ଦାରିଙ୍ଗବାଡି,୨୧/୦୧ : ହାଡ଼ଭଙ୍ଗା ଜାଡ଼ରେ ଥରୁଛି ଦାରିଙ୍ଗବାଡ଼ି। ଆଜି ପୁଣି ଦାରିଙ୍ଗବାଡ଼ିରେ ତୁଷାରପାତ ହୋଇଥିବା ଦେଖିବାକୁ ମିଳିଛି। ଗତ କିଛି ଦିନ ହେବ ସ୍ଥାନୀୟ ଅଞ୍ଚଳରେ ତୁଷାରପାତ ଜାରି ରହିଛି। ପ୍ରବଳ ଥଣ୍ଡା ଯୋଗୁଁ ସ୍ଥାନୀୟ ଲୋକଙ୍କର ହାତଗୋଡ଼ କାଲୁଆ ମାରି ଯାଉଛି। ଘରୁ ବାହାରିବା ଏକ ପ୍ରକାର ମୁସ୍କିଲ ହୋଇ ପଡ଼ିଛି। ଲୋକେ ଶୀତ ଦାଉରୁ ରକ୍ଷା ପାଇବା ପାଇଁ ନିଆଁ ଜାଳି ବସୁଛନ୍ତି। ସକାଳୁ ସକାଳୁ ଚା ଦୋକାନରେ ଭିଡ଼ ଜମୁଛି।
ଏହି ଖବରଟିକୁ ପଢନ୍ତୁ-ବଙ୍ଗୋପସାଗରରେ ଗୁରୁଚାପ ବଳୟ ପ୍ରଭାବ: ବୁଧବାରଠାରୁ କମିବ ଶୀତ, ଦୁଇ ଦିନ ଘନ କୁହୁଡ଼ି ସମ୍ଭାବନା
ଦାରିଙ୍ଗବାଡ଼ିରେ ସକାଳ ୧୦ ରୁ ୧୧ ନହେଲେ ଶୀତ ଛାଡ଼ୁ ନାହିଁ। ଦିନ ୧୦ଟା ପର୍ଯ୍ୟନ୍ତ କୁହୁଡ଼ି ଲାଗି ରହୁଛି। ପ୍ରବଳ କୁହୁଡ଼ି ଯୋଗୁଁ ରାସ୍ତାଘାଟ ଦୃଶ୍ୟମାନ ହେଉ ନାହିଁ। ଫଳରେ ଗାଡ଼ି ଚଳାଇବା ମୁସ୍କିଲ ହୋଇପଡୁଛି। ସେହିପରି ସନ୍ଧ୍ୟା ୫ଟା ହେଲେ ଶୀତ ଯୋଗୁଁ କେହି ଘରୁ ବାହାରୁ ନାହାଁନ୍ତି। ଦିନ ସାରା ପାଗ ଶୀତୁଆ ରହୁଥିବାରୁ ଲୋକମାନେ ଶୀତବସ୍ତ୍ର ପରିଧାନ କରୁଛନ୍ତି।
ପ୍ରକାଶ ଥାଉକି, ଆସନ୍ତା ବୁଧବାରଠାରୁ ରାଜ୍ୟରେ ଶୀତ କମିବ। ବଙ୍ଗୋପସାଗର ଅଞ୍ଚଳରେ ଏକ ଗୁରୁଚାପ ବଳୟ ରହିବ । ଏହାର ପ୍ରଭାବରେ ରାଜ୍ୟକୁ ଉଷ୍ମ ଜଳୀୟବାଷ୍ପ ପୂର୍ଣ୍ଣ ବାୟୁ ଆସିବ । ଏହାଫଳରେ ରାତି ତାପମାତ୍ରା ବଢ଼ିବ ଓ ଶୀତ କମିଯିବ। ପାଣିପାଗ ବିଶେଷଜ୍ଞ ଉମାଶଙ୍କର ଦାସ ଏଭଳି ପୂର୍ବାନୁମାନ କରିଛନ୍ତି ।
