ପୁରୀ, ୧୨/୦୪: ପୁରୀରେ ପ୍ରସ୍ତାବିତ ଶ୍ରୀଜଗନ୍ନାଥ ବିମାନବନ୍ଦର ପ୍ରତିଷ୍ଠା ନିମନ୍ତେ ଆବଶ୍ୟକ ବେସରକାରୀ ଜମି ଅଧିଗ୍ରହଣ ନିମନ୍ତେ ଦ୍ୱିତୀୟ ତଥା ଚୂଡ଼ାନ୍ତ ଜନଶୁଣାଣି ଶୁକ୍ରବାର ଅନୁଷ୍ଠିତ ହୋଇଯାଇଛି । ଷଣ୍ଢପୁର ମୌଜା ନିମନ୍ତେ ଗୋରୁଆଳ ପଞ୍ଚାୟତର ଷଣ୍ଢପୁର ମଙ୍ଗଳାମଣ୍ଡପ ନିକଟରେ ଜନଶୁଣାଣି ହୋଇଥିଲା । ଏଠାରେ ୨୫ ଲିଖିତ ଅଭିଯୋଗ ଓ ୧୮ ମୌଖିକ ମତାମତ ହୋଇଛି । ଅତିରିକ୍ତ ଜିଲ୍ଲାପାଳ(ରାଜସ୍ୱ) ଶରତ ଚନ୍ଦ୍ର ବେହେରାଙ୍କ ଅଧ୍ୟକ୍ଷତାରେ ଅନୁଷ୍ଠିତ ଜନଶୁଣାଣିରେ ଉପଜିଲ୍ଲାପାଳ, ଜମି ଅଧିଗ୍ରହଣ ଅଧିକାରୀ ପ୍ରମୁଖ ଯୋଗଦେଇଥିଲେ । ଜମି ଅଧିଗ୍ରହଣ ନିମନ୍ତେ ସରକାରଙ୍କ ପକ୍ଷରୁ ଦିଆଯାଉଥିବା କ୍ଷତିପୂରଣ ରାଶି(ଚିଠା ପ୍ରସ୍ତାବ) ନିଷ୍ପତ୍ତିକୁ ଅନେକ ବିରୋଧ କରିଥିଲେ । କିଛି ଲୋକ ୪ରୁ ୫ ଗୁଣା ଅଧିକ କ୍ଷତିପୂରଣ ପାଇବାକୁ ଦାବି କରିଥିବା ବେଳେ କିଛି ଉଚିତ୍ କ୍ଷତିପୂରଣ ଦାବି ରଖିଥିଲେ ।
ଜମି ଅଧିଗ୍ରହଣ ନିମନ୍ତେ ସରକାରଙ୍କ ପକ୍ଷରୁ ଘୋଷଣା କରାଯାଇଥିବା ଚିଠା ପ୍ରସ୍ତାବ ମୁତାବକ ଦିଆଯାଉଥିବା କ୍ଷତିପୂରଣକୁ ବିରୋଧ କରାଯାଇଥିବାରୁ ଏବାବଦରେ ସରକାରଙ୍କୁ ଜିଲ୍ଲା ପ୍ରଶାସନ ଜଣାଇବ । ସରକାରଙ୍କ ନିଷ୍ପତ୍ତିକ୍ରମେ କ୍ଷତିପୂରଣ ଦିଆଯାଇ ଜମି ଅଧିଗ୍ରହଣ କରାଯିବ । ସରକାରୀ ନିୟମ ମୁତାବକ ଜନଶୁଣାଣିରେ ହୋଇଥିବା ଦାବି ନେଇ ଜିଲ୍ଲାପାଳ ଖୁବ୍ଶୀଘ୍ର ଆରଡିସିଙ୍କୁ ଜଣାଇବେ ବୋଲି ଜଣାପଡ଼ିଛି । ବ୍ୟକ୍ତିଗତ ଜମି ଉପରେ ସମ୍ପୂର୍ଣ୍ଣ ବିସ୍ଥାପିତ ହେଉଥିବା ପ୍ରତି ପରିବାର ପାଇଁ ପୁନଃର୍ବାସ ଏବଂ ଥଇଥାନ ସହାୟତା ପ୍ରଦାନ, ବ୍ୟକ୍ତିଗତ ଜମି ଉପରେ ଆଂଶିକ ପ୍ରଭାବିତ ହେଉଥିବା ପ୍ରତି ପରିବାର ପାଇଁ ପୁନର୍ବାସ ଓ ଥଇଥାନ ସହାୟତା, କୃଷି ଭିତ୍ତିକ ଶ୍ରମିକଙ୍କୁ ସର୍ବନିମ୍ନ ମଜୁରୀ ସହିତ ଏକକାଳୀନ ସହାୟତା, ଭଡ଼ାଟିଆ ଏବଂ ଭାଗଚାଷୀଙ୍କୁ ଏକର ପିଛା ସହାୟତା ରାଶି ପ୍ରଦାନ, ଗୁହାଳ ଓ କ୍ଷୁଦ୍ର ଦୋକାନ ପାଇଁ ପ୍ରଭାବିତ ପରିବାରଙ୍କୁ ଏକକାଳୀନ ସହାୟତା ଦେବା ନିମନ୍ତେ ଥିବା ଚିଠା ପ୍ରସ୍ତାବ ନେଇ ଜନଶୁଣାଣିରେ ଲୋକଙ୍କୁ ଅବଗତ କରାଯାଇଥିଲା ।
ଚିଠା ପ୍ରସ୍ତାବ ମୁତାବକ ବିମାନବନ୍ଦର ନିମନ୍ତେ ଜମି ଅଧିଗ୍ରହଣ ହେଲେ ସିପସରୁବାଲି ଓ ଷଣ୍ଢପୁର ମୌଜାରୁ ମୋଟ ପ୍ରାୟ ୧୨୩ ଜଣ ପ୍ରଭାବିତ ହେବେ । ଯାହା ଭିତରେ ଷଣ୍ଢପୁର ମୌଜାର ୭୮ ଜଣ ରହିଛନ୍ତି । ଯେତେବେଳେ କି ମୋଟ ୬ ଜଣ ବିସ୍ଥାପିତ ହେଉଛନ୍ତି । ବିସ୍ଥାପିତଙ୍କୁ ପୁନର୍ବାସ ଓ ଥଇଥାନ ସହାୟତା ପ୍ରାୟ ୬୫ ଲକ୍ଷ, ପ୍ରଭାବିତ ହେଉଥିବା ପରିବାରଙ୍କୁ ପ୍ରାୟ ୭ କୋଟି, ଭାଗ ଚାଷୀ ଓ ଭଡ଼ାଟିଆଙ୍କୁ ପ୍ରାୟ ୧୫ ଲକ୍ଷ, ଗୁହାଳ ଓ କ୍ଷୁଦ୍ର ଦୋକାନ ପ୍ରଭାବିତ ପରିବାରଙ୍କୁ ପ୍ରାୟ ୭୫ ହଜାର ଟଙ୍କା କ୍ଷତିପୂରଣ ଦେବାକୁ ଚିଠା ସହାୟତା ଆକଳନ ହୋଇଛି । ପ୍ରକଳ୍ପ ହେଲେ ଏହି ମୌଜାର ୩୮ ପରିବାର ପ୍ରଭାବିତ ହେଲେ । ଯେତେବେଳେ କି ଏହି ପ୍ରକଳ୍ପ ଯୋଗୁ ଉଭୟ ମୌଜାର ପ୍ରାୟ ୨୦ ପରିବାର ପରୋକ୍ଷ ଭାବେ ପ୍ରଭାବିତ ହେଉଥିବା ପ୍ରଶାସନିକ ସର୍ଭେରୁ ଜଣାପଡ଼ିଛି ।
