ନୂଆଦିଲ୍ଲୀ: ଦକ୍ଷିଣ ଆଫ୍ରିକାର ଦ୍ରୁତ ବୋଲର କାଗିସୋ ରାବାଡାଙ୍କୁ ସମସ୍ତ ପ୍ରକାରର କ୍ରିକେଟରୁ ସାମୟିକ ଭାବରେ ନିଲମ୍ବିତ କରାଯାଇଛି। ସେ ନିଷିଦ୍ଧ ଔଷଧ ବା ଡ୍ରଗ୍ସ ସେବନ କରିଥିବା କାରଣରୁ ତାଙ୍କ ଉପରେ ଏହି କାର୍ଯ୍ୟାନୁଷ୍ଠାନ ନିଆଯାଇଛି । ରାବାଡା ନିଜର ଭୁଲ ସ୍ୱୀକାର କରି ଏକ ବିବୃତ୍ତି ଜାରି କରିଛନ୍ତି । ରାବାଡା କିଛି ଦିନ ପୂର୍ବରୁ ବ୍ୟକ୍ତିଗତ କାରଣ ଦର୍ଶାଇ ଆଇପିଏଲରୁ ସ୍ବଦେଶ ଫେରିଥିଲେ ଏବଂ ସେବେଠାରୁ ସେ ଗୁଜରାଟ ଟାଇଟାନ୍ସରେ ଯୋଗ ଦେଇପାରି ନାହାଁନ୍ତି। 

ଗୁଜୁରାଟ ଟାଇଟାନ୍ସ ରାବାଡାଙ୍କୁ ୧୦.୭୫ କୋଟି ଟଙ୍କାରେ କିଣିଥିଲା ଏବଂ ସେ ଏହି ସିଜନରେ କେବଳ ୨ଟି ମ୍ୟାଚ୍ ଖେଳିପାରିଥିଲେ। ପଞ୍ଜାବ କିଙ୍ଗ୍ସ ବିପକ୍ଷରେ ସେ ୪୧ ରନ ଦେଇ ମାତ୍ର ଗୋଟିଏ ୱିକେଟ୍ ନେଇଥିଲେ। ଏହା ପରେ, ମୁମ୍ବାଇ ବିପକ୍ଷରେ, ସେ ୪୨ ରନ ଦେଇ ଗୋଟିଏ ୱିକେଟ ନେଇଥିଲେ । ଏହା ପରେ ହଠାତ୍ ଏପ୍ରିଲ ୨ ତାରିଖରେ ରାବାଡା ଆଇପିଏଲ ଛାଡି ସ୍ବଦେଶ ଫେରି ଯାଇଥିଲେ ।

 ଶନିବାର (ମେ ୩) ରେ ରାବାଡା ଦକ୍ଷିଣ ଆଫ୍ରିକା କ୍ରିକେଟର୍ସ ଆସୋସିଏସନ (SACA) ନାଁ ନେଇ ଏକ ବିବୃତ୍ତି ଜାରି କରିଛନ୍ତି । ଏଥିରେ ତାଙ୍କର ଡ୍ରଗ୍ ଟେଷ୍ଟ ରିପୋର୍ଟ ପଜିଟିଭ୍ ଆସିବାରୁ ତାଙ୍କୁ ହଠାତ୍ IPL ରୁ ଫେରିବାକୁ ପଡିଲା ବୋଲି ଲେଖିଛନ୍ତି । ରାବାଡା ଏହା ମଧ୍ୟ କହିଛନ୍ତି ଯେ, ବର୍ତ୍ତମାନ ତାଙ୍କୁ ଅସ୍ଥାୟୀ ଭାବରେ ନିଲମ୍ବିତ କରାଯାଇଛି। ESPN-Cricinfo ରିପୋର୍ଟ ଅନୁଯାୟୀ, ରାବାଡା ଜାନୁଆରୀ-ଫେବୃଆରୀରେ ଖେଳାଯାଇଥିବା SA20 ଲିଗ୍ ସମୟରେ ଏହି ଔଷଧ ବ୍ୟବହାର କରିଥିଲେ । ସେ MI କେପ୍ ଟାଉନ୍ ପାଇଁ ଖେଳୁଥିଲେ ।

ସେପଟେ ଯଦି ଆମେ ରିକ୍ରିଏସନାଲ୍‌ ଡ୍ରଗ୍ସ ବିଷୟରେ କଥା ହେବା, ତେବେ ଏଗୁଡ଼ିକ କାର୍ଯ୍ୟଦକ୍ଷତା ବୃଦ୍ଧିକାରୀ ଡ୍ରଗଠାରୁ ଭିନ୍ନ, ଯାହାର ବ୍ୟବହାର ସମ୍ପୂର୍ଣ୍ଣ ନିଷିଦ୍ଧ। ଏପରି ଔଷଧ ବ୍ୟବହାର କରୁଥିବା ଖେଳାଳିମାନଙ୍କୁ କିଛି ବର୍ଷ ପାଇଁ ଖେଳରୁ ନିଷେଧ କରାଯାଏ । ଏଭଳି ଡ୍ରଗ୍ସ ମଜାମସ୍ତି କରିବାକୁ ସେବନ କରାଯାଏ । କିନ୍ତୁ ଏହାର  ବ୍ୟବହାରକୁ ସାଧାରଣତଃ ବେଆଇନ ବୋଲି ବିବେଚନା କରାଯାଏ । କିଛି ବର୍ଷ ପୂର୍ବେ ଇଂଲଣ୍ଡ ବ୍ୟାଟର ଆଲେକ୍ସ ହେଲ୍ସଙ୍କୁ ମଧ୍ୟ ସମାନ ଡ୍ରଗ୍ ବ୍ୟବହାର କରିବା ପରେ ନିଲମ୍ବିତ କରାଯାଇଥିଲା ।