ଭୁବନେଶ୍ୱର ୨୦/୦୩: ରାଜଧାନୀରେ ଆରମ୍ଭ ହୋଇଛି ସ୍ୱଚ୍ଛ ସର୍ବେକ୍ଷଣ ସର୍ଭେ । ବିଏମ୍ସି ଅଞ୍ଚଳରେ ବାସ କରୁଥିବା ଜନସାଧାରଣଙ୍କୁ ସ୍ୱଚ୍ଛତା ନେଇ ସିଟିଜେନ୍ ଫିଡ୍ବ୍ୟାକ୍ ଦେବାକୁ ଅପିଲ କରିଛନ୍ତି ମେୟର ସୁଲୋଚନା ଦାସ । ସେ କହିଛନ୍ତି, ରାଜଧାନୀ ଭୁବନେଶ୍ୱରକୁ ସ୍ୱଚ୍ଛ ରଖିବା ପାଇଁ ସଫେଇ କର୍ମୀ, ବିଏମ୍ସି କର୍ମଚାରୀ ଏବଂ ଅଧିକାରୀମାନେ ଦିନରାତି ପରିଶ୍ରମ କରିଛନ୍ତି । ଭୁବନେଶ୍ୱର ମହାନଗର ନିଗମ ସ୍ୱଚ୍ଛ ସର୍ବେକ୍ଷଣରେ ଭାଗ ନେଇଛି । ଆପାଣମାନଙ୍କ ମତାମତ ଭୁବନେଶ୍ୱରକୁ ଶୀର୍ଷରେ ପହଞ୍ଚାଇ ପାରିବ ।
ସ୍ୱଚ୍ଛ ସର୍ବେକ୍ଷଣ ପୋର୍ଟାଲକୁ ଯାଇ ଭୋଟ ଦେଇ ପାରିବେ ଭୁବନେଶ୍ୱର ବାସିନ୍ଦା । ମୋବାଇଲ ନମ୍ବର ଦେବା ପରେ ଓଟିପି ଆସିବ । ଏହା ପରେ ରାଜ୍ୟ, ଜିଲ୍ଲା ଓ ମହାନଗର ନିଗମର ସବିଶେଷ ତଥ୍ୟ ଦେବା ପରେ ୧୦ଟି ପ୍ରଶ୍ନ ଆସିବ । ପ୍ରତିଦିନ ଘର ଏବଂ ଦୋକାନରେ ଡୋର ଟୁ ଡୋର ଅଳିଆ ସଂଗ୍ରହ ହେଉଛି କି ନାହିଁ । ରାସ୍ତା ସଫେଇ, ଓଦା ଶୁଖିଲା ଓଳିଆ ସଂଗ୍ରହ, ବାହାରେ ଶୌଚାଳୟ ଆଦି ଉପରେ ପ୍ରଶ୍ନ ଆସିବ । ଏହି ସର୍ଭେରେ ସାଧାରଣଲୋକ ଭାଗ ନେଇ ପାରିବେ ।
ଭାରତ ସରକାରଙ୍କ ପକ୍ଷରୁ ସହାରଞ୍ଚଳକୁ ସ୍ୱଚ୍ଛ ଓ ସବୁଜ ରଖିବାକୁ ସ୍ୱଚ୍ଛ ଭାରତ ସର୍ବେକ୍ଷଣ-୨୦୨୪ ଆରମ୍ଭ ହୋଇଛି । ଏନେଇ ଦେଶର ବିଭିନ୍ନ ମହାନଗର ନିଗମ, ବିଜ୍ଞାପିତ ପୌର ପରିଷଦ ଓ ମୁନିସିପାଲିଟିରେ ସ୍ୱଚ୍ଛ ସର୍ବେକ୍ଷଣ ଆରମ୍ଭ ହୋଇଛି । ସବୁ ବର୍ଷ ପରି ଏ ବର୍ଷ ମଧ୍ୟ ବିଭିନ୍ନ କାଟେଗୋରୀରେ ଭାଗ ନେଇଛି ବିଏମ୍ସି । ଡୋର ଟୁ ଡୋର ଅଳିଆ ସଂଗ୍ରହ ଉପରେ ଅଧିକ ଫୋକସ କରିଛି ବିଏମସି । ସହରରେ ୩୨ ମାଇକ୍ରୋ କମ୍ପୋଷ୍ଟିଂ ସେଣ୍ଟର (ଏମ୍ସିସି) ଓ ଏମ୍ଆରଏଫ୍ ନିର୍ମାଣ ହୋଇଛି । ସହରକୁ ଡଷ୍ଟବିନ୍ ଫ୍ରି ସିଟି କରାଯାଇଛି । ସୈନିକ ସ୍କୁଲ ନିକଟ ଟିଟିଏସ୍ରେ ବିଏମ୍ସି ପକ୍ଷରୁ ପ୍ଲାଣ୍ଟ ବସାଇ ଅଳିଆ ପ୍ରକ୍ରିୟାକରଣ କରାଯାଉଛି ।
ସେହିପରି ପ୍ଲାଷ୍ଟିକ ଫ୍ରି ସିଟି ଉପରେ ମଧ୍ୟ ଗୁରୁତ୍ୱ ଦେଇଛି ବିଏମ୍ସି । ସହରରେ ପଲିଥିନ୍କୁ ସମ୍ପୂର୍ଣ୍ଣ ନିଷେଧ କରାଯାଇଛି । କୋଇଲା ଚୁଲାକୁ ସମ୍ପୂର୍ଣ୍ଣ ଭାବେ ବ୍ୟାନ୍ କରିବାର ସହ ଫାଇନ୍ ବ୍ୟବସ୍ଥା ମଧ୍ୟ କରାଯାଇଛି । ସବୁଜ ଅଳିଆ, କଠିନ ବର୍ଜ୍ୟବସ୍ତୁ ପରିଚାଳନା କ୍ଷେତ୍ରରେ ମଧ୍ୟ ଉଲ୍ଲେଖନୀୟ ସଫଳତା ହାସଲ କରିଛି ବିଏମ୍ସି ।
୨୦୨୧ ମସିହାରେ ଦେଶରେ ବିଏମ୍ସିର ର୍ୟାଙ୍କ ଥିଲା ୧୪୪ । ୨୦୨୨ରେ ଉପରକୁ ଉଠି ୮୦ରେ ପହଞ୍ଚିଥିଲା । ୨୦୨୩ ମସିହାରେ ୩୪ ନମ୍ବର ସ୍ଥାନକୁ ଉଠିଥିଲା । ହେଲେ ଚଳିତ ବର୍ଷ ଏହି ର୍ୟାଙ୍କରେ ପରିବର୍ତ୍ତନ ହେବ । ତଳକୁ ଯିବ ନା ଟପ୍ ୨୦ ଭିତରେ ରହିବ ତାକୁ ନେଇ ଏବେଠୁ ଆକଳନ ଆରମ୍ଭ ହୋଇଛି । ସିଟିଜେନ୍ ଫିଡବ୍ୟାକ୍ରେ ଭୁବନେଶ୍ୱର ଭଲ ପ୍ରଦର୍ଶନ କରିଥିଲା । ମୋଟ ୬୦୦୦ ମାର୍କରୁ ୪୩୬୩.୩୭ ମାର୍କ ରଖିଥିଲା । କିନ୍ତୁ ଭୁବନେଶ୍ୱର କେବଳ ପୂର୍ବାଞ୍ଚଳ ରାଜ୍ୟ ରାଜଧାନୀରେ ସମୀତ ରହିଥିଲା । ଏଥର ସର୍ବ ଭାରତୀୟ ସ୍ତରରେ ପ୍ରତିଯୋଗିତା କରିବ ।
