ଛତ୍ରପୁର, ୦୬/୧୧ : ବର୍ତ୍ତମାନ ବୁଲେଟ୍ ଅର୍ଥାତ ଦୁଇଚକିଆ ଗାଡି ଅଗ୍ନିକାଣ୍ଡକୁ ନିୟନ୍ତ୍ରଣ କରିବ। ଗଞ୍ଜାମ ଜିଲ୍ଲାକୁ ପ୍ରଥମ କରି ଛତ୍ରପୁର ଅଗ୍ନିଶମ କାର୍ଯ୍ୟାଳୟକୁ ଆସିଛି ଏଭଳି ସ୍ୱତନ୍ତ୍ର ବୁଲେଟ୍ ଯାହା ଅଗ୍ନିଶମ କାର୍ଯ୍ୟରେ ନିୟୋଜିତ ହେବ । ଉକ୍ତ ଗାଡି ଏଣିକି ନିଆଁ ଲିଭାଇବାରେ ନିୟୋଜିତ ହେବ । ଉକ୍ତ ଗାଡ଼ିରେ ରହିଛି ୩୦ ଲିଟର ପାଣି ଗଛିତ ରହୁଥିବା ଏକ ଟାଙ୍କି । ଏଥିସହ ଏକ ଗ୍ୟାସ୍ ଟାଙ୍କି, ସାଇରନ୍ ଆଦି ରହିଛି ।
ବଡ଼ ଅଗ୍ନିଶମ ଗାଡ଼ିରେ ଯେପରି ଉପର ଭାଗରେ ନାଲି ରଙ୍ଗର ଲାଇଟ୍ ଥାଏ, ବୁଲେଟରେ ମଧ୍ୟ ସମ୍ମୁଖ ଭାଗର ଦୁଇ ପାର୍ଶ୍ୱରେ ଦୁଇଟି ଲେଖାଏଁ ନାଲି ଓ ନୀଳ ରଙ୍ଗର ଲାଇଟ୍ ରହିଛି । ସହରର ସଂକୀର୍ଣ୍ଣ ଗଳିରେ ଅଗ୍ନିକାଣ୍ଡ ଘଟିଲେ ହଠାତ ବଡ ଗାଡି ସେଠାକୁ ଯାଇପାରେନି । ଏଭଳି କ୍ଷେତ୍ରରେ ଏହି ଗାଡି ସେଠାରେ ତୁରନ୍ତ ପହଞ୍ଚି ନିଆଁ ଲିଭାଇବାରେ ସହାୟକ ହେବ । ୧୧୨ ଜରୁରୀକାଳିନ ନମ୍ବରକୁ କଲ୍ କଲେ ଆବଶ୍ୟକସ୍ଥଳେ ଏହି ବୁଲେଟ୍ ନିଆଁ ଲିଭାଇବାରେ ନିୟୋଜିତ ହେବ ବୋଲି କହିଛନ୍ତି ଛତ୍ରପୁର ଅଗ୍ନିଶମ କେନ୍ଦ୍ର ଅଧିକାରୀ ଧନଞ୍ଜୟ ମଲ୍ଲିକ ।
