ଭୁବନେଶ୍ୱର ୦୫/୦୬: ଶୁକ୍ଳପକ୍ଷ ଦଶମୀ ତିଥିରେ ଗୁରୁବାର ପଡ଼ିଲେ ସେହିଦିନକୁ ଓଡ଼ିଆ ଘରେ ସୁଦଶା ବ୍ରତ ଭାବେ ପାଳନ କରାଯାଇଥାଏ। ଘରେ ଶୁଖ, ଶାନ୍ତି, ଧନଧାନ୍ୟ ପାଇଁ ମୁଖ୍ୟତଃ ସଧବା ମହିଳାମାନେ ମହାଲକ୍ଷ୍ମୀଙ୍କ ଉଦ୍ଦେଶ୍ୟରେ ସୁଦଶା ବ୍ରତ ପାଳନ କରିଥାନ୍ତି । ଏହି ଦିନ ଭୋରୁ ମହିଳାମାନେ ଉଠି ଝୋଟିଚିତା ପକାଇଥାନ୍ତି । ବିଶେଷକରି ଝୋଟିରେ ପଦ୍ମଫୁଲ ଓ ଲକ୍ଷ୍ମୀ ପାଦ ନିହାତି ରହିଥାଏ । ଏହି ପୂଜାରେ ମୁଖ୍ୟତଃ ଦଶପ୍ରକାର ଜିନିଷ ଲାଗି ହୋଇଥାଏ ।
ଯଥା- ଦଶ ପ୍ରକାର ଫୁଲ, ଦଶ ପ୍ରକାର ଫଳ, ଦଶଟି ମଣ୍ଡା, ଦଶକେରା ଦୁବ । ଘରେ ଯଦି ମା’ ଲକ୍ଷ୍ମୀଙ୍କ ପିତଳ ମୂର୍ତ୍ତିଥାଏ, କେହି କେହି ତାହାକୁ ପୂଜା କରନ୍ତି । ନହେଲେ ଲକ୍ଷ୍ମୀ ନାରାୟଣ ଥିବା ଫଟୋକୁ ଖଟୁଲିରେ ରଖି ସୁଦଶା ବ୍ରତ କରିଥାନ୍ତି । କେତେକ ମହିଳା ଗୁଆ ଓ ଘଟ ସ୍ଥାପନ କରି ମଧ୍ୟ ପୂଜା କରିଥାନ୍ତି । ଏହି ପୂଜାରେ ପିନ୍ଧାଯାଉଥିବା ବ୍ରତରେ ମଧ୍ୟ ୧୦ଟି ଗଣ୍ଠି ପଡ଼ିଥାଏ । ଯାହାକୁ ପୂଜା କରି ମହିଳାମାନେ ପିନ୍ଧିଥାନ୍ତି ।
