ଭୁବନେଶ୍ୱର/କଟକ,୩୧/୧୨: ନୂଆବର୍ଷକୁ ସ୍ୱାଗତ ଆଳରେ ଡିସେମ୍ବର ୩୧ ‘ଜିରୋ ଆୱାର’ରେ ପୂର୍ବ ବର୍ଷ ଭଳି ଅନେକ ଅମାନିଆ ମାତିବେ । ନାକେ ଯାଏ ମଦ ପିଇ ଉତ୍ପାତ କରିବାକୁ ଯୋଜନାରେ ଅଛନ୍ତି । ଏଭଳି ମଦ୍ୟପ ଗାଡ଼ି ଚାଳକଙ୍କୁ ନିସ୍ତାର ମିଳିବନି । ପରିବହନ ବିଭାଗ ପକ୍ଷରୁ ଗଠିତ ସ୍ୱତନ୍ତ୍ର ସ୍କ୍ୱାଡ୍ ମଙ୍ଗଳବାର ଅପରାହ୍ଣ ୪ଟାଠାରୁ ଜୋର୍ଦାର୍ ଯାଞ୍ଚ କରିବ । ରାଜ୍ୟ ପରିବହନ ପ୍ରାଧିକରଣ (ଏସ୍ଟିଏ) ପକ୍ଷରୁ ଏହି ନିର୍ଦ୍ଦେଶନାମା ଜାରି କରାଯାଇଛି ।
ଜିରୋ ଆୱାରରେ ଦୁର୍ଘଟଣା ହ୍ରାସ ପାଇଁ ଏଭଳି ପଦକ୍ଷେପ ନେବାକୁ ପରିବହନ ଆୟୁକ୍ତ ଅମିତାଭ ଠାକୁର ନିର୍ଦ୍ଦେଶ ଦେଇଛନ୍ତି । ସମସ୍ତ ଆଞ୍ଚଳିକ ପରିବହନ ଅଧିକାରୀ(ଆରଟିଓ)ଙ୍କୁ ଫତୁଆ ଜାରି କରିଛନ୍ତି । ବେପରୁଆ ଗାଡ଼ି ଚାଳକଙ୍କୁ ନିୟନ୍ତ୍ରଣ କରିବାକୁ ଗୁରୁତ୍ୱପୂର୍ଣ୍ଣ ଛକ, ଟ୍ରାଫିକ ପଏଣ୍ଟ ଆଦି ସ୍ଥାନରେ ସ୍ୱତନ୍ତ୍ର ଟିମ୍ ଯାଞ୍ଚ ଦାୟିତ୍ୱରେ ରହିବେ । ମୋଟର ଯାନ ଆଇନ ଅନୁଯାୟୀ କାର୍ଯ୍ୟାନୁଷ୍ଠାନ ଗ୍ରହଣ କରିବାକୁ ଶ୍ରୀ ଠାକୁର ନିର୍ଦ୍ଦେଶ ଦେଇଛନ୍ତି ।
ମଦ ପିଇ ଗାଡ଼ି ଚଳାଉଥିଲେ ମୋଟର ଯାନ ଆଇନର ଧାରା ୧୮୫ ଅନୁଯାୟୀ ଗାଡ଼ି ଜବତ କରାଯିବା ସହ ଡ୍ରାଇଭିଂ ଲାଇସେନ୍ସ ବାତିଲ୍ ଓ ଜରିମାନା କରାଯିବ । ସେହିଭଳି ଦ୍ରୁତଗତି, ବେପରୁଆ ଗାଡ଼ି ଚାଳନା ବିରୋଧରେ ମଧ୍ୟ କାର୍ଯ୍ୟାନୁଷ୍ଠାନ ହେବ । ନିୟମ ଉଲ୍ଲଙ୍ଘନକାରୀ ଗାଡ଼ି ଚାଳକ ଯଦି ପରିଚୟ ପ୍ରଦାନରେ ସହଯୋଗ ନ କରନ୍ତି ତେବେ କଠୋର କାର୍ଯ୍ୟାନୁଷ୍ଠାନ ସ୍ୱରୂପ ଏକ ମାସ ଜେଲ୍ଦଣ୍ଡ କିମ୍ବା ଦୁଇ ହଜାର ଜରିମାନା କିମ୍ବା ଉଭୟ ଲାଗୁ ହେବ ।
ସଡ଼କ ସୁରକ୍ଷା ସପ୍ତାହ ନୁହେଁ, ଚଳିତବର୍ଷ ସାରା ରାଜ୍ୟରେ ସଡ଼କ ସୁରକ୍ଷା ମାସ ପାଳନ କରାଯିବ । ଜାନୁଆରୀ ପହିଲାରୁ ମାସ ଯାକ ସଡ଼କ ଦୁର୍ଘଟଣା ରୋକିବା ସହ ସଚେତନତା ଦିଗକୁ ଗୁରୁତ୍ୱ ଦିଆଯିବ । ବିଶେଷକରି ବଣଭୋଜି ଅଞ୍ଚଳରେ ମଦ୍ୟପାନ କରି ଗାଡ଼ି ଚାଳନା ରୋକିବାକୁ ଅଧିକ ଯାଞ୍ଚ ହେବ । ପିକନିକ୍ ସ୍ପଟକୁ ଆସୁଥିବା ଗାଡ଼ିଗୁଡ଼ିକ ଯେଉଁଭଳି ସମସ୍ତ ସୁରକ୍ଷା ନିୟମର ପାଳନ କରିବେ ସେଥିପାଇଁ ମଧ୍ୟ ଏସଓପି ଜାରି କରାଯାଇଛି ।
ଏସ୍ଟିଏ କମିସନର ଶ୍ରୀ ଠାକୁର କହିଛନ୍ତି ଯେ, ସଡ଼କ ସୁରକ୍ଷା ସପ୍ତାହ ପାଳନ ଅବସରରେ ସାରା ରାଜ୍ୟରେ ବିଭିନ୍ନ କାର୍ଯ୍ୟକ୍ରମ ହାତକୁ ନିଆଯାଇଛି । ଜନସଚେତନତାକୁ ଏଥିରେ ପ୍ରାଧାନ୍ୟ ଦିଆଯାଇଛି । ସେହିଭଳି ଆଇନ ଉଲ୍ଲଂଘନକାରୀଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ପାଇଁ ନିଷ୍ପତ୍ତି ନିଆଯାଇଛି । ଇଂରାଜୀ ନୂଆବର୍ଷ ପାଳନର ଉନ୍ମାଦନାରେ ଅନେକ ସମୟରେ ଯୁବପିଢ଼ି ନିଶାସକ୍ତ ହୋଇ ଗାଡ଼ିଚାଳନା କରୁଛନ୍ତି । ତେଣୁ ଏହି ସମୟରେ ଦୁର୍ଘଟଣା ରୋକିବାକୁ ଜିରା ଆୱାର ଯାଞ୍ଚ୍ ପାଇଁ ନିଷ୍ପତ୍ତି ହୋଇଛି ।
