ଭୁବନେଶ୍ବର: ମୁମ୍ବାଇର ଜିସିସି ଇଣ୍ଟରନ୍ୟାସନାଲରେ ମାର୍ସ ଇଣ୍ଟରନ୍ୟାସନାଲ ସ୍ପେଲିଙ୍ଗ ବି’ର ଜାତୀୟ ଫାଇନାଲ କାର୍ଯ୍ୟକ୍ରମ ଅନୁଷ୍ଠିତ ହୋଇଯାଇଛି। ଗତ ୯ ଓ ୧୦ ନଭେମ୍ବରରେ ଆୟୋଜିତ ହୋଇଥିବା ଏହି କାର୍ଯ୍ୟକ୍ରମରେ ଭାଗ ନେଇ ଓଡ଼ିଶା ପାଇଁ ଗର୍ବ ଆଣିଛନ୍ତି ବାଲେଶ୍ବର ଝିଅ ସିୟୋନା ପଟ୍ଟନାୟକ।
ମାର୍ସ ଇଣ୍ଟରନ୍ୟାସନାଲ ସ୍ପେଲିଙ୍ଗ ବି(ଏମଆଇଏସବି) କାର୍ଯ୍ୟକ୍ରମ ଯାହା ସମଗ୍ର ଏସିଆ ମହାଦେଶରେ ସ୍କୁଲ ସ୍ତରରେ ଆୟୋଜନ କରାଯାଇଥାଏ । ଏହି କାର୍ଯ୍ୟକ୍ରମର ମୁଖ୍ୟ ଉଦ୍ଦେଶ୍ୟ ହେଉଛି, ପିଲାମାନଙ୍କର ଶବ୍ଦ ଉଚ୍ଚାରଣକୁ ଆହୁରି ସହଜ କରିବା, ଶବ୍ଦକୋଷ ଓ ଯୋଗାଯୋଗ ଦକ୍ଷତାକୁ ବଢାଇବା। ପ୍ରଥମରୁ ଦ୍ବାଦଶ ଶ୍ରେଣୀରେ ପଢୁଥିବା ଛାତ୍ରଛାତ୍ରୀମାନଙ୍କ ପାଇଁ ଏହା ବିଶ୍ବର ସର୍ବବୃହତ୍ତ ଭାଷା ଶିକ୍ଷା ପ୍ରତିଯୋଗିତା । ଏହି ପ୍ରତିଯୋଗିତା ପ୍ରଥମେ ସ୍କୁଲ ପରେ ରାଜ୍ୟ, ଦେଶ ଓ ଶେଷରେ ଅନ୍ତର୍ଜାତୀୟ ସ୍ତରରେ ଆୟୋଜିତ ହୋଇଥାଏ।
ଏହି ପ୍ରତିଯୋଗିତାର ଏକାଦଶ ରାଉଣ୍ଡରେ ବିଜୟୀ ହେବା ସହ ଅନ୍ତର୍ଜାତୀୟ ରାଉଣ୍ଡ ପାଇଁ ମନୋନୀତ ହୋଇଛନ୍ତି ଓଡ଼ିଆ ଝିଅ ସିୟୋନା ପଟ୍ଟନାୟକ । ଆଉ ତାଙ୍କର ଏହି ବିଜୟ ଓଡ଼ିଶା ପାଇଁ ଆଣିଦେଇଛି ଗର୍ବ ଓ ଗୌରବ। ବାଲେଶ୍ବର ଜିଲ୍ଲା ରାଣୀପାଟଣା ଅଞ୍ଚଳର ସବ୍ୟସାଚୀ ପଟ୍ଟନାୟକ ଓ ତପସ୍ବିନୀ ଦାସ ପଟ୍ଟନାୟକଙ୍କ ଝିଅ ସିୟୋନା ପଟ୍ଟନାୟକ ପୂର୍ବରୁ ଓଡ଼ିଶା ରାଜ୍ୟ ସ୍ତରୀୟ ଚାମ୍ପିଅନସିପ୍ ଜିତି ସାରିଛନ୍ତି । ଆଉ ଏବେ ଜାତୀୟ ଚାମ୍ପିୟନସିପ୍ରେ ମଧ୍ୟ ବାଜିମାତ କରିଛନ୍ତି ଓଡ଼ିଆ ଝିଅ ସିୟୋନା ପଟ୍ଟନାୟକ ।
