ନୂଆଦିଲ୍ଲୀ: ନ୍ୟାସନାଲ କାଉନସିଲ ଅଫ ଏଜୁକେସନାଲ ରିସର୍ଚ ଆଣ୍ଡ ଟ୍ରେନିଂ (NCERT) ଭାରତର ବିଭାଜନ ଉପରେ ଏକ ନୂତନ ଅଧ୍ୟୟନ ମଡ୍ୟୁଲ ପ୍ରସ୍ତୁତ କରିଛି। ଯାହା ଛାତ୍ରଛାତ୍ରୀଙ୍କୁ ଏହି ଐତିହାସିକ ଘଟଣାର ଗଭୀର ଅନୁଧ୍ୟାନ ପାଇଁ ସୁଯୋଗ ପ୍ରଦାନ କରିବ। ଏହି ମଡ୍ୟୁଲ ଭାରତର ସ୍ୱାଧୀନତା ସଂଗ୍ରାମ ଏବଂ ୧୯୪୭ ମସିହାରେ ହୋଇଥିବା ଦେଶ ବିଭାଜନର ସାମାଜିକ, ରାଜନୈତିକ ଓ ମାନବୀୟ ଦିଗଗୁଡ଼ିକୁ ଗଭୀରଭାବେ ବିଶ୍ଲେଷଣ କରି ପ୍ରସ୍ତୁତ କରାଯାଇଛି ବୋଲି ବିଭାଗ ଦାବି କରିଛି।

ଏହି ମଡ୍ୟୁଲରେ ବିଭାଜନ ଯୋଗୁଁ ଲକ୍ଷ ଲକ୍ଷ ଲୋକଙ୍କର ସ୍ଥାନାନ୍ତରଣ, ସାମ୍ପ୍ରଦାୟିକ ହିଂସା ଏବଂ ଏହାର ଦୀର୍ଘକାଳୀନ ପ୍ରଭାବ ଉପରେ ଆଲୋକପାତ କରାଯାଇଛି। ଏହା ସହିତ, ବିଭାଜନର କାରଣ, ବ୍ରିଟିଶ ଔପନିବେଶିକ ନୀତିର ଭୂମିକା ଏବଂ ଏହାର ପରିଣାମରେ ଭାରତ ଓ ପାକିସ୍ତାନ ମଧ୍ୟରେ ସୃଷ୍ଟି ହୋଇଥିବା ରାଜନୈତିକ ସୀମାରେଖା ଉପରେ ମଧ୍ୟ ଆଲୋଚନା କରାଯାଇଛି। 

ତେବେ ଏହି ମଡ୍ୟୁଲରେ ବିଭାଜନ ପାଇଁ ମହମ୍ମଦ ଅଲ୍ଲୀ ଜୀନା, କଂଗ୍ରେସ ଓ ଲର୍ଡ ମାଉଣ୍ଟବ୍ୟାଟେନଙ୍କର ହାତ ରହିଥିଲା ବୋଲି ତଥ୍ୟ ପ୍ରକାଶ କରାଯାଇଛି। ବିଭାଜନ ପାଇଁ ଜୀନା ଦାବି କରିଥିଲେ, କଂଗ୍ରେସ ଏହାକୁ ଗ୍ରହଣ କରିଥିଲା ଓ ମାଉଣ୍ଟବ୍ୟାଟେନ୍ ଏହାକୁ କାର୍ଯ୍ୟକାରୀ କରିଥିଲେ ବୋଲି ଏହି ମଡ୍ୟୁଲରେ ଉଲ୍ଲେଖ ରହିଛି। ଏହା ସହିତ ୧୯୪୭ ମସିହାରେ ଜୱାହାରଲାଲ ନେହରୁଙ୍କ ଦ୍ୱାରା ଦିଆଯାଇଥିବା ଏକ ଭାଷଣ ମଧ୍ୟ ରହିଛି। ଯେଉଁଥିରେ ସେ କହିଛନ୍ତି ଯେ “ଆମେ ଆସି ଏମିତି ଏକ ସ୍ଥାନରେ ପହଞ୍ଚିଛୁ, ଯେଉଁଠି ଆମକୁ ବିଭାଜନକୁ ଗ୍ରହଣ କରିବାକୁ ପଡିବ ନଚେତ୍ ହିଂସାର ସାମ୍ନା କରିବାକୁ ପଡିବ। ଏକତାର ମୂଲ୍ୟ ଯାହା ହେଉନା କାହିଁକି, ଗୃହଯୁଦ୍ଧର ମୂଲ୍ୟ ଅସୀମ ଭାବରେ ଅଧିକ ହେବ।””

NCERTର ଏହି ପଦକ୍ଷେପର ଲକ୍ଷ୍ୟ ହେଉଛି ଛାତ୍ରଛାତ୍ରୀଙ୍କୁ ଏକ ସମୃଦ୍ଧ ଓ ବସ୍ତୁନିଷ୍ଠ ଇତିହାସ ସମ୍ୱଦ୍ଧରେ ଶିକ୍ଷା ପ୍ରଦାନ କରିବା। ଯାହା ସେମାନଙ୍କୁ ବିଭାଜନର ଜଟିଳତା ଏବଂ ଏହାର ସାମାଜିକ ପ୍ରଭାବକୁ ବୁଝିବାରେ ସାହାଯ୍ୟ କରିବ। ଏହି ମଡ୍ୟୁଲଟି ସ୍କୁଲ ପାଠ୍ୟକ୍ରମରେ ସାମିଲ ହେବ ଏବଂ ଶିକ୍ଷକମାନଙ୍କୁ ଏହାକୁ ପାଠଦାନ କରିବା ପାଇଁ ପ୍ରଶିକ୍ଷଣ ମଧ୍ୟ ପ୍ରଦାନ କରାଯିବ। 

ଏହି ମଡ୍ୟୁଲର ପ୍ରଥମ ଖଣ୍ଡ ଷଷ୍ଠରୁ ଅଷ୍ଟମ ଶ୍ରେଣୀ ଛୁଆଙ୍କ ପାଇଁ ଡିଜାଇନ କରାଯାଇଥିବା ବେଳେ ଆଉ ଏକ ଖଣ୍ଡ  ନବମରୁ ଦ୍ୱାଦଶ ଶ୍ରେଣୀ ଛୁଆ ମାନଙ୍କ ନିମନ୍ତେ ଡିଜାଇନ କରାଯାଇଛି। ଏହି ଉଦ୍ୟମ ଭାରତର ଇତିହାସର ଏକ ଗୁରୁତ୍ୱପୂର୍ଣ୍ଣ ଅଧ୍ୟାୟକୁ ନୂତନ ପିଢ଼ିଙ୍କ ମଧ୍ୟରେ ପହଞ୍ଚାଇବାରେ ଏକ ମହତ୍ତ୍ୱପୂର୍ଣ୍ଣ ପଦକ୍ଷେପ ବୋଲି ବିବେଚନା କରାଯାଉଛି।