ନୂଆଦିଲ୍ଲୀ,୧୩/୦୧: ଭାରତ-ସିଙ୍ଗାପୁର ଦ୍ୱିପାକ୍ଷିକ ସମ୍ପର୍କ ୬୦ ବର୍ଷ ପୂରଣ କରିଛି । ଏହି ଉପଲକ୍ଷେ ସିଙ୍ଗାପୁର ରାଷ୍ଟ୍ରପତି ଥର୍ମାନ ସାନମୁଗରତ୍ନମ ୧୫ରୁ ୧୮ ଯାଏ ଭାରତ ଗସ୍ତ କରିବାର କାର୍ଯ୍ୟକ୍ରମ ରହିଛି । ଏହି ଗସ୍ତ ସମୟରେ ଓଡ଼ିଶା ଉପରେ ସିଙ୍ଗାପୁର ରାଷ୍ଟ୍ରପତିଙ୍କ ଫୋକସ ରହିବ । ୧୭ ଏବଂ ୧୮ରେ ସାନମୁଗରତ୍ନମ ଓଡ଼ିଶା ଗସ୍ତରେ ଆସିବେ । ଶ୍ରୀ ସାନମୁଗରତ୍ନମଙ୍କ ଗସ୍ତ ଓଡ଼ିଶା ଲାଗି ନିବେଶର ସୁଯୋଗ ଆଣିବ ବୋଲି ଆଶା କରାଯାଉଛି ।
ଶ୍ରୀ ସାନମୁଗରତ୍ନମଙ୍କ ସହ ସରକାରୀ ପ୍ରତିନିଧି ଏବଂ ବାଣିଜ୍ୟିକ ପ୍ରତିନିଧି ଦଳ ଆସିବାର କାର୍ଯ୍ୟକ୍ରମ ରହିଛି । ଓଡ଼ିଶାରେ ପ୍ରକଳ୍ପ ସ୍ଥାପନା ଏବଂ ସହଭାଗିତା ଉପରେ ବିଭିନ୍ନ କାର୍ଯ୍ୟକ୍ରମ ଗ୍ରହଣ କରାଯିବ ସୂଚନା ମିଳିଛି । ଏବେ ସିଙ୍ଗାପୁର ଓଡ଼ିଶା ସହ ସ୍କିଲିଂ ସହ ଅନ୍ୟ କିଛି କ୍ଷେତ୍ରରେ ମିଳିତ ହୋଇ କାମ କରୁଛି । ରାଜ୍ୟରେ ରହଣି ସମୟରେ ସେ ଭାରତ ବାୟୋଟେକ ଟିକା ଉତ୍ପାଦନ କେନ୍ଦ୍ର ଗସ୍ତ କରିବେ ।
ସେହିଭଳି ସିଙ୍ଗାପୁରର ମିଳିତ ସହଭାଗିତାରେ ଭୁବନେଶ୍ୱରରେ ସ୍ଥାପିତ ଇନଷ୍ଟିଚ୍ୟୁଟ ଅଫ୍ ଟେକ୍ନିକାଲ ଏଜୁକେସନ ଆଣ୍ଡ ସର୍ଭିସେସ(ଆଇଟିଇଇଏସ୍) ପରିଦର୍ଶନ କରିବାର କାର୍ଯ୍ୟକ୍ରମ ରହିଛି । ସିଙ୍ଗାପୁର ଗୁଜରାଟ, ତାମିଲନାଡୁ, ମହାରାଷ୍ଟ୍ର ଏବଂ କର୍ଣ୍ଣାଟକ ଭଳି ରାଜ୍ୟ ଗୁଡିକ ସହ ବିଶେଷ କରି ବିଭିନ୍ନ କ୍ଷେତ୍ରରେ କାମ କରୁଛି । ଏବେ ସିଙ୍ଗାପୁର ଓଡିଶା ଓ ଆସାମ ଉପରେ ଫୋକସ କରୁଛି ବୋଲି ପ୍ରକ୍ରିୟା ସହ ଜଡିତ ଜଣେ ଅଧିକାରୀ କହିଛନ୍ତି । ଓଡ଼ିଶା ଗସ୍ତ ସମୟରେ ୨ଟି ଏମ୍ଓୟୁ ହେବାର ବିଶେଷ ସମ୍ଭାବନା ରହିଛି ।
ସିଙ୍ଗାପୁର ଭାରତର ଏକ ପ୍ରମୁଖ ବାଣିଜ୍ୟିକ ସହଯୋଗୀ ହୋଇଥିବା ବେଳେ ଏହି ଧାରାକୁ ତ୍ୱରାନ୍ୱିତ କରିବା ଲାଗି ଏବେ କାର୍ଯ୍ୟପନ୍ଥା ଜାରି ରଖିଛି । ସେମିକଣ୍ଡକ୍ଟର ଡିଭାଇସ ଏବଂ ଇଣ୍ଟିଗ୍ରେଟେଡ ସର୍କିଟ, ଇଣ୍ଡଷ୍ଟ୍ରିଆଲ ଅଟୋମେଶନ, ସେମିକଣ୍ଡକ୍ଟର ପ୍ରୋସେସ, ଡିଜାଇନ, ଇଞ୍ଜିନିୟରିଂ ଭଳି ଅନ୍ୟ କିଛି କ୍ଷେତ୍ର ଉପରେ ଏବେ ଫୋକସ କରିଛି ସିଙ୍ଗାପୁର । ଏହା ସହ ବିମାନ ଚଳାଚଳକୁ ଆହୁରି ଦୃଢ଼ କରିବା ଉପରେ ମଧ୍ୟ ଆଲୋଚନା ହେବ ।
ସେମିକଣ୍ଡକ୍ଟର ଲାଗି ଏକ ତାଲିମ କେନ୍ଦ୍ର ସ୍ଥାପନା ଲାଗି ସିଙ୍ଗାପୁର ଏବେ ଅଗ୍ରସର ହେଉଛି । ସେହିଭଳି ଲିଥିୟମ ଆୟନ ବ୍ୟାଟେରୀ ଭଳି କ୍ରିଟିକାଲ ଟେକ୍ନୋଲୋଜି ଏବଂ କ୍ରିଟିକାଲ ମିନେରାଲ କ୍ଷେତ୍ରରେ ମଧ୍ୟ ମିଳିତ ହୋଇ ଘରୋଇ ବଜାର ସହ କାମ ହେବ ବୋଲି କହିଛନ୍ତି ଅଧିକାରୀ ।
୧୫ ଏବଂ ୧୬ରେ ଦିଲ୍ଲୀରେ ରହଣି ସମୟରେ ସାନମୁଗରତ୍ନମଙ୍କୁ ସମ୍ମାନଜନକ ତରୁଣ ଦାସ ସିଟିଜେନ ଆୱାର୍ଡ ପ୍ରଦାନ କରାଯିବ । ସିଆଇଆଇର ପୂର୍ବତନ ମହାନିର୍ଦ୍ଦେଶକ ଶ୍ରୀ ଦାସଙ୍କ ନାମରେ ଏହି ଆୱାର୍ଡ ପ୍ରଦାନ କରାଯାଉଛି । ଭାରତ ସିଙ୍ଗାପୁର ଦ୍ୱିପାକ୍ଷୀକ ସମ୍ପର୍କ ଦୃଢ଼ୀକରଣ କ୍ଷେତ୍ରରେ ଶ୍ରୀ ସାନମୁଗରତ୍ନମଙ୍କ ଉଲ୍ଲେଖନୀୟ ଯୋଗଦାନ ଲାଗି ଏଭଳି ପୁରସ୍କାର ପ୍ରଦାନ କରାଯାଉଛି ।
ସେହିଭଳି ସେ ଭାରତରେ ବସବାସ କରୁଥିବା ସିଙ୍ଗାପୁର ପ୍ରବାସୀଙ୍କୁ ସାକ୍ଷାତ କରିବେ । ରାଷ୍ଟ୍ରପତି ଦ୍ରୌପଦୀ ମୁର୍ମୁ, ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସଡକ ପରିବହନ ମନ୍ତ୍ରୀ ନୀତିନ ଗଡକରି, ବାଣିଜ୍ୟମନ୍ତ୍ରୀ ପୀୟୂଷ ଗୋୟଲ, ଅର୍ଥମନ୍ତ୍ରୀ ନିର୍ମଳା ସୀତାରମଣଙ୍କ ସହ ବୈଠକ କରିବେ ।
ରାଷ୍ଟ୍ରପତି ଭବନରେ ଏକ ରାତ୍ରଭୋଜନ କାର୍ଯ୍ୟକ୍ରମ ରଖାଯାଇଛି । ଏହା ସହ ରାଷ୍ଟ୍ରପତି ଦ୍ରୌପଦୀ ମୁର୍ମୁ ମଧ୍ୟ ଚଳିତ ବର୍ଷ ସିଙ୍ଗାପୁର ଗସ୍ତ କରିବାର କାର୍ଯ୍ୟକ୍ରମ ରହିଛି । ଏବେ ମ୍ୟାଁମାରରେ ସଙ୍କଟ ଜାରି ରହିଛି । ଗତବର୍ଷ ସିଙ୍ଗାପୁର ଏହି ଦେଶକୁ ଅସ୍ତ୍ରଶସ୍ତ୍ର ବିକ୍ରି ବନ୍ଦ କରି ଦେଇଛି । ଭାରତ ଆସିଆନ ସମ୍ପର୍କ କ୍ଷେତ୍ରରେ ସିଙ୍ଗାପୁର ଏକ ପ୍ରମୁଖ ସ୍ଥାନରେ ରହିଛି ।
ରାଜ୍ୟରେ ନିର୍ମାଣ ହେବ କୋଷ୍ଟାଲ୍ ହାଇୱେ,୧୬୩ କିଲୋମିଟର ପାଇଁ ୭୦୪୦ କୋଟି ଆକଳନ, ଟେଣ୍ଡର ଆହ୍ୱାନ କଲା NHAI
