ନୂଆଦିଲ୍ଲୀ,୨୨/୦୮: ଆଇନ ବନାମ ଦୟା । ମଣିଷଙ୍କ ସୁରକ୍ଷା ଜରୁରୀ ନା ପଶୁ ପ୍ରେମ ? କୁକୁର ପ୍ରେମୀଙ୍କୁ ମିଳିବ ଆଶ୍ୱସ୍ତି ନା ଝଟକା ? ବୁଲା କୁକୁର ରାସ୍ତାରେ ରହିବେ ନା ସେଲ୍ଟର ହୋମ୍ ପଠାଇ ଦିଆଯିବ ? ଏ ପ୍ରଶ୍ନର ଆଜି ମିଳିବ ସୁପ୍ରିମ୍ ଉତ୍ତର । ଦିଲ୍ଲୀ-ଏନ୍ସିଆରରେ ବୁଲା କୁକୁରଙ୍କୁ ହଟାଇବା ପାଇଁ ସୁପ୍ରିମ୍କୋର୍ଟଙ୍କ ନିର୍ଦ୍ଦେଶ ଆବେଦନ ଉପରେ ଆଜି ୩ ଜଣିଆ ଖଣ୍ଡପୀଠ ରାୟ ଶୁଣାଇବେ ।
ଆଇନ ବନାମ ଦୟା- ଜଷ୍ଟିସ ଏନ୍ଭି ଅଞ୍ଜରିଆଙ୍କୁ ନେଇ ଗଠିକ ତିନି ଜଣିଆ ଖଣ୍ଡପୀଠ ଅଗଷ୍ଟ ୧୪ରେ ଏହି ମାମଲାର ଶୁଣାଣି କରିଥିଲେ । ରାୟ ସଂରକ୍ଷିତ ରଖିଥିଲେ । ଆଜି ଏ ମାମଲାରେ ସୁପ୍ରିମକୋର୍ଟ ଶୁଣାଣି କରିବେ । ଦିଲ୍ଲୀରେ ବୁଲା କୁକୁରଙ୍କୁ ସାମୂହିକ ଭାବେ ଧରିବା ଓ ଆଶ୍ରୟ ଦେବା ପାଇଁ ଦିଲ୍ଲୀ ମହାନଗର ନିଗମ (ଏମ୍ସିଡ଼ି) ଜାରି କରିଥିବା ବିଜ୍ଞପ୍ତିକୁ ଚ୍ୟାଲେଞ୍ଜ କରିଥିବା ଆବେଦନ ତୁରନ୍ତ ଶୁଣାଣି କରିବାକୁ ମନା କରିଛନ୍ତି କୋର୍ଟ । ଅଗଷ୍ଟ ୧୪ରୁ ହୋଇଥିବା ଶୁଣାଣି ସମୟରେ ସଲିସିଟର ଜେନେରାଲ ତୁଷାର ମେହେଟା କହିଥିଲେ ଯେ, ୨୦୨୪ ମସିହାରେ ପ୍ରାୟ ୩୭.୧୫ ଲକ୍ଷ କୁକୁର କାମୁଡ଼ା ମାମଲା ପଞ୍ଜିକୃତ ହୋଇଥିଲା, ଅର୍ଥାତ୍ ପ୍ରତିଦିନ ପ୍ରାୟ ୧୦ ହଜାର ମାମଲା ସାମ୍ନାକୁ ଆସୁଛି ।
ଗତ ଅଗଷ୍ଟ ୧୧ ତାରିଖରେ ଜାରି ହୋଇଥିବା ଆଦେଶରେ ପୌର କର୍ତ୍ତୃପକ୍ଷଙ୍କୁ ନିର୍ଦ୍ଦେଶ ଦିଆଯାଇଥିଲା ଯେ, ଦିଲ୍ଲୀରୁ ବୁଲା କୁକୁରଙ୍କୁ ଧରିବା ଆରମ୍ଭ କରନ୍ତୁ ଏବଂ ୮ ସପ୍ତାହ ମଧ୍ୟରେ ଅତି କମ୍ରେ ୫,୦୦୦ ପଶୁଙ୍କ ପାଇଁ ଆଶ୍ରୟସ୍ଥଳୀ ନିର୍ମାଣ କରନ୍ତୁ । ଏହି ନିର୍ଦ୍ଦେଶନାମା ବିବାଦୀୟ ହୋଇଥିଲା । କୁକୁର ପ୍ରେମୀ ଏହାକୁ ବିରୋଧ କରିଥିଲେ । କୋର୍ଟ ଦେଇଥିବା ନିଷ୍ପତ୍ତିକୁ ବିରୋଧ କରାଯାଇଥିଲା । ପଶୁପ୍ରେମୀମାନେ ଦିଲ୍ଲୀର ଇଣ୍ଡିଆ ଗେଟ୍ଠାରେ କୋର୍ଟର ଏହି ନିଷ୍ପତ୍ତି ବିରୋଧରେ ଏକ କ୍ୟାଣ୍ଡେଲ ମାର୍ଚ୍ଚ ମଧ୍ୟ କରିଥିଲେ । ସେମାନେ କୋର୍ଟକୁ ତାଙ୍କ ନିଷ୍ପତ୍ତି ପ୍ରତ୍ୟାହାର କରିବାକୁ ଦାବି କରିଥିଲେ । କୋର୍ଟରେ ଲୋକଙ୍କ ଆବେଦନ ସଂଖ୍ୟା ବୃଦ୍ଧି ପାଉଥିବାରୁ, ସୁପ୍ରିମକୋର୍ଟ ଏହି ମାମଲାର ଶୁଣାଣି ପାଇଁ ୩ ଜଣ ବିଚାରପତିଙ୍କ ଏକ ନୂଆ ଖଣ୍ଡପୀଠ ଗଠନ କରିଥିଲେ ।
