ନୂଆଦିଲ୍ଲୀ: ପ୍ରସିଦ୍ଧ ଆମେରିକୀୟ ଗାୟକ ଏକନ କିଛି ଦିନ ପରେ ତାଙ୍କର ୨୯ତମ ବିବାହ ବାର୍ଷିକୀ ପାଳନ କରିବାକୁ ଯାଉଥିଲେ । ଏହା ପୂର୍ବରୁ ତାଙ୍କ ପତ୍ନୀ ଟୋମେକା ଥିଆମ୍ ଛାଡପତ୍ର ପାଇଁ ଆବେଦନ କରିଛନ୍ତି । People.com ର ଏକ ରିପୋର୍ଟ ଅନୁଯାୟୀ, ଥିୟାମ୍ ଗାୟକ ଏକନଙ୍କ ଠାରୁ ଛାଡପତ୍ର ପାଇଁ ଆବେଦନ କରିଛନ୍ତି । ସେମାନଙ୍କ ମଧ୍ୟରେ ଅମିମାଂସିତ ପାର୍ଥକ୍ୟ ରହିଛି ବୋଲି ସେ କହିଛନ୍ତି । ତାଙ୍କର ବିଚ୍ଛେଦର ତାରିଖକୁ 'TBD' ଭାବରେ ଚିହ୍ନିତ କରିଛନ୍ତି ଥିଆମ । TBD- to be decided, ଅର୍ଥାତ ଛାଡ଼ପତ୍ର ଲାଗି ଥିୟାମ ଆବେଦନ କରିଥିବା ବେଳେ କେବେ ସେମାନେ ବିଧିବଦ୍ଧ ଭାବରେ ଅଲଗା ହେବେ ସେହି ତାରିଖ ଜଣାପଡ଼ିନାହି
ଦମ୍ପତିଙ୍କର ଏକ ୧୭ ବର୍ଷୀୟ ଝିଅ, ଜର୍ଣ୍ଣି ଅଛି । ଥିଆମ୍ ତାଙ୍କ ଝିଅ ଜର୍ଣ୍ଣିର ମିଳିତ ହେପାଜତ ପାଇଁ ଅନୁରୋଧ କରିଛନ୍ତି ଏବଂ ଝିଅକୁ ତାଙ୍କ ସହିତ ରହିବାକୁ ଅନୁମତି ଦେବାକୁ କୋର୍ଟଙ୍କୁ ଅନୁରୋଧ କରିଛନ୍ତି । କିନ୍ତୁ ଏକନ ଯେତେବେଳେ ଚାହିଁବେ ତାଙ୍କ ଝିଅକୁ ଭେଟିପାରିବେ । ସେ କୋର୍ଟଙ୍କୁ ଅନୁରୋଧ କରିଛନ୍ତି ଯେ, ତାଙ୍କୁ ତାଙ୍କ ଜୀବନଯାପନ ପାଇଁ ଆର୍ଥିକ ସହାୟତା ମିଳିବା ଉଚିତ । କିନ୍ତୁ ଏକନଙ୍କୁ କୌଣସି ପ୍ରକାରର ସହାୟତା ଦିଆଯିବା ଉଚିତ ନୁହେଁ ।
'ରାଇଟ୍ ନାଉ' ଫେମ୍ ଗାୟକ ଏକନ କେବଳ ଇଂରାଜୀ ସିନେମାରେ ଗୀତ ଗାଇ ନାହାନ୍ତି ବରଂ ସେ ହିନ୍ଦୀ ସିନେମାରେ ମଧ୍ୟ ଗାଇଛନ୍ତି । ଏକନ ୨୦୧୧ ମସିହାରେ ସାଇ-ଫାଇ ଚଳଚ୍ଚିତ୍ର 'ରା.ୱାନ୍'ର ‘ଛମକ ଛଲୋ’ ଏବଂ ‘କ୍ରିମିନାଲ୍’ ଗୀତ ସହିତ ବଲିଉଡରେ ଡେବ୍ୟୁ କରିଥିଲେ । ପୂର୍ବରୁ ସେ କହିଥିଲେ ଯେ, ସେ ବହୁବିବାହରେ ବିଶ୍ୱାସ କରନ୍ତି । ୨୦୨୨ ମସିହାରେ ଦେଇଥିବା ଏକ ସାକ୍ଷାତକାରରେ ସେ କହିଥିଲେ ଯେ, ତାଙ୍କର ୯ଟି ସନ୍ତାନ ଅଛନ୍ତି ।
