ନୂଆଦିଲ୍ଲୀ,୨୬/୦୭: ରାଜସ୍ଥାନ ଝାଲାୱର ଜିଲ୍ଲାରେ ଏକ ସରକାରୀ ସ୍କୁଲ କୋଠାର କିଛି ଅଂଶ ଭୁଶୁଡ଼ି ପଡ଼ିବାରୁ ପ୍ରାୟ ୭ ଜଣ ଛାତ୍ରଛାତ୍ରୀ ପ୍ରାଣ ହରାଇଛନ୍ତି । ଅନ୍ୟ ୨୧ ଜଣ ଆହତ ହୋଇଛନ୍ତି । ସେମାନଙ୍କ ମଧ୍ୟରୁ ଗୁରୁତର ଥିବା ୨ ଜଣ ଛାତ୍ରଛାତ୍ରୀ ଆଇସିୟୁରେ ଚିକିତ୍ସିତ ହେଉଛନ୍ତି । ଏ ଅଘଟଣ କେତେ ମା କୋଳ ଖାଲି କରି ଦେଇଛି । ଭବିଷ୍ୟତ ଗଢିବାକୁ ଯାଇଥିବା ଜୀବନ କଂକ୍ରିଟ୍ ତଳେ ଚାପି ହୋଇଯାଇଛି । ଅଘଟଣକୁ ନେଇ ଏକ ବଡ଼ ତଥ୍ୟ ସାମ୍ନାକୁ ଆସିଛି । ଛାତରେ ଫାଟ ନେଇ ପିଲାମାନେ ଶିକ୍ଷକଙ୍କୁ କହିଥିଲେ । ହେଲେ ଶିକ୍ଷକଙ୍କ ଅଣଦେଖାଇ ପାଇଁ ନୀରିହ ଜୀବନ ଚାଲିଯାଇଥିବା ଅଭିଯୋଗ ହୋଇଛି ।
ମନୋହର ଥାନା ଅଞ୍ଚଳରେ ଥିବା ପିପଲୋଦି ଉଚ୍ଚ ପ୍ରାଥମିକ ସ୍କୁଲରେ ଏହି ଅଘଟଣ ଘଟିଥିଲା । ଏହା ଦେଶକୁ ଏକ ଝଟକା ଦେଇଛି । ଛାତ୍ରଛାତ୍ରୀମାନ ସ୍କୁଲର ଏକ କ୍ଲାସରୁମ୍ରେ ବସିଥିବାବେଳେ ଜୋରଦାର ଧମାକା ସହ ସେହି କୋଠରୀର ଛାତର କିଛି ଅଂଶ ଭୁଶୁଡି଼ ପଡି଼ଥିଲା । ଏଥିସହ ଧ୍ୱଂସାବଶେଷ ତଳେ ଦବି ଯାଇଥିଲେ ୩୫ ଜଣ ଛାତ୍ରଛାତ୍ରୀ । ଗ୍ରାମବାସୀମାନେ ତତ୍କାଳ ଧ୍ୱଂସାବଶେଷ ତଳୁ ପିଲାମାନଙ୍କୁ ଉଦ୍ଧାର କରିଥିଲେ । ସେତେବେଳକୁ ୫ ଜଣ ପିଲାଙ୍କର ମୃତ୍ୟୁ ଘଟିସାରିଥିଲା । ଅନ୍ୟ ୨ ଜଣ ଚିକିତ୍ସାଧୀନ ଅବସ୍ଥାରେ ପ୍ରାଣ ହରାଇଥିଲେ ।
ଅଘଟଣ ପରେ କିଛି ପିଲା କହିଛନ୍ତି, ''ଛାତରେ ଫାଟ ସହିତ ଖଣ୍ଡ ଖଣ୍ଡ ପଥର ଖସୁଥିବା ସାର୍ଙ୍କୁ କହିଥିଲୁ । ହେଲେ କେହି ଶୁଣିନଥିଲେ । ଛାତ ଭୁଶୁଡ଼ିବାର କିଛି ସମୟ ପୂର୍ବରୁ ବି ଶିକ୍ଷକଙ୍କୁ ଏ ନେଇ ଅବଗତ କରାଯାଇଥିଲା ହେଲେ କେହି ଶୁଣିନଥିଲେ । ପ୍ରାର୍ଥନା ପାଇଁ କ୍ଲାସରେ ବସିଥିଲୁ । ସାର୍ ମାନେ ଜଳଖିଆ ଖାଉଥିଲେ । ସେହି ସମୟରେ ଛାତରୁ ପଥର ଖସିଥିଲା । ଆମେ ସାର୍ଙ୍କୁ କହିଥିଲୁ ହେଲେ ସେ ଆମକୁ ଗାଳି ଦେଇ କ୍ଲାସରେ ବସିବାକୁ କହିଥିଲେ ।''
୫ ଶିକ୍ଷକ ନିଲମ୍ବିତ- ସ୍କୁଲଟି ଜର୍ଜର ଅବସ୍ଥାରେ ଥିବା ଓ ପୂର୍ବରୁ ସେଥିନେଇ ଅନେକ ଥର ଅଭିଯୋଗ କରିଥିଲେ ସ୍ଥାନୀୟ ଲୋକ । ହେଲେ କୌଣସି ପଦକ୍ଷେପ ନିଆଯାଇଥିଲା । ଜିଲ୍ଲାପାଳ ଅଜୟ ସିଂହ ରାଠୋର କହିଛନ୍ତି, ବିଗତ କିଛି ଦିନ ହେଲା ଜାରି ଲଗାଣ ବର୍ଷାକୁ ଦୃଷ୍ଟିରେ ରଖି ସ୍କୁଲ ଶିକ୍ଷା ବିଭାଗ ଜରାଜୀର୍ଣ୍ଣ ଅବସ୍ଥାରେ ଚାଲୁଥିବା ସ୍କୁଲଗୁଡ଼ିକର ଛୁଟି ଲାଗି ନିର୍ଦ୍ଦେଶ ଦେଇଥିଲା । କିନ୍ତୁ ଏହି ସ୍କୁଲ ସେହି ତାଲିକାରେ ନଥିଲା । ଏପରିସ୍ଥଳେ ସ୍କୁଲ ବିଲ୍ଡିଂ ଭୁଶୁଡ଼ିବାର କାରଣ ସଂପର୍କରେ ତଦନ୍ତ କରାଯିବ । ଦୋଷୀଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ । ଘଟଣାରେ ୫ ଜଣ ଶିକ୍ଷକଙ୍କୁ ନିଲମ୍ବନ କରାଯାଇଛି ।
