ପୁରୀ,୧୮/୦୮: ଯେତେ ଯାହା କଲେ ମଧ୍ୟ ବଡ଼ଦେଉଳରେ ମହାପ୍ରଭୁଙ୍କ ନୀତି ସୁଧାରରେ ସ୍ଥିରତା ଆସୁନାହିଁ । ନନ୍ଦୋତ୍ସବରେ ଅନିଦ୍ରା ରହିଗଲେ ମହାପ୍ରଭୁ । ଶନିବାର ଶ୍ରୀକୃଷ୍ଣ ଲୀଳା ଅବସରରେ ଶ୍ରୀମନ୍ଦିରରେ ନନ୍ଦୋତ୍ସବ ଓ ବିଜୁଳି କନ୍ୟା ନୀତି ଥିଲା । ଏସବୁ ନୀତି ଉଛୁର ହୋଇ ବିଳମ୍ବିତ ରାତି ୪ଟା ୪୦ମିନିଟ୍ରେ ଠାକୁରଙ୍କ ସନ୍ଧ୍ୟା ଆଳତି ସମ୍ପନ୍ନ ହୋଇଥିଲା । ପରଦିନ ଅର୍ଥାତ୍ ରବିବାର ସୂର୍ଯ୍ୟୋଦୟ ସମୟ ଉପନୀତ ହେବାରେ ଠାକୁରଙ୍କ ନୀତି ଆଗେଇ ପାରିଲା ନାହିଁ । ଏଣୁ ଶ୍ରୀବିଗ୍ରହଙ୍କ ପହୁଡ଼ ନୀତି ସମ୍ଭବ ହୋଇ ନଥିଲା । ଦୁଇ ନିର୍ଦ୍ଦିଷ୍ଟ ବର୍ଗର ସେବାୟତଙ୍କ ଭିତରେ ଦ୍ୱନ୍ଦ ଓ ନୀତି ପାଳନରେ ସମନ୍ୱୟରେ ଅଭାବ ହେତୁ ଠାକୁରଙ୍କ ନୀତିରେ ବିଳମ୍ବ ହୋଇଥିବା ଅଭିଯୋଗ ଉଠିଥିଲା ।
ଠାକୁରେ ଦୋଳିରେ ବିଜେ ହୋଇଥିବା ସ୍ଥଳେ ଉଭୟ ବର୍ଗର ସେବକଙ୍କ ଭିତରେ ନିଜ ନିଜ ଅଧିକାରକୁ ନେଇ ମତ ବିଭେଦ ହେବାରେ ଏହାର ପ୍ରଭାବ ଠାକୁରଙ୍କ ନୀତି ଉପରେ ପଡ଼ିଥିଲା । ରାତି ୧୧ଟା ୪୦ ମିନିଟ୍ରେ ଦୁର୍ଗା ଦେବୀଙ୍କ ଜନ୍ମ ନୀତି ସମ୍ପନ୍ନ ହୋଇଥିଲା । ୫ ମିନିଟ ମଧ୍ୟରେ ଅନୁଷ୍ଠିତ ହୋଇଥିଲା ବିଜୁଳି କନ୍ୟା ପ୍ରସ୍ତାବ । ମଦନମୋହନ, ରାମକୃଷ୍ଣ ମାଜଣାକୁ ବିଜେ ୧୨ଟା୫୫ ମିନିଟ୍ରେ, ମାଜଣା ବେଶ ଶେଷ ୧ଟା୫୦ମିନିଟ୍ରେ ବଢି ଠାକୁରେ ଲକ୍ଷ୍ମୀମନ୍ଦିରକୁ ବିଜେ କରିଥିଲେ ୨ଟା୩୫ମିନିଟ୍ରେ । ନନ୍ଦ ରାଜା ୨ଟା ୪୫ମିନିଟରେ ପହଞ୍ଚିଥିଲେ । ୩ଟା୦୫ମିନିଟ୍ରେ ସରିଥିଲା ନନ୍ଦୋତ୍ସବ ନୀତି । ଅନ୍ୟାନ୍ୟ ନୀତି ବଢ଼ି ମଦନମୋହନ ଓ ରାମକୃଷ୍ଣ ସାଢ଼େ ୩ଟାରେ ଦକ୍ଷିଣ ଘରକୁ ବିଜେ ହୋଇଥିଲେ । ଏହାପରେ ଠାକୁରଙ୍କ ବେଶ ହୋଇ ସନ୍ଧ୍ୟା ଆଳତିରେ ହିଁ ଶନିବାର ନୀତି ସ୍ଥଗିତ ହେଲା । ଜନ୍ମାଷ୍ଟମୀ ଭଳି ନୀତି ବହୁଳ ଦିନରେ ଠାକୁରଙ୍କ ପହୁଡ଼ ନୀତି ସମ୍ପନ୍ନ ହୋଇଥିଲା । ଠିକ୍ ପରଦିନ ପୁଣି ନୀତି ପାଳନରେ ସମନ୍ୱୟର ଅଭାବ ପରିଲକ୍ଷିତ ହେବାରେ ବିଭିନ୍ନ ମହଲରେ ଚର୍ଚ୍ଚା ଆରମ୍ଭ ହେଲା । ଏନେଇ ଶ୍ରୀମନ୍ଦିର ନୀତି ପ୍ରଶାସକଙ୍କୁ ଯୋଗାଯୋଗ କରାଯାଇଥିଲେ ସୁଦ୍ଧା ପ୍ରତିକ୍ରିୟା ମିଳିନାହିଁ ।
ସୋମବାର ମହାପ୍ରଭୁଙ୍କ କୋଳି ବିକା ନୀତି ସହ ବନ ଭୋଜି ବେଶ ଅନୁଷ୍ଠିତ ହେବ । ଏଥିସହ ଉକ୍ତ ଦିନରେ ଶ୍ରୀକୃଷ୍ଣ ଲୀଳାର ବକାସୁର ବଧ ଓ ଅର୍ଘାସୁର ବଧ ପ୍ରସ୍ତାବ ଆଗତ ହେବ । ଶ୍ରୀମନ୍ଦିରରେ ଅନୁଷ୍ଠିତ ଏହି ଦେବବିଧିରେ ପୁରୁଣା ସାହି ବାସିନ୍ଦାମାନେ ବିଭିନ୍ନ ପୌରାଣିକ ଚରିତ୍ରରେ ଅଭିନୟ କରି ଠାକୁରଙ୍କ ପରମ୍ପରା ପାଳନ କରିଥାନ୍ତି । ଠାକୁରଙ୍କ ଏହିସବୁ ନୀତି ଦେଖିବାକୁ ଶ୍ରଦ୍ଧାଳୁଙ୍କ ଭିଡ଼ ଜମେ । ପରଦିନ ଏକାଦଶୀ ତିଥି ମଙ୍ଗଳବାର ଠାକୁରଙ୍କ କାଳୀୟଦଳନ ନୀତି ଓ ଧେନୁକାସୁର ବଧ ପ୍ରସ୍ତାବ ଆଗତ ହେବ ।
