ନୂଆଦିଲ୍ଲୀ,୦୧/୦୫: ଆନ୍ଧ୍ରପ୍ରଦେଶରେ ମର୍ମନ୍ତୁଦ ଦୁର୍ଘଟଣା । ଭାରସାମ୍ୟ ହରାଇ ଦୋକାନ ଘରକୁ ପିଟିଲା କାର୍। ଫଳରେ ୫ ଏମବିବିଏସ ଛାତ୍ରଙ୍କ ସମେତ ୬ ଜଣଙ୍କ ମୃତ୍ୟୁ ହୋଇଛି। ସ୍ଥାନୀୟ ଲୋକ ଏବଂ ପୋଲିସଙ୍କ ଅନୁସାରେ,ମୁମ୍ବାଇ ହାଇୱେର ପୋଥିରେଡ୍ଡିପାଲେମରେ ଏକ ଦୋକାନ ଘର ଭିତରକୁ କାରଟି ଧକ୍କା ଦେବା ଫଳରେ ଦୁର୍ଘଟଣା ଘଟିଥିଲା।
ସ୍ଥାନୀୟ ଲୋକେ ଏନେଇ ଘଟଣାସ୍ଥଳରେ ୧୦୮ ଆମ୍ବୁଲାନ୍ସକୁ ସୂଚନା ଦେଇଥିଲେ। ପୋଲିସ ମଧ୍ୟ ଘଟଣାସ୍ଥଳରେ ପହଞ୍ଚିଥିଲା। କାରରେ ଥିବା ସମସ୍ତ ଆହତଙ୍କୁ ଏକ ଘରୋଇ ହସ୍ପିଟାଲରେ ଭର୍ତ୍ତି କରାଯାଇଥିଲା। ଚିକିତ୍ସା ସମୟରେ ପାଞ୍ଚ ଜଣ ଡାକ୍ତରୀ ଛାତ୍ରଙ୍କ ମୃତ୍ୟୁ ହୋଇଥିବା କୁହାଯାଉଛି। ପୋଲିସ କହିଛି ଯେ କାରଟି ଯେଉଁ ଦୋକାନ ଘରେ ପ୍ରବେଶ କରିଥିଲା ସେହି ଘରର ବାସିନ୍ଦା ଭେଙ୍କଟ ରମଣାୟାଙ୍କର ଘଟଣା ସ୍ଥଳରେ ମୃତ୍ୟୁ ହୋଇଥିଲା। ଡାକ୍ତରଙ୍କ କହିବା ମୁତାବକ,କଡପା ନିବାସୀ ନବନୀତ ଶଙ୍କର ନାମକ ଅନ୍ୟ ଜଣେ ଛାତ୍ରଙ୍କ ଅବସ୍ଥା ସ୍ଥିର ଅଛି। ଦୁର୍ଘଟଣାରେ ଆନ୍ଧ୍ରପ୍ରଦେଶ ମୁଖ୍ୟମନ୍ତ୍ରୀ ଏବଂ ତେଲୁଗୁ ଦେଶମ ପାର୍ଟି (ଟିଡିପି) ମୁଖ୍ୟ ଏନ ଚନ୍ଦ୍ରବାବୁ ନାଇଡୁ ଦୁଃଖ ପ୍ରକାଶ କରିଛନ୍ତି। ସେ ମୃତକଙ୍କ ପରିବାର ପ୍ରତି ସମବେଦନା ପ୍ରକାଶ କରିବା ସହ କ୍ଷତିପୂରଣ ଦେବା ନେଇ କହିଛନ୍ତି ।
