ଭଦ୍ରକ,୧୮/୧୧: ଜିଲ୍ଲାରେ ଅପରାଧିକ କାର୍ଯ୍ୟରେ ରୋକ୍ ଲଗାଇବା ପାଇଁ ଅଣ୍ଟା ଭିଡ଼ିଛି ଭଦ୍ରକ ପୋଲିସ । ଚୋରା କୋଇଲା କାରବାର ରୋକିବା ପାଇଁ ନମ୍ୱର୍ ଜାରି ପରେ ଏସପିଙ୍କ ରେଡ୍ । ରାତି ତମାମ ଚୋରା ବେପାରୀଙ୍କୁ ଗୋଡ଼େଇ ଗୋଡ଼େଇ ଧରିଲେ ଏସପି । ଏସପିଙ୍କ ମୋବାଇଲ୍ ନମ୍ୱର୍ ଜାରି ପରେ ଆସିଥିବା ସୂଚନା ଆଧାରରେ ଏହି ଚଢ଼ାଉ କରାଯାଇଛି ।
ସୂଚନା ମୁତାବକ, ଭଦ୍ରକରେ କୋଇଲା ଚୋରି ରୋକିବା ପାଇଁ ଏସପିଙ୍କ ସ୍ବତନ୍ତ୍ର ଅଭିଯାନ । ଚୋରା କାରବାର ନେଇ ସୂଚନା ପାଇଁ ଭଦ୍ରକ ଏସପି ମଡକର ସନ୍ଦୀପ ସମ୍ପଦ ନିଜ ମୋବାଇଲ୍ ନମ୍ୱର ଜାରି କରିବା ସହ ସାଧାରଣ ଲୋକଙ୍କ ସହଯୋଗ ମାଗିଥିଲେ । ଏହି ନମ୍ବର ସହାୟତାରେ ଯେକୌଣସି ଲୋକ ଚୋରା କୋଇଲା, ଗୋ ଚାଲାଣ ସହ ଅପରାଧିକ କାର୍ଯ୍ୟ କଳାପ ସଂପର୍କିତ ସୂଚନା ପୋଲିସକୁ ଦେଇପାରିବେ ବୋଲି ସୂଚନା ଦେଇଥିଲେ ।
ତେବେ ଏହି ନମ୍ବର ଜାରି ହେବା ପରେ ସୂଚନା ଆଧାରରେ ଏସପିଙ୍କ ନେତୃତ୍ବରେ ପିରାହାଟ ଓ ଘଣ୍ଟେଶ୍ବର ଅଞ୍ଚଳରେ ରେଡ୍ କରିଥିଲା ପୋଲିସ । ଖୋଦ୍ ଏସପି ଏହି ରେଡରେ ସାମିଲ ଥିଲେ । ଏହି ଚଢାଉରେ ୨ ଟି ପିକଅପ୍ ଭ୍ୟାନ ସହ ବିଭିନ୍ନ ସ୍ଥାନରେ ଗଚ୍ଛିତ ଥିବା ପ୍ରାୟ ୮ ହଜାର କିଲୋରୁ ଅଧିକ ପରିମାଣର କୋଇଲା ଜବତ ହୋଇଥିଲା । ପରେ ଏସପିଙ୍କ ନିର୍ଦ୍ଦେଶରେ ପିରହାଟ ଓ ବାଂଶଡ଼ା ଥାନାରେ ୨ ଟି ମାମଲା ରୁଜ ହୋଇଥିବା ପୋଲିସ ସୂଚନା ଦେଇଛି ।
ଜିଲ୍ଲାର କୌଣସି ଅଞ୍ଚଳରେ ଏପରି ବେଆଇନ କାର୍ଯ୍ୟ ହେଉଥିଲେ ଏହି ୯୪୩୮୯୧୬୩୭୦ ମୋବାଇଲ ନମ୍ବରରେ ପୋଲିସକୁ ସୂଚନା ଦେଇପାରିବେ ବୋଲି ଏସପି କହିଥିଲେ । ସୂଚନା ଦେଇଥିବା ବ୍ୟକ୍ତିଙ୍କ ତଥ୍ୟ ଗୋପନ ରହିବ ବୋଲି ପୋଲିସ କହିଥିଲା ।
