ଭୁବନେଶ୍ଵର,୪/୯ : ସୁଭଦ୍ରା ହିତାଧିକାରୀଙ୍କୁ ନେଇ ବଡ଼ ଖୋଳତାଡ଼ ଆରମ୍ଭ । କଟିଥିବା ହିତାଧିକାରୀଙ୍କୁ ସାମିଲ୍ ପାଇଁ ବଡ଼ ପଦକ୍ଷେପ ନେବାକୁ ଯାଉଛନ୍ତି ରାଜ୍ୟ ସରକାର। ଯୋଗ୍ୟଙ୍କୁ ସାମିଲ୍ ଏବଂ ଅଯୋଗ୍ୟଙ୍କୁ ବାଦ୍ ଦେବାକୁ ତତ୍ପରତା ପ୍ରକାଶ ପାଇଛି । ମହିଳା ଓ ଶିଶୁ ବିକାଶ ବିଭାଗ ପକ୍ଷରୁ ଏ ନେଇ ଚିଠି ଦିଆଯାଇଛି ।
ସୂଚନା ଅନୁଯାୟୀ, ଚାରି ଚକିଆ ଥିବା ହିତାଧିକାରୀଙ୍କ ତଥ୍ୟ ପାଇଁ ପରିବହନ ବିଭାଗକୁ ଚିଠି ଲେଖା ହୋଇଛି । ଏହା ସହ ଖାଦ୍ୟ ଯୋଗାଣ ବିଭାଗକୁ ମୃତ ହିତାଧିକାରୀଙ୍କ ତଥ୍ୟ ଦେବାକୁ ନିର୍ଦ୍ଦେଶ ଦିଆଯାଇଛି । ପଞ୍ଜୀକରଣ କରି ଧାନ ବିକିଥିବା ମହିଳାଙ୍କ ତଥ୍ୟକୁ ଆଉ ଥରେ ଯାଞ୍ଚ କରିବାକୁ ନିର୍ଦ୍ଦେଶ ଦିଆଯାଇଛି । ତଥ୍ୟ ମିଳିବା ପରେ ଯୋଗ୍ୟ ହିତାଧିକାରୀଙ୍କୁ ସାମିଲ୍ କରାଯିବ ।
ସୂଚନାଯୋଗ୍ୟ ଯେ, ସୁଭଦ୍ରା ଯୋଜନାରେ ରାଜ୍ୟର ପାଖାପାଖି ଏକ କୋଟି ମହିଳା ହିତାଧିକାରୀ ତୃତୀୟ କିସ୍ତିର ଟଙ୍କା ପାଇଛନ୍ତି । ତେବେ ତୃତୀୟ କିସ୍ତି ସମୟରେ ବି ଅନେକ ହିତାଧିକାରୀ ବାଦ୍ ପଡ଼ିଥିବା ଦେଖିବାକୁ ମିଳିଥିଲା । ଏପରିକି ଯେଉଁମାନେ ପ୍ରଥମ ଦୁଇଟି କିସ୍ତିର ଟଙ୍କା ପାଇଛନ୍ତି ସେମାନଙ୍କ ମଧ୍ୟରୁ ତୃତୀୟ କିସ୍ତିରେ ସୁଭଦ୍ରା ଟଙ୍କା ପାଇ ନ ଥିଲେ । ଏ ନେଇ ଅସନ୍ତୋଷ ମଧ୍ୟ ପ୍ରକାଶ ପାଇଥିଲା । ରାଜ୍ୟ ସରକାରଙ୍କ ପକ୍ଷରୁ ଏ ନେଇ କୁହାଯାଇଥିଲା ଯେ, ମଣ୍ଡିରେ ଧାନ ବିକ୍ରି କରୁଥିବା କିଛି ହିତାଧିକାରୀ ବାଦ୍ ପଡ଼ିଛନ୍ତି । ତେବେ ଏବେ ସରକାରଙ୍କ ପକ୍ଷରୁ ପୁଣି ଥରେ ସମୀକ୍ଷା କରାଯାଇ ଯୋଗ୍ୟ ହିତାଧିକାରୀଙ୍କୁ ସୁଭଦ୍ରାରେ ସାମିଲ୍ କରାଯିବ।
