ଭୁବନେଶ୍ବର, ୩୦।୧୧ : ଓଡ଼ିଶାରେ ନକ୍ସଲଙ୍କ ପ୍ରାଦୃଭାବ କମିଛି। ରାଜ୍ୟର ୭ଟି ଜିଲ୍ଲାରେ କିଛି ମାଓବାଦୀ ସକ୍ରିୟ ଅଛନ୍ତି। ଓଡ଼ିଶାରେ ୬୦ ରୁ ୭୦ ଜଣ ନକ୍ସଲ ସକ୍ରିୟ ରହିଛନ୍ତି । ମାଲକାନଗିରିର , କନ୍ଧମାଳ, କଳାହାଣ୍ଡି , ନୟାଗଡ଼ , ବଲାଙ୍ଗୀର , ନୂଆପଡ଼ା ଜିଲ୍ଲାରେ ମାଓବାଦୀଙ୍କୁ ସମ୍ପୂର୍ଣ ଦମନ ପାଇଁ ବିଏସଏଫ୍ ପ୍ରତିଶ୍ରୁତି ବଦ୍ଧ ରହିଛି । ୨୦୨୬ ମାର୍ଚ୍ଚ ସୁଦ୍ଧା ସମ୍ପୂର୍ଣ ଭାବେ ଓଡ଼ିଶାରୁ ମାଓବାଦୀଙ୍କୁ ମୂଳୋତ୍ପଟନ କରାଯିବ ବୋଲି ଗୃହମନ୍ତ୍ରୀ ଅମିତ୍ ଶାହା ଆଶାବ୍ୟକ୍ତ କରିଛନ୍ତି । ବିଏସଏଫ୍ ପାଖରେ ସମସ୍ତ ଟେକ୍ନୋଲଜି ମଧ୍ୟ ରହିଛି ବୋଲି ଭୁବନେଶ୍ୱରରେ ଆୟୋଜିତ ଏକ ସାମ୍ବାଦିକ ସମ୍ମିଳନୀରେ ବିଏସଏଫ୍ ଆଇଜି ସି ଡି ଅଗ୍ରୱାଲ ସୂଚନା ଦେଇଛନ୍ତି।
୨୦୧୦ରେ ବିଏସଏଫକୁ ନକ୍ସଲ ପ୍ରଭାବିତ ଜିଲ୍ଲା କୋରାପୁଟ ଏବଂ ମାଲକାନଗିରିରେ ପାଞ୍ଚଟି ବାଟାଲିୟନର ପ୍ରାରମ୍ଭିକ ନିୟୋଜନ ସହିତ ଓଡିଶାରେ ଅନ୍ତର୍ଭୁକ୍ତ କରାଯାଇଥିଲା। ଯେଉଁ ସମୟରେ ନକ୍ସଲ ହିଂସା ଚରମ ସୀମାରେ ଥିଲା। ୨୦୦୪ରେ କୋରାପୁଟ ପୋଲିସ୍ ଆର୍ମୋରୀ ଆକ୍ରମଣ, ୨୦୦୬ ମୋଟୁ ପୋଲିସ୍ ପୋଷ୍ଟ ଆକ୍ରମଣ ଏବଂ ୨୦୦୯ ଦାମନଯୋଡିରେ ସିଏସ୍ଏଫ୍ ଆମ୍ବୁସ୍ ଭଳି ଘଟଣା ସହିତ ନକ୍ସଲମାନେ ସମାନ୍ତରାଳ ଶାସନ ପ୍ରତିଷ୍ଠା କରିଥିଲେ। ନକ୍ସଲବାଦ ବିରୋଧରେ ବିଏସ ଏଫ୍ କଠୋର କାର୍ଯ୍ୟାନୁଷ୍ଠାନ ନେଇଛି ।
ଓଡ଼ିଶାରେ ଶାନ୍ତି ରହିଛି। ଶାନ୍ତି ଯୋଗାଇବାକୁ ସର୍ବଦା ବର୍ଡର ବିଏସଏଫ୍ ଜଗିଛି । ବଙ୍ଗଳାଦେଶ ବର୍ଡର ଆମ ପାଇଁ ଗୋଟିଏ ଚାଲେଞ୍ଜ । ଗୋଟିଏ ଗାଁ ମଧ୍ୟରେ ଭାରତୀୟ ସୀମା ଦେଇ ଯାଇଛି । ଯାହାକି କେଉଁ ଲୋକ କେଉଁ ଦେଶର ତାହାକୁ ଚିହ୍ନଟ କରିବା କଷ୍ଟକର ହୋଇପଡେ, ଯାହାଦ୍ଵାରା ବିଏସ ଏଫ୍ ସମ୍ପୂର୍ଣ ଭାବେ ସୁରକ୍ଷା ବଢ଼ାଇଦେଇଛି ବୋଲି ବିଏସଏଫ ଆଇଜି କହିଛନ୍ତି ।
