ଭୁବନେଶ୍ୱର,୦୩/୧୧: କିଏ ହେବ ରାଜ୍ୟ କଂଗ୍ରେସ ସଭାପତି? କାହାକୁ କଲେ ଦଳ ଅଧିକ ମଜଭୁତ ହେବ । ଏଭଳି ଜଣେ ଦକ୍ଷ ପିସିସି ସଭାପତି ଚୟନ ପାଇଁ ଆସନ୍ତା ୪ ତାରିଖ (ସୋମବାର)ରେ ଓଡ଼ିଶା ଆସିବେ ଏଆଇସିସି ପର୍ଯ୍ୟବେକ୍ଷକ । ସୋମବାର ଦିନ ୧୨ଟା ବେଳକୁ କଂଗ୍ରେସ ଭବନରେ ପହଞ୍ଚିବେ ଏଆଇସିସି ପର୍ଯ୍ୟବେକ୍ଷକ ତଥା ପୂର୍ବତନ କେନ୍ଦ୍ର ମନ୍ତ୍ରୀ ଚରଣ ଦାସ ମହନ୍ତ ଓ ଛାତ୍ର କଂଗ୍ରେସର ପୂର୍ବତନ ରାଷ୍ଟ୍ରୀୟ ସଭାପତି ମିନାକ୍ଷୀ ନଟରାଜନ୍ । ଗସ୍ତ ବେଳେ ରାଜ୍ୟ ନେତାଙ୍କୁ ଭେଟିବେ । ବିଶେଷ କରି କଂଗ୍ରେସ ଭବନରେ ଉପସ୍ଥିତ ରହିବା ପାଇଁ ଓଡ଼ିଶା କଂଗ୍ରେସର ଷ୍ଟିୟରିଂ କମିଟି ସଦସ୍ୟ ଓ ବିଧାୟକଙ୍କୁ ଚିଠି ମିଳିଛି । ତେବେ ପର୍ଯ୍ୟବେକ୍ଷକଙ୍କ ଗସ୍ତ ପୂର୍ବରୁ ରାଜ୍ୟ କଂଗ୍ରେସ ମହଲରେ ସାମାନ୍ୟ ରାଜନୈତିକ ଉଷ୍ମତା ଦେଖାଯାଇଛି । ପର୍ଯ୍ୟବେକ୍ଷକଙ୍କ ଆଗରେ ନୂଆ ପିସିସି ସଭାପତି ଭାବେ ମହମ୍ମଦ ମୋକିମଙ୍କୁ ଚୟନ କରିବା ପାଇଁ ତାଙ୍କ ସମର୍ଥକମାନେ ମେଳି ବାନ୍ଧିଥିବା ଦେଖିବାକୁ ମିଳିଛି ।
ଶନିବାର ଦିନ ବେଳେ ସ୍ଥାନୀୟ ରୋଟାରୀ ଭବନରେ ଭୁବନେଶ୍ୱର ଜିଲ୍ଲା ସଭାପତି ବିଶ୍ୱଜିତ ଦାଶ ଏକ ବନ୍ଧୁମିଳନ ଆୟୋଜନ କରିଥିଲେ । ମାତ୍ର ଏହି କାର୍ଯ୍ୟକ୍ରମକୁ ବିଶ୍ୱଜିତ ମୋକିମଙ୍କୁ ଅତିଥି ଭାବେ ନିମନ୍ତ୍ରଣ କରିଥିଲେ । ମୋକିମଙ୍କ ଗସ୍ତ ବେଳେ ରାଜ୍ୟ କଂଗ୍ରେସର ବହୁ ନେତା ଉପସ୍ଥିତ ଥିଲେ । ପିସିସି ସଭାପତି ଭାବେ ଏମାନେ ମୋକିମଙ୍କୁ ଦେଖିବାକୁ ଚାହୁଁଛନ୍ତି ବୋଲି ଯୁକ୍ତି ବାଢ଼ିଥିଲେ । ତେବେ ଦୁଇ ପ୍ରଭାରୀ ନୂଆ ପିସିସି ସଭାପତି ଚୟନ ପାଇଁ ଆଲୋଚନା କରିବା ପରେ ଏଆଇସିସିକୁ କାହା ସପକ୍ଷରେ ରିପୋର୍ଟ ଦେବେ ତାହା ଗୁରୁତ୍ୱପୂର୍ଣ୍ଣ । ମାତ୍ର ଗସ୍ତ ପୂର୍ବରୁ ମୋକିମଙ୍କ ସପକ୍ଷରେ ଏକ ହାୱା ସୃଷ୍ଟି ହେଉଥିବା ବେଳେ ପୂର୍ବତନ କେନ୍ଦ୍ରମନ୍ତ୍ରୀ ଶ୍ରୀକାନ୍ତ ଜେନା, ପୂର୍ବତନ ସାଂସଦ ଭକ୍ତଚରଣ ଦାସ, ଶରତ ରାଉତ ପ୍ରମୁଖଙ୍କ ନାମ ଦୌଡ଼ରେ ଥିବା କଂଗ୍ରେସ ମହଲରେ ଚର୍ଚ୍ଚା ହେଉଛି ।
