କେନ୍ଦ୍ରାପଡ଼ା, ୫।୬ ; ପବିତ୍ର ସୁଦଶା ବ୍ରତ ଅବସରରେ ଗୁରୁବାର କେନ୍ଦ୍ରାପଡ଼ାର ଶ୍ରୀବଳଦେବଜୀଉ ମନ୍ଦିରରେ ବ୍ରତଧାରୀଙ୍କ ଭିଡ଼ ହୋଇଥିଲା। ମନ୍ଦିର ବେଢ଼ାର ଉତ୍ତର ଦିଗରେ ଥିବା ମହାଲକ୍ଷ୍ମୀ ମନ୍ଦିରରେ ବ୍ରତଧାରୀ ମା'ଙ୍କ ଦର୍ଶନ କରିବା ସହ ବ୍ରତ, ଧୂପଦୀପ, ପ୍ରସାଦ ଅର୍ପଣ କରିଥିଲେ। ନିଜ ପରିବାର ପାଇଁ ସୁଖ ସମୃଦ୍ଧି ପ୍ରାପ୍ତ ନିମନ୍ତେ ମା' ଙ୍କ ନିକଟରେ ଆଶିଷ ଭିକ୍ଷା କରିଥିଲେ।
ଯେ କୌଣସି ଓଡ଼ିଆ ମାସର ଶୁକ୍ଳପକ୍ଷ ଗୁରୁବାରରେ ଦଶମୀ ତିଥି ରହିଲେ ଏହି ଦିନକୁ ସୁଦଶା ବ୍ରତ ରୂପେ ବିବେଚନା କରାଯାଏ। ମହାଲକ୍ଷ୍ମୀଙ୍କର ଏହା ଅତ୍ୟନ୍ତ ପ୍ରିୟ ଦିନ ହୋଇଥାଏ। ଆଜି ଜ୍ୟେଷ୍ଠ ମାସ ଶୁକ୍ଳ ପକ୍ଷ ଗୁରୁବାର ଦଶମୀ ତିଥି ଥିବାରୁ ବ୍ରତଧାରୀଙ୍କ ଭିଡ଼ ହୋଇଥିଲା। ଘରର ଗୃହିଣୀମାନେ ଏହି ବ୍ରତ ପାଳନ କଲେ ଘରର ସମସ୍ତଙ୍କ ଗ୍ରହଦଶା କଟିବା ସହ ଦୀର୍ଘାୟୁ ହୋଇଥାନ୍ତି ବୋଲି ବିଶ୍ୱାସ ରହିଛି।
