ସିଓଲ,୧୫/୧୨: ଦକ୍ଷିଣ କୋରିଆରେ ରାଷ୍ଟ୍ରପତି ୟୁନ୍ ସୁକ୍-ୟୋଲ୍ଙ୍କ ବିରୋଧରେ ଶନିବାର ଦ୍ୱିତୀୟଥର ମହାଭିଯୋଗ ପ୍ରସ୍ତାବ ଆସିଥିବାବେଳେ ତାହା ପାସ୍ ହୋଇଛି । ଏହି ସମୟରେ ସଂସଦରେ ତାଙ୍କ ବିରୋଧରେ ୨୦୪ ଖଣ୍ଡ ଭୋଟ୍ ପଡିଥିଲା । ସେହିପରି ସମର୍ଥନରେ ମାତ୍ର ୮୫ ଭୋଟ୍ ପାଇଥିଲେ ସେ । ସଂସଦରେ ୟୁନ୍ଙ୍କ ବିରୋଧରେ ମହାଭିଯୋଗ ପ୍ରସ୍ତାବ ପାସ୍ ହେବା ସେ ନିଲମ୍ବିତ ହୋଇଛନ୍ତି । ଏବେ ପ୍ରଧାନମନ୍ତ୍ରୀ ହାନ୍ ଡକ୍-ସୁ କାର୍ଯ୍ୟକାରୀ କାମଚଳା ରାଷ୍ଟ୍ରପତି ଭାବେ କାର୍ଯ୍ୟ କରିବେ ।
ରାଷ୍ଟ୍ରପତି ୟୁନ୍ ଡିସେମ୍ବର ୩ ତାରିଖ ରାତିରେ ଦେଶରେ ସାମରିକ ଆଇନ ଲଗାଇଥିଲେ । ବିରୋଧୀ ଦଳ ଉତ୍ତର କୋରିଆ ସହ ମିଶି କାମ କରିବା ଓ ଦେଶ ବିରୋଧୀ ଗତିବିଧିରେ ସାମିଲ ହେବାର ଅଭିଯୋଗ କରି ଏହି ପଦକ୍ଷେପ ନେଇଥିଲେ ସେ । ତେବେ ଏଥିଯୋଗୁ ପ୍ରବଳ ବିରୋଧର ସମ୍ମୁଖୀନ ହେବାରୁ ମାତ୍ର ୬ ଘଣ୍ଟା ମଧ୍ୟରେ ତାଙ୍କୁ ନିଜ ନିଷ୍ପତ୍ତିକୁ ବଦଳାଇବାକୁ ପଡି଼ଥିଲା । ସାମରିକ ଆଇନ ପ୍ରତ୍ୟାହାର ହୋଇଥିଲା । ସେହିପରି ଗତ ଶନିବାର ମଧ୍ୟ ତାଙ୍କୁ ପଦରୁ ହଟାଇବା ଲାଗି ମହାଭିଯୋଗ ପ୍ରସ୍ତାବ ଆସିଥିଲା । କିନ୍ତୁ କିଛି ଭୋଟ୍ରେ ତାହା ପାରିତ ହୋଇପାରିନଥିଲା । ୟୁନ୍ଙ୍କ ବିରୋଧରେ ମହାଭିଯୋଗ ପାସ୍ ହେବାର ଖବର ସାମ୍ନାକୁ ଆସିବା ପରେ ସଂସଦ ସାମ୍ନାରେ ପ୍ରଦର୍ଶନକାରୀମାନେ ଆଜି ଖୁସି ପାଳନ କରିଥିଲେ । ବର୍ତ୍ତମାନ ୟୁନ୍ଙ୍କ ବିରୋଧରେ ମହାଭିଯୋଗ ପ୍ରସ୍ତାବକୁ ସାମ୍ବିଧାନିକ କୋର୍ଟରେ ଉପସ୍ଥାପନ କରାଯିବ । ସେଠାରେ ପ୍ରାୟ ୬ ମାସ ଧରି ତାଙ୍କ ବିରୋଧରେ ମାମଲା ଚାଲିବ ।
