ନୂଆଦିଲ୍ଲୀ: ଆମ ଆଦମୀ ପାର୍ଟିରେ ବଡ ଧରଣର ବିପର୍ଯ୍ୟୟ ପରେ ସାଂସଦ ସ୍ୱାତୀ ମାଲିୱାଲ ଏବେ ତାଙ୍କର ପ୍ରତିକ୍ରିୟା ଦେଇଛନ୍ତି। ସେ ଦଳର ପ୍ରତିଷ୍ଠାତା ତଥା ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜ୍ରିଓ୍ବାଲଙ୍କ ଉପରେ ସଂଗୀନ ଅଭିଯୋଗ ଆଣିଛନ୍ତି। ସେ କହିଛନ୍ତି ଯେ, ଅରବିନ୍ଦ କେଜ୍ରିୱାଲଙ୍କ ପୃଷ୍ଠପୋଷକତାରେ ଆପ୍ ଭିତରେ ବ୍ୟାପକ ଦୁର୍ନୀତି, ମହିଳା ନିର୍ଯାତନା, ଗୁଣ୍ଡାଗିରିକୁ ପ୍ରୋତ୍ସାହନ ଏବଂ ପଞ୍ଜାବ ସହ ହୋଇଥିବା ଧୋଖା ଏବଂ ଲୁଟପାଟ ଯୋଗୁଁ ସେ ଦଳ ଛାଡିବାକୁ ନିଷ୍ପତ୍ତି ନେଇଥିଲେ।
"ମୁଁ ପ୍ରତ୍ୟେକ ପର୍ଯ୍ୟାୟରେ ସମ୍ପୂର୍ଣ୍ଣ ସଚ୍ଚୋଟତାର ସହିତ ଅବଦାନ ଦେଇଥିଲି"
ତାଙ୍କ ପୋଷ୍ଟରେ ସେ କହିଛନ୍ତି, "୨୦୦୬ ମସିହାରେ, ମୁଁ ମୋର ଚାକିରି ଛାଡି ଦେଶ ସେବା କରିବାର ପଥ ବାଛିଥିଲି। ସୂଚନା ଅଧିକାର ଆନ୍ଦୋଳନ, ଆନ୍ନା ଆନ୍ଦୋଳନ, ଆମ ଆଦମୀ ପାର୍ଟି ଗଠନ ଏବଂ ଦିଲ୍ଲୀ ମହିଳା କମିଶନରେ ଆଠ ବର୍ଷ ଧରି ନିଷ୍ଠାର ସହିତ କାର୍ଯ୍ୟ କରି, ମୁଁ ପ୍ରତ୍ୟେକ ପର୍ଯ୍ୟାୟରେ ସମ୍ପୂର୍ଣ୍ଣ ସଚ୍ଚୋଟତା ଏବଂ ସମର୍ପଣର ସହିତ ଅବଦାନ ଦେଇଥିଲି।"
'ଆମ ଆଦମୀ ପାର୍ଟି ତାର ଆଦର୍ଶରୁ ଦୂରେଇ ଯାଇଛି'
ସ୍ୱାତୀ ମାଲିୱାଲ ଆହୁରି କହିଛନ୍ତି, "ଏହା ଅତ୍ୟନ୍ତ ଦୁଃଖର ସହିତ ଆମକୁ କହିବାକୁ ପଡୁଛି ଯେ, ଯେଉଁ ନୀତି, ମୂଲ୍ୟବୋଧ ଏବଂ ସଚ୍ଚୋଟତାର ସହ ଆମେ ଏହି ରାଜନୀତିର ଯାତ୍ରାରେ ସାମିଲ ହୋଇଥିଲୁ, ଆଜି ଅରବିନ୍ଦ କେଜରିୱାଲ ଏବଂ ସମଗ୍ର ଆମ ଆଦମୀ ପାର୍ଟି ତାଙ୍କ ନିର୍ଦ୍ଦେଶରେ ଏହି ଆଦର୍ଶରୁ ଦୂରେଇ ଯାଇଛନ୍ତି।
'ମୋତେ ନିର୍ମମ ଭାବରେ ଆକ୍ରମଣ ଏବଂ ଦୁର୍ବ୍ୟବହାର କରାଯାଇଥିଲା'
ସେ ଏହା ମଧ୍ୟ କହିଛନ୍ତି, "ତାଙ୍କ ନିର୍ଦ୍ଦେଶରେ ତାଙ୍କ ବାସଭବନରେ ମୋତେ ନିର୍ମମ ଭାବରେ ଆକ୍ରମଣ ଏବଂ ଦୁର୍ବ୍ୟବହାର କରାଯାଇଥିଲା। ସେ ତାଙ୍କ ଗୁଣ୍ଡାଙ୍କୁ ସୁରକ୍ଷା ଦେବା ପାଇଁ ଯଥାସମ୍ଭବ ଚେଷ୍ଟା କରିଥିଲେ ଏବଂ ତାଙ୍କୁ ବଡ ବଡ ପଦବୀ ପ୍ରଦାନ କରିଥିଲେ। ସେ ମୋତେ ବର୍ବାଦ କରିବାକୁ ଧମକ ଦେଇଥିଲେ ଏବଂ ଯଥାସମ୍ଭବ ଚେଷ୍ଟା କରିଥିଲେ... ମୁଁ ଆଜି ରାତିରେ ଦିଲ୍ଲୀ ଫେରିବା ପରେ ଏ ବିଷୟରେ ବିସ୍ତୃତ ଆଲୋଚନା କରିବି।"
କେଉଁ ସାଂସଦ ମାନେ ଆପ ଛାଡିଛନ୍ତି?
ରାଘବ ଚଢା
ଅଶୋକ ମିତ୍ତଲ
ସନ୍ଦୀପ ପାଠକ
ସ୍ବାତୀ ମାଲିୱାଲ
ହରଭଜନ ସିଂ
ରାଜେନ୍ଦ୍ର ଗୁପ୍ତା
ବିକ୍ରମଜିତ୍ ସିଂ ସାହାନି
