ପୁରୀ,୦୭/୦୩: ରବିବାର ବଡ଼ଦେଉଳରେ ଫଗୁ ଦଶମୀ । ସେହି ଦିନଠାରୁ ଆରମ୍ଭ ମହାପ୍ରଭୁଙ୍କ ଦୋଳ ମହୋତ୍ସବ । ଠାକୁରଙ୍କ ଚାଚେରୀ ବେଶ ଓ ଚାଚେରୀ ଭୋଗ ଅନୁଷ୍ଠିତ ହେବ । ଦାରୁଦିଅଁମାନେ ଲାଲ୍ ବସ୍ତ୍ର ପରିଧାନ କରି ବହୁମୂଲ୍ୟ ଅଳଙ୍କାରରେ ଭୁଷିତ ହେବେ । ଏଥିସହ ଠାକୁର ଠାକୁରାଣୀଙ୍କୁ ଝିମିରି ଫଗୁ ଲାଗି କରାଯିବ । ଏହି ଅବସରରେ ଜଗନ୍ନାଥବଲ୍ଲଭ ମଠରେ ବିଜେ ହେବେ ଦୋଳଗୋବିନ୍ଦ, ଶ୍ରୀଦେବୀ ଓ ଭୂଦେବୀ । ସେଠାରେ ଦୋଳତ୍ସୋବ ନୀତି ପାଳନ ହେବ । ଅବିର ରଙ୍ଗରେ ଏକାକାର ହେବେ ଭଗବାନ ଓ ଭକ୍ତ ।
ଫଗୁଦଶମୀରେ ବିମାନବଡ଼ୁ ସେବକମାନେ ସୁସଜ୍ଜିତ ବିମାନରେ ଠାକୁରଙ୍କୁ ନେଇ ବଡ଼ଦାଣ୍ଡସ୍ଥିତ ଜଗନ୍ନାଥ ବଲ୍ଲଭ ମଠରେ ବିଜେ ହେବେ । ଦଶମୀ ତିଥିଠାରୁ ତ୍ରୟୋଦଶୀ ପର୍ଯ୍ୟନ୍ତ ଶ୍ରୀମନ୍ଦିରରେ ମହାପ୍ରଭୁଙ୍କର ଚାଚେରୀ ବେଶ ଓ ଭୋଗ, ଫଗୁ ଅଞ୍ଜଳି ପ୍ରଦାନ ଓ ଜଗନ୍ନାଥ ବଲ୍ଲଭ ମଠକୁ ଯାତ୍ରା ବିଧି ଅନୁଷ୍ଠିତ ହୋଇଥାଏ । ସିନ୍ଦୁର, ମୁଥା, ଅଙ୍କରାନ୍ତି, ଶତାବରୀ, ପାଳୁଅର ସମ୍ମିଶ୍ରଣରେ ଠାକୁରଙ୍କ ଝିମିରି ଫଗୁ ପ୍ରସ୍ତୁତ ହୋଇଥାଏ। ନୀଳାଦ୍ରି ମହୋଦୟରେ ଏହି ପର୍ବକୁ ‘ବସନ୍ତ ଗୁଣ୍ଡିଚା’ର ଆଖ୍ୟା ଦିଆଯାଇଛି ।
