ନୂଆଦିଲ୍ଲୀ: ରାଜଧାନୀ ଦିଲ୍ଲୀରେ ପ୍ରଦୂଷଣର ମାତ୍ରା କମିଛି । ଫଳରେ ଗ୍ରାପ୍-୪ କଟକଣା କୋହଳ କରିବା ଲାଗି ସୁପ୍ରିମକୋର୍ଟ ଅନୁମତି ଦେଇଛନ୍ତି । ଦିଲ୍ଲୀରେ ପ୍ରଦୂଷଣର ମାତ୍ରା ସବୁ ସୀମା ଟପିଯିବା ପରେ ଗ୍ରାପ-୪ କଟକଣା ଲାଗୁ ହୋଇଥିଲା । ଏଥିରେ କୋହଳ କରିବା ଲାଗି ବାରମ୍ବାର ଅପିଲ୍ ହୋଇଥିଲେ ହେଁ ସୁପ୍ରିମକୋର୍ଟ ରାଜି ହୋଇନଥିଲେ । କିନ୍ତୁ ଗୁରୁବାର କଟକଣା କୋହଳ କରିବାକୁ ଅନୁମତି ଦେଇଛନ୍ତି ସର୍ବୋଚ୍ଚ ଅଦାଲତ ।
ଦିଲ୍ଲୀରେ ଏୟାର କ୍ବାଲିଟି ଇଣ୍ଡେକ୍ସ (ଏକ୍ୟୁଆଇ)ରେ ସୁଧାର ଆସିଥିବା ଜଣାପଡ଼ିଛି । କଟକଣା କୋହଳ ହେବା ପରେ ରାଜ୍ୟରେ ବନ୍ଦ ପଡ଼ିଥିବା ନିର୍ମାଣ କାର୍ଯ୍ୟ ପୁଣି ଥରେ ଆରମ୍ଭ ହୋଇପାରେ । ଏହା ସହ ରାଜ୍ୟକୁ ଟ୍ରକ୍ ପ୍ରବେଶ ଉପରେ ଥିବା ବ୍ୟାନକୁ ସରକାର ହଟାଇପାରନ୍ତି । ସେପଟେ ଛାତ୍ରଛାତ୍ରୀ ସ୍କୁଲ୍ ଓ କଲେଜ୍କୁ ଯାଇ ପଢ଼ିପାରିବେ ।
ଦୀର୍ଘ ୫୦ ଦିନ ପରେ ଗ୍ରାପ୍-୪ ପ୍ରତ୍ୟାହାର ହେବାକୁ ଯାଉଛି। ଅନେକ ଦିନ ପରେ ବୁଧବାର ଦିଲ୍ଲୀବାସୀ ଶ୍ବାସକ୍ରିୟାରେ ସ୍ବଚ୍ଛ ବାୟୁ ଗ୍ରହଣ କରିଛନ୍ତି । ୨୪ ଘଣ୍ଟା ହେଲା ଦିଲ୍ଲୀରେ ଏକ୍ୟୁଆଇ ୧୭୮ ରହିଛି । ଏହା ପୂର୍ବରୁ ଅକ୍ଟୋବର ୧୫ରେ ବାୟୁର ମାନ ଭଲ ସ୍ତରକୁ ଆସିଥିଲା କିନ୍ତୁ ତାପରଦିନ ପୁଣି ଜହର ପାଲଟିଯାଇଥିଲା ଦିଲ୍ଲୀର ବାୟୁ ।
