ଭୁବନେଶ୍ୱର ୦୫/୧୧: ପୂର୍ବ ବିବାଦକୁ କେନ୍ଦ୍ର କରି ଜଣେ ସମାଜସେବୀଙ୍କୁ ଗୋଡ଼ାଇ ଗୋଡ଼ାଇ ହାଣିଛନ୍ତି ଦୃର୍ବତ୍ତମାନେ । ଏମିତି ଘଟଣା ଘଟିଛି ଏୟାରପୋର୍ଟ ଥାନା ପଳାସପଲ୍ଳୀ ଲେନ୍-୭ରେ । ଆକ୍ରମଣର ଶିକାର ହୋଇଛନ୍ତି ସମାଜସେବୀ ଶିବ ପ୍ରସାଦ ଶ୍ରୀଚନ୍ଦନ । ତାଙ୍କୁ ପ୍ରଥମେ କ୍ୟାପିଟାଲ୍ ହସ୍ପିଟାଲ୍ ଓ ପରେ ଏମସ୍କୁ ସ୍ଥାନାନ୍ତର କରାଯାଇଛି । ୨ଟି ବାଇକ୍ରେ ୫ରୁ ୬ ଜଣ ଯୁବକ ଆସି ତାଙ୍କୁ ହାଣିଥିବା ସ୍ଥାନୀୟ ଲୋକେ ପୁଲିସ୍କୁ କହିଛନ୍ତି ।
ଶିବଙ୍କ ଘର ପଳାସପଲ୍ଲୀ ଲେନ୍ ୧୦ରେ ରୁହନ୍ତି। ସେ ବିଜେପିର ଜଣେ ସକ୍ରିୟ ସଦସ୍ୟ ଭାବ କାର୍ଯ୍ୟ କରୁଛନ୍ତି । ତା’ଛଡ଼ା ସମାଜସେବା ଓ ରକ୍ତଦାନ ତାଙ୍କର ନିଶା । ସୋମବାର ରାତି ପ୍ରାୟ ୧୦ଟା ୧୫ରେ ସେ ସ୍କୁଟିରେ ଘରକୁ ଫେରୁଥିଲେ । ତାଙ୍କୁ ୨ଟି ବାଇକ୍ରେ କିଛି ଯୁବକ ଖଣ୍ଡା, ଭୁଜାଲି ଓ ହକିଷ୍ଟିକ୍ ନେଇ ପିଛା କରୁଥିଲେ । ପଳାସପଲ୍ଳୀ ଲେନ୍-୭ରେ ଶିବଙ୍କ ସ୍କୁଟିର ଗତି କମ୍ ଥିଲା । ଏହି ସମୟରେ ଦୁର୍ବୃତ୍ତମାନେ ତାଙ୍କୁ ଅଟାକାଇଥିଲେ । ସେ କିଛି ବୁଝିବା ଆଗରୁ ଅପରାଧୀମାନେ ତାଙ୍କୁ ହାଣି ପକାଇଥିଲେ । ଜୀବନ ବଞ୍ଚାଇବାକୁ ଏଣେତେଣେ ଧାଇଁଥିଲେ ଶିବ । ହେଲେ ଦୁର୍ବୃତ୍ତମାନେ ତାଙ୍କୁ ଗୋଡ଼ାଇ ଗୋଡ଼ାଇ ହାଣି ଚାଲିଥିଲେ । ଶିବ ତଳେ ପଡ଼ିଗଲା ପରେ ଅଭିଯୁକ୍ତମାନେ ଘଟଣାସ୍ଥଳରୁ ଚମ୍ପଟ ମାରିଥିଲେ । ସ୍ଥାନୀୟ ଲୋକ ଶିବଙ୍କୁ ଉଦ୍ଧାର କରି କ୍ୟାପିଟାଲ୍ ହସ୍ପିଟାଲ୍ରେ ଭର୍ତ୍ତି କରି ପୁଲିସ୍କୁ ଖବର ଦେଇଥିଲେ । ଶିବଙ୍କ ହାତ, ବେକ, ପିଠିରେ ଗଭୀର ଆଘାତ ଲାଗିଛି । କ୍ୟାପିଟାଲ୍ ହସ୍ପିଟାଲ୍ରେ ପ୍ରାଥମିକ ଚିକିତ୍ସା ପରେ ତାଙ୍କୁ ଏମସ୍ ହସ୍ପିଟାଲ୍କୁ ପଠାଇ ଦିଆଯାଇଛି । ସେଠାରେ ତାଙ୍କ ଅବସ୍ଥା ସଙ୍କଟାପନ୍ନ ଥିବା ଜଣାପଡ଼ିଛି ।
ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି । ପୁଲିସ୍ ଉକ୍ତ ଅଞ୍ଚଳରେ ଲାଗିଥିବା ସିସିଟିଭି ଯାଞ୍ଚ କରୁଛି । ପୂର୍ବ ବିବାଦକୁ କେନ୍ଦ୍ର କରି ଏହି ଆକ୍ରମଣ ହୋଇଥିବା ଡିସିପି ପିନାକ ମିଶ୍ର କହିଛନ୍ତି । ତେବେ ଘଟଣା ପଛରେ ରାଜନୈତିକ ଷଡ଼ଯନ୍ତ୍ର ଥିବା ସ୍ଥାନୀୟ ଲୋକମାନେ ଅଭିଯୋଗ କରିଛନ୍ତି । ଯଦି ୨୪ ଘଣ୍ଟା ମଧ୍ୟରେ ପୁଲିସ୍ ଅଭିଯୁକ୍ତମାନଙ୍କୁ ପୁଲିସ୍ ଗିରଫ ନ କରେ ତା’ହେଲେ ଥାନା ଘେରାଉ କରାଯିବ ବୋଲି ଶିବଙ୍କ ସହଯୋଗୀମାନେ କହିଛନ୍ତି । ପୁଲିସ କମିଶନର ଦେବଦତ୍ତ ସିଂହ ଆହତ ଶିବଙ୍କୁ ଏମ୍ସ ହସ୍ପିଟାଲରେ ଭେଟିବାକୁ ଯାଇଛନ୍ତି ।
