ନୂଆଦିଲ୍ଲୀ,୧୬।୧୧: ଶିରୋମଣି ଅକାଳୀ ଦଳରେ ଦୀର୍ଘ ସମୟ ଧରି ଚାଲିଥିବା ବିବାଦକୁ ନେଇ ଚର୍ଚ୍ଚା ଜାରି ରହିଥିଲା। ଏବେ ଦଳର ଅଧ୍ୟକ୍ଷ ପଦରୁ ଇସ୍ତଫା ଦେଇଛନ୍ତି ପାର୍ଟି ମୁଖ୍ୟ ସୁଖବୀର ସିଂହ ବାଦଲ। ସେ ନିଜର ଇସ୍ତଫା ପତ୍ର ଦଳୀୟ କାର୍ଯ୍ୟକାରିଣୀ କମିଟିକୁ ପ୍ରଦାନ କରିଛନ୍ତି। ବାଦଲ ନିଜ ନେତୃତ୍ବ ସମୟରେ ମିଳିଥିବା ସମର୍ଥନ ପାଇଁ ପାର୍ଟି ନେତା ଓ କର୍ମୀଙ୍କୁ ଧନ୍ୟବାଦ ବ୍ୟକ୍ତ କରିଛନ୍ତି।

ସୁଖବୀର ସିଂହ ବାଦଲଙ୍କ ନେତୃତ୍ବକୁ ନେଇ ଦୀର୍ଘ ସମୟ ଧରି ଅସନ୍ତୋଷ ଦେଖିବାକୁ ମିଳିଥିଲା। ବହୁ ଦଳର ନେତାମାନେ ଅଭିଯୋଗ କରିଥିଲେ ଯେ, ତାଙ୍କ ନେତୃତ୍ବରେ ପାର୍ଟି ନିଜର ମୂଳ ଉଦ୍ଦେଶ୍ୟକୁ ଭୁଲି ଯାଇଛି। ଅକାଳ ତଖତ ସାହିବରେ ମଧ୍ୟ ତାଙ୍କ ବିରୋଧରେ ଅଭିଯୋଗ ଦାଖଲ କରାଯାଇଥିଲା। ଜ୍ଞାନୀ ରଘୁବୀର ସିଂହ ଶିରୋମଣି ଅକାଳୀ ଦଳର ଦୁର୍ବଳ ହେଉଥିବା ସଂଗଠନ ଓ ଏହାର ଉଦ୍ଦେଶ୍ୟକୁ ଭୁଲି ଯାଇଥିବା ନେଇ ପ୍ରଶ୍ନ ଉଠାଇଥିଲେ।

ଦଳର ବରିଷ୍ଠ ନେତା ଓ ପୂର୍ବତନ ସାଂସଦ ପ୍ରେମ ସିଂହ ଚନ୍ଦୁମାଜରା କହିଛନ୍ତି, ପଞ୍ଜାବର ସ୍ଥିତି ଖରାପ ରହିଛି। ଆମର ଯୁବକପୀଢି ଜେଲ୍‌ରେ ଅଛନ୍ତି, କୃଷି ସଙ୍କଟଜନକ ସ୍ଥିତି ଓ ଚଣ୍ଡୀଗଡର ଭାଗ ହରିୟାଣାକୁ ଦିଆଯାଉଛି। ଦଳକୁ ମଜବୁତ କରିବା ପାଇଁ ଏହି ପରିବର୍ତ୍ତନ ଜରୁରୀ। ସୁଖବୀର ବାଦଲଙ୍କ ଇସ୍ତଫା ପରେ ଏବେ ଶିରୋମଣି ଅକାଳୀ ଦଳକୁ ନିଜର ହରାଇଥିବା ଶକ୍ତି ପାଇବାର ସୁଯୋଗ ମିଳିବ।’