ନୂଆଦିଲ୍ଲୀ: ଦିଲ୍ଲୀର ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜ୍ରିଓ୍ବାଲଙ୍କୁ ଝଟକା ଦେଇଛନ୍ତି ସୁପ୍ରିମକୋର୍ଟ । ଗୁଜରାଟ ବିଶ୍ବବିଦ୍ୟାଳ (ଜିୟୁ) ପକ୍ଷରୁ ହୋଇଥିବା ମାମଲା ଉପରେ ରୋକ ଲଗାଇବାକୁ ମନା କରିଦେଇଛନ୍ତି ସର୍ବୋଚ୍ଚ ଅଦାଲତ । ଏବେ କେଜ୍ରିଓ୍ବାଲ ଗୁଜରାଟର ତଳକୋର୍ଟରେ ହାଜର ହେବେ ଏବଂ ମକଦ୍ଦମା ଲଢ଼ିବେ । ପ୍ରଧାନମନ୍ତ୍ରୀ ମୋଦୀଙ୍କ ଡିଗ୍ରିକୁ ନେଇ ଆପ୍ ନେତା ସଂଜୟ ସିଂହ ଏବଂ ଅରବିନ୍ଦ କେଜ୍ରିଓ୍ବାଲ ଗୁଜରାଟ ବିଶ୍ବବିଦ୍ୟାଳୟ ସଂକର୍କରେ ବିବାଦୀୟ ଟିପ୍ପଣୀ ଦେଇଥିଲେ । ଏହା ପରେ ବିଶ୍ବବିଦ୍ୟାଳୟ ପକ୍ଷରୁ ଦୁଇ ନେତାଙ୍କ ବିରୋଧରେ ମାନହାନୀ ମକଦ୍ଦମା କରାଯାଇଥିଲା ।
କେଜ୍ରିଓ୍ବାଲଙ୍କ ପୂର୍ବରୁ ଏପ୍ରିଲରେ ମକଦ୍ଦମା ରଦ୍ଦ କରିବା ନେଇ ସଂଜୟ ସିଂହଙ୍କ ଆବେଦନକୁ ସୁପ୍ରିମକୋର୍ଟ ଖାରଜ କରିଦେଇଥିଲେ । ସେପଟେ ତଳକୋର୍ଟଙ୍କ ସମନ ରଦ୍ଦ କରିବାକୁ କେଜ୍ରିଓ୍ବାଲ ଗୁଜରାଟ ହାଇକୋର୍ଟରେ ଆବେଦନ କରିଥିଲେ । କିନ୍ତୁ ଉଚ୍ଚ ନ୍ୟାୟାଳୟ କେଜ୍ରିଓ୍ବାଲଙ୍କ ଆବେଦନ ଖାରଜ କରିଦେଇଥିଲେ । ଗୁଜରାଟ ବିଶ୍ବବିଦ୍ୟାଳୟର ରେଜିଷ୍ଟ୍ରାର ମକଦ୍ଦମା କରିଥିବାରୁ ଏଥିରେ ସେ ଜଣେ ପୀଡ଼ିତ ନୁହଁନ୍ତି ବୋଲି କେଜ୍ରିଓ୍ବାଲଙ୍କ ପକ୍ଷରୁ ସୁପ୍ରିମକୋର୍ଟରେ କୁହାଯାଇଥିଲା । କିନ୍ତୁ ଜଷ୍ଟିସ୍ ଋଷିକେଶ ରାୟ ଏବଂ ଏସଭିଏନ୍ ଭଟ୍ଟିଙ୍କ ଖଣ୍ଡପୀଠ କେଜ୍ରିଓ୍ବାଲଙ୍କ ଦାବିକୁ ସ୍ବୀକାର କରିନାହାନ୍ତି ।
ଆଜି (ସୋମବାର) କେଜ୍ରିଓ୍ବାଲଙ୍କ ଓକିଲ ଅଭିଷେକ ମନୁ ସିଂଘଭୀ ସୁପ୍ରିମକୋର୍ଟରେ କ୍ଷମା ପ୍ରାର୍ଥନା କରିବା ସହ ମାମଲାକୁ ରଦ୍ଦ କରିବାକୁ ଆବେଦନ କରିଥିଲେ । ସେପଟେ ବିଶ୍ବବିଦ୍ୟାଳୟ ପକ୍ଷର ଓକିଲ ତୁଷାର ମେହେଟା ମାମଲା ରଦ୍ଦ ଆବେଦନକୁ ବିରୋଧ କରିଥିଲେ । କୌଣସି ବ୍ୟକ୍ତିଙ୍କ ବିରୋଧରେ ଅଭିଯୋଗ ଲଗାଇବା ପରେ କୋର୍ଟରେ କ୍ଷମା ମାଗିବା କେଜ୍ରିଓ୍ବାଲଙ୍କ ଏକ ନିତିଗତ ଅଭ୍ୟାସ ବୋଲି କହିଥିଲେ ତୁଷାର ମେହେଟା । ଏମିତି ସେ ଅନେକ ଥର କରିଛନ୍ତି । ତେଣୁ ଏଥର ତାଙ୍କ ଆବେଦନକୁ ମଞ୍ଜୁରି ନମିଳିବା ଦରକାର ବୋଲି ତୁଷାର ମେହେଟା ସୁପ୍ରିମକୋର୍ଟରେ କହିଥିଲେ ।
