ମିଡିଆରେ ଭାଇରାଲ ହେଉଛି । କିନ୍ତୁ ଧାୱନ ଏ ବିଷୟରେ କିଛି କହି ନାହାନ୍ତି ।
