ଯାଜପୁର, ୨୨/୦୮ : ଯାଜପୁର ସଦର ଥାନା ଅନ୍ତର୍ଗତ ଖରସ୍ରୋତା ନଦୀକୁ ଡେଇଁ ନିଖୋଜ ଥିଲେ ଛାତ୍ର। ଦୁଇ ଦିନ ପରେ ଉଦ୍ଧାର ହେଲା ମୃତଦେହ। ଖରସ୍ରୋତା ନଦୀର ଶାଖା ତନ୍ତୀ ନଦୀରୁ ଆଜି ଅଗ୍ନିଶମ ବାହିନୀ ମୃତଦେହ ଉଦ୍ଧାର କରିଛି। ଛାତ୍ରଙ୍କ ମୃତ୍ୟୁର କାରଣ ଅସ୍ପଷ୍ଟ ରହିଛି। 

ସୂଚନା ଅନୁଯାୟୀ, ଧର୍ମଶାଳା ଥାନା ଅନ୍ତର୍ଗତ ଆରୁଆ ଗ୍ରାମର ସ୍ଵୟମ୍ ସ୍ମୃତି ଶେଖର ଜେନା ନରସିଂହ ଚୌଧୁରୀ ସ୍ଵୟଂଶାସିତ ମହାବିଦ୍ୟାଳୟର BCA  ଦ୍ୱିତୀୟ ବର୍ଷର ଛାତ୍ର ଥିଲେ । ସେ ହଷ୍ଟେଲରେ ରହି ପାଠ ପଢୁଥିଲେ। ଗତ ୨୦ ତାରିଖ ରାତିରେ ସେ ଖରସ୍ରୋତା ନଦୀକୁ ଡେଇଁ ପଡ଼ି ନିଖୋଜ ଥିଲେ। ଗତକାଲି ଉଦ୍ଧାର କାର୍ଯ୍ୟରେ ତିନୋଟି ଅଗ୍ନିଶମ ବାହିନୀ ଟିମ୍ ନିୟୋଜିତ ହୋଇଥିଲେ। ଗୋଟିଏ ଓଡ୍ରାଫ୍ ଏବଂ ଦୁଇଟି ଅଗ୍ନିଶମ ଟିମ୍ ଘଟଣାସ୍ଥଳରେ ଉଦ୍ଧାର କାର୍ଯ୍ୟ ଚଳାଇଥିଲେ। ହେଲେ ଛାତ୍ରଙ୍କର କୌଣସି ପତ୍ତା ମିଳିନଥିଲା। ଆଜି ତାନ୍ତିଘାଇ ନିକଟରେ ଜଣେ ଭାସୁଥିବା ଦେଖି ସ୍ଥାନୀୟ ଲୋକେ ଖବର ଦେବା ପରେ ବାରୁଆଁ ଅଗ୍ନିଶମ କର୍ମଚାରୀ ପହଞ୍ଚି ଛାତ୍ରଙ୍କ ମୃତଦେହକୁ ଉଦ୍ଧାର କରିଥିଲେ। ତେବେ ଛାତ୍ର ଜଣଙ୍କ କାହିଁକି ନଦୀକୁ ଡେଇଁ ପଡ଼ିଲେ ତାହା ଏବେବି ସନ୍ଦେହ ଘେରରେ ରହିଛି।