ମୁମ୍ବାଇ,୦୪/୦୩: ଆଉ ନାହାନ୍ତି ମହାନ୍ କ୍ରିକେଟର ପଦ୍ମାକର ଶିବଲକର । ମୁମ୍ବାଇର ପ୍ରସିଦ୍ଧ ବାମହାତୀ ସ୍ପିନର ପଦ୍ମାକର ଶିବଲକରଙ୍କର ସୋମବାର ପରଲୋକ ହୋଇଛି । ମୃତ୍ୟୁ ବେଳକୁ ତାଙ୍କୁ ୮୪ ବର୍ଷ ବୟସ ହୋଇଥିଲା । ତାଙ୍କର ୨୬ ବର୍ଷ କ୍ରିକେଟ କ୍ୟାରିୟର ମଧ୍ୟରେ ସେ ୧୨୪ଟି ପ୍ରଥମ ଶ୍ରେଣୀ ମ୍ୟାଚ ଖେଳି ୫୮୯ଟି ୱିକେଟ ଅକ୍ତିଆର କରିଥିଲେ । ତାଙ୍କ ବିୟୋଗ କ୍ରିକେଟ ଜଗତ ପାଇଁ ଏକ ଅପୂରଣୀୟ କ୍ଷତି ।
୧୯୬୧/୬୨ ସିଜନର ସେ ମୁମ୍ବାଇ ପକ୍ଷରୁ ରଣଜୀ ଟ୍ରଫିରେ ପଦାର୍ପଣ କରିଥିଲେ । ୧୯୮୭/୮୮ ସିଜନ ଖେଳି ୪୮ ବର୍ଷ ବୟସରେ ସେ ଅବସର ନେଇଥିଲେ । ଅବସର ପରେ ସ୍ପିନ ବୋଲିଂ କୋଚ୍ ଭାବେ କାର୍ଯ୍ୟ କରିଥିଲେ । ପରେ ମୁମ୍ବାଇ କ୍ରିକେଟ ଚୟନ କମିଟି ସଦସ୍ୟ ଭାବେ ମଧ୍ୟ କାର୍ଯ୍ୟ କରିଥିଲେ । କେବଳ ରଣଜୀ ଟ୍ରଫିରେ ସେ ୩୬୧ଟି ୱିକେଟ ନେଇଛନ୍ତି । କ୍ରିକେଟ କ୍ୟାରିୟରରେ ସେ ୬୦୫ ୱିକେଟ ନେଇ ବି ତାଙ୍କୁ ଭାରତୀୟ ଦଳରେ ସ୍ଥାନ ମିଳି ନଥିଲା । ୨୨ ବର୍ଷ ବୟସରେ ରଣଜୀରେ ପଦାର୍ପଣ କରିଥିଲେ । ୪୮ ବର୍ଷ ଯାଏ ରଣଜୀ ଖେଳିବା ଜାରି ରଖିଥିଲେ । ଶିବଲକର ୧୨ଟି ଲିଷ୍ଟ ଏ ମ୍ୟାଚ ଖେଳି ୧୬ଟି ୱିକେଟ ନେଇଥିଲେ । ଘରୋଇ କ୍ରିକେଟରେ ଅନନ୍ୟ ସଫଳତା ସତ୍ତ୍ବେ ସେ ଭାରତ ପକ୍ଷରୁ ଟେଷ୍ଟ ଖେଳିବାକୁ ସୁଯୋଗ ପାଇ ନଥିଲେ ।
ପଦ୍ମାକରଙ୍କ ନିଧନରେ ମୁମ୍ବାଇ କ୍ରିକେଟ ସଂଘ (ଏମସିଏ) ଅଧ୍ୟକ୍ଷ ଅଜିଙ୍କ୍ୟ ନାଇକ କହିଛନ୍ତି, ''ମୁମ୍ବାଇ କ୍ରିକେଟ ଆଜି ଜଣେ ସଚ୍ଚୋଟ କିମ୍ବଦନ୍ତୀ କ୍ରିକେଟରଙ୍କୁ ହରାଇଛି । ପଦ୍ମାକର ଶିବଲକର ସାରଙ୍କ ଖେଳରେ ଯୋଗଦାନ ବିଶେଷ କରି ସେ ଜଣେ ମହାନ ସ୍ପିନରଙ୍କ ମଧ୍ୟରେ ଜଣେ ଥିଲେ ।''
The BCCI mourns the unfortunate demise of Shri Padmakar Shivalkar, one of India’s finest spinners ever.
— BCCI (@BCCI) March 3, 2025
In a career spanning two decades, Shri Shivalkar played 124 first-class matches, claiming an impressive 589 wickets at an outstanding average of 19.69.
For his exceptional… pic.twitter.com/ZWnEKtTPkD
ତାଙ୍କ ବିୟୋଗରେ ଗଭୀର ଶୋକ ପ୍ରକାଶ କରିଛି ବିସିସିଆଇ । ସୋସିଆଲ ମିଡିଆ ଏକ୍ସରେ ଜୀବନ ବ୍ୟାପୀ ସାଧନା ପୁରସ୍କାରରେ ସମ୍ମାନିତ ସମୟର ଏକ ଭିଡିଓ ସେୟାର କରି ଶ୍ରଦ୍ଧାଞ୍ଜଳି ଦେଇଛି ଭାରତୀୟ କ୍ରିକେଟ କଣ୍ଟ୍ରୋଲ ବୋର୍ଡ । ୨୦୧୭ରେ ତାଙ୍କୁ ବିସିସିଆଇ ସିକେ ନାୟୁଡୁ ଜୀବନ ବ୍ୟାପୀ ସାଧନା ପୁରସ୍କାରରେ ସମ୍ମାନିତ କରିଥିଲା ।
