ବ୍ରହ୍ମଗିରି,୧୪/୦୯: ଆଜିଠୁ ବିଭିନ୍ନ ଶକ୍ତିପୀଠରେ ଶାରଦୀୟ ପୂଜା ଆରମ୍ଭ ହେବ । ଏହା ୧୬ ଦିନ ଧରି ଶୁକ୍ଳପକ୍ଷ ନବମୀ ତିଥି ପର୍ଯ୍ୟନ୍ତ ଚାଲିବ । ବ୍ରହ୍ମଗିରିର ଅଧିଷ୍ଠାତ୍ରୀ ଦେବୀ ମା' ବାଲିହରଚଣ୍ଡୀ ପୀଠରେ ଷୋଳ ଦିବସୀୟ ଶାରଦୀୟ ପୂଜାର୍ଚ୍ଚନା ପାଇଁ ସମସ୍ତ ପ୍ରସ୍ତୁତି ଚୂଡ଼ାନ୍ତ ହୋଇଛି । ଅଷ୍ଟମୀରେ ସହସ୍ରକୁମ୍ଭ ବରଣ କରାଯାଇ ଷୋଡ଼ଶ ଉପଚାରରେ ୧୦୮ କଳସ ପବିତ୍ର ଜଳରେ ମା'ଙ୍କ ସ୍ନାନ ଓ ପୂଜାର୍ଚ୍ଚନା କରାଯିବ । ପ୍ରତିଦିନ ମା'ଙ୍କ ଦୁଇଟି ଲେଖାଏଁ ବେଶ ଅନୁଷ୍ଠିତ ହେବ ବୋଲି ସେବାୟତ ନିଯୋଗ ପକ୍ଷରୁ ସୂଚନା ଦିଆଯାଇଛି । ଶାରଦୀୟ ଷୋଳପୂଜାରେ ୩୨ଟି ବେଶରେ ମା' ଅଳଙ୍କୃତ ହେବେ ।
ପ୍ରଥମ ଦିନ ଭୈରବୀ ଓ କାଳୀ ବେଶ, ଦ୍ୱିତୀୟ ଦିନ କମଳା ଓ ମହାଲକ୍ଷ୍ମୀ ବେଶ, ତୃତୀୟ ଦିନ ଭଗବତୀ ଓ ସରସ୍ୱତୀ ବେଶ, ଚତୁର୍ଥ ଦିନ କାଳୀ ଓ ମହାକାଳୀ ବେଶ ହେବ । ପଞ୍ଚମ ଦିନ ଅମ୍ବିକା ଓ ଚଣ୍ଡୀ ବେଶ, ଷଷ୍ଠ ଦିନ ଭୈରବୀ ଓ ପଦ୍ମାବତୀ ବେଶ, ସପ୍ତମ ଦିନ ମାତଙ୍ଗୀ ଓ ସାମାଙ୍ଗୀ ବେଶ, ଅଷ୍ଟମ ଦିନ ଷୋଡ଼ଶୀ ଓ ଚଣ୍ଡୀ ବେଶ, ନବମ ଦିନ କୁମାରୀ ଓ ବ୍ରାହ୍ମଣୀ ବେଶ, ଦଶମ ଦିନ ଲଳିତା ଓ ବଗଳାମୁଖୀ ବେଶ, ଏକାଦଶ ଦିନ ଭୁବନେଶ୍ୱରୀ ଓ ନାରାୟଣୀ ବେଶ, ଦ୍ୱାଦଶ ଦିନ ଜଗଦ୍ଧାତ୍ରୀ ଓ ଭବାନୀ ବେଶ, ତ୍ରୟୋଦଶ ଦିନ ତାରା ଓ ଗୌରୀ ବେଶ, ଚତୁର୍ଦ୍ଦଶ ଦିନ ତ୍ରିପୁରମୋହିନୀ ଓ ଯୋଗମାୟା ବେଶ, ପଞ୍ଚଦଶ ଦିନ ମାହେଶ୍ୱରୀ ଓ ବୈଷ୍ଣବୀ ବେଶ, ଷୋଡ଼ଦଶ ଦିନରେ ବରାହୀ ଓ ନାରସିଂ ବେଶ ଅନୁଷ୍ଠିତ ହେବ । ନବମୀ ତିଥିରେ କମଳା, ଆତ୍ମିକା ଓ ଦଶହରାରେ ମହିଷାମର୍ଦ୍ଦିନୀ ସ୍ୱତନ୍ତ୍ର ବେଶ ଅନୁଷ୍ଠିତ ହେବ ବୋଲି ମା' ବାଲି ହରଚଣ୍ଡୀ ପରିଚାଳନା କମିଟି ତରଫରୁ ସୂଚନା ଦିଆଯାଇଛି । ପୂଜା ପାଇଁ ପୁଲିସ ପ୍ରଶାସନ ତରଫରୁ ବ୍ୟାପକ ବ୍ୟବସ୍ଥା ହୋଇଛି ।
