ନୂଆଦିଲ୍ଲୀ,୨୭/୦୩ : ରାସ୍ତା, କୋଠା ତିଆରି କରିବାକୁ ଜଙ୍ଗଲ ନଷ୍ଟ କରାଯାଉଛି । ଶହ ଶହ ଗଛ କାଟି ଦିଆଯାଉଛି । ଫଳରେ ପରିବେଶ ସନ୍ତୁଳନ ହରାଉଛି । ଏହାକୁ ନେଇ ଉଦ୍ବେଗ ପ୍ରକାଶ କରିଛନ୍ତି ସୁପ୍ରିମକୋର୍ଟ । ଗଛ କାଟିବା ମଣିଷ ମାରିବାଠୁ ବି ଜଘନ୍ୟ । ପରିବେଶକୁ କ୍ଷତି ପହଞ୍ଚାଉଥିବା ଲୋକଙ୍କୁ କୌଣସି ପ୍ରକାର ଦୟା ଦେଖାଇବା ଉଚିତ୍ ନୁହେଁ ବୋଲି କହିଛନ୍ତି ସର୍ବୋଚ୍ଚ ନ୍ୟାୟାଳୟ । ଏହା ସହିତ ତାଜମହଲ ନିକଟରୁ କଟାଯାଇଥିବା ପ୍ରତି ଗଛ ବାବଦକୁ ୧ ଲକ୍ଷ ଟଙ୍କା ଲେଖାଏଁ ଜରିମାନା ଦେବାକୁ ଜଣେ ବ୍ୟକ୍ତିଙ୍କୁ ଆଦେଶ ଦେଇଛନ୍ତି ।
ଜଷ୍ଟିସ୍ ଅଭୟ ଏସ୍ ଓକା ଓ ଉଜ୍ଜାଲା ଭୂୟାଁଙ୍କ ଗଠିତ ଖଣ୍ଡପୀଠ ସ୍ପଷ୍ଟ କରିଛନ୍ତି ଯେ, ''ସମ୍ପୃକ୍ତ କର୍ତ୍ତୃପକ୍ଷ ଓ ଅନୁଷ୍ଠାନର ଅନୁମତି ବିନା କୌଣସି ବ୍ୟକ୍ତି ଗଛ କାଟି ପାରିବେ ନାହିଁ । ଗଛ କାଟିବା ମଣିଷ ମାରିବାଠୁ ବି ଜଘନ୍ୟ । ପରିବେଶକୁ କ୍ଷତି ପହଞ୍ଚାଉଥିବା ଲୋକଙ୍କୁ କୌଣସି ପ୍ରକାର ଦୟା ଦେଖାଇବା ଉଚିତ୍ ନୁହେଁ ।'' ଆଗ୍ରାର ତାଜମହଲ ପାଖାପାଖି ଅଞ୍ଚଳରୁ ବେଆଇନ ଭାବେ ପ୍ରାୟ ୪୫୪ ଗଛ କଟାଯାଇଛି । ପ୍ରତ୍ୟେକ ଗଛ ପାଇଁ ୧ ଲକ୍ଷ ଟଙ୍କା ହିସାବରେ ମୋଟ୍ ୪.୪୫ କୋଟି ଜରିମାନା ଦେବାକୁ ଆଦେଶ ଦେଇଛନ୍ତି ସୁପ୍ରିମକୋର୍ଟ । ଏହା ସହିତ ଜରିମାନା ବିରୋଧରେ ହୋଇଥିବା ଆବେଦନକୁ ଖାରଜ କରି ଦେଇଛନ୍ତି ।
ଗଛ କାଟିବାକୁ ନେଇ ଜଣେ ବ୍ୟକ୍ତିଙ୍କୁ ହୋଇଥିବା ଜରିମାନା ବିରୋଧରେ କରିଥିବା ଆବେଦନର ଶୁଣାଣି କରିଥିଲେ ସୁପ୍ରିମକୋର୍ଟ । ବରିଷ୍ଠ ଆଇନଜୀବୀ ଏଡିଏମ ରାଓଙ୍କ ପରାମର୍ଶକୁ ଖଣ୍ଡପୀଠ ଗ୍ରହଣ କରିଥିଲେ । ଆଇନ ଓ ଗଛ କାଟିବାକୁ ହାଲୁକା ଭାବେ ନିଆଯାଇ ପାରିବ ନାହିଁ ବୋଲି କହିଥିଲେ । ଏ ମାମଲାରେ କେତେ ଜରିମାନା ଆଦାୟ କରାଯିବ ସେ ନେଇ ଅଦାଲତ ଏକ ମାନଦଣ୍ଡ ସ୍ଥିର କରିବା ଆବଶ୍ୟକ ।
ଗତବର୍ଷ ତାଜମହଲ ଆଖପାଖ ଅଞ୍ଚଳରେ ୪୫୪ଟି ଗଛ କାଟିବା ପାଇଁ ଶିବ ଶଙ୍କର ଅଗ୍ରୱାଲଙ୍କୁ ଫାଇନ୍ ହୋଇଥିଲା । ପ୍ରତ୍ୟେକ ଗଛ ବାବଦରେ ୧ ଲକ୍ଷ ଟଙ୍କା ହିସାବରେ ମୋଟ ୪.୪୫ କୋଟି ଜରିମାନା ଦେବାକୁ କେନ୍ଦ୍ରୀୟ କ୍ଷମତାପ୍ରାପ୍ତ କମିଟି (ସିଇସି)ର ଆଦେଶକୁ କୋର୍ଟ ଗ୍ରହଣ କରିଛନ୍ତି । ଆବେଦନକାରୀ ଶଙ୍କର ଅଗ୍ରୱାଲଙ୍କ ପକ୍ଷରୁ ଆଇନଜୀବୀ ମୁକୁଲ ରୋହତଗୀ ଖଣ୍ଡପୀଠଙ୍କୁ କହିଥିଲେ କ୍ଲାଏଣ୍ଟ ଦୋଷ ସ୍ବୀକାର କରିଛନ୍ତି କ୍ଷମା ମାଗିଛନ୍ତି । ତାଙ୍କ ଜରିମାନା ରାଶି କମ୍ କରାଯାଉ ବୋଲି ଅନୁରୋଧ କରିଛନ୍ତି ।
