ଆମ ଶରୀର ପାଇଁ ଇମ୍ୟୁନ ସିଷ୍ଟମ ବା ରୋଗ ପ୍ରତିରୋଧକ ଶକ୍ତି ବେଶ ଗୁରୁତ୍ବପୂର୍ଣ୍ଣ । ଏହା ଆମ ଶରୀରକୁ ବିଭିନ୍ନ ମାରାତ୍ମକ ରୋଗ, ସଂକ୍ରମଣରୁ ରକ୍ଷା କରିଥାଏ । ଏନେଇ ସମସ୍ତେ ନିଜର ଇମ୍ୟୁନିଟି ମଜଭୁତ କରିବା ଆବଶ୍ୟକ ଅଟେ। ଯଦି କୌଣସି କାରଣରୁ ଇମ୍ୟୁନ ସିଷ୍ଟମ ଦୁର୍ବଳ ହୁଏ, ତାହେଲେ ବିଭିନ୍ନ ପ୍ରକାର ଗମ୍ଭୀର ରୋଗ, ସଂକ୍ରମଣ ଗ୍ରାସ କରିଥାଏ ଯାହାକି ଆମର ଦୈନନ୍ଦିନ ଜୀବନକୁ ପ୍ରଭାବିତ କରେ । ତେବେ ଆସନ୍ତୁ ଜାଣିବା ଦୁର୍ବଳ ଇମ୍ୟୁନ ସିଷ୍ଟମର ଲକ୍ଷଣ କ'ଣ।
ବାରମ୍ବାର ସଂକ୍ରମଣ: ସୁସ୍ଥ ଇମ୍ୟୁନ ସିଷ୍ଟମ ଶରୀରକୁ ସଂକ୍ରମଣରୁ ରକ୍ଷା କରେ । ହେଲେ ବାରମ୍ବାର ସଂକ୍ରମଣ ହେଉଥିଲେ ଏହା ଦୁର୍ବଳ ଇମ୍ୟୁନିଟିର ସଙ୍କେତ ।
କ୍ଷତ ଶୀଘ୍ର ନ ଶୁଖିବା: ଶରୀରରେ କ୍ଷତ ହେଲେ ଇମ୍ୟୁନ ସିଷ୍ଟମ ଏହାକୁ ଶୀଘ୍ର ଶୁଖାଇବାରେ କାମ କରେ । ଯଦି କ୍ଷତ ଭରିବାକୁ ଅଧିକ ସମୟ ଲାଗେ, ତାହେଲେ ଆପଣଙ୍କ ଇମ୍ୟୁନିଟି କମ୍ ଥିବା ଜାଣିବେ ।
ବାରମ୍ବାର ଥଣ୍ଡା-ଜ୍ବର : ବାରମ୍ବାର ଥଣ୍ଡା ଜ୍ବର ହେଲେ ବା ନାକରୁ ପାଣି ବୋହିବା ଦୁର୍ବଳ ଇମ୍ୟୁନିଟିର ସଙ୍କେତ । ଜଣେ ସୁସ୍ଥ ବ୍ୟକ୍ତିକୁ ବର୍ଷକୁ ୨ରୁ ୩ ଥର ଥଣ୍ଡା, ଜ୍ବର ହୋଇପାରେ । ହେଲେ ଇମ୍ୟୁନ ସିଷ୍ଟମ ଦୁର୍ବଳ ଥିଲେ ବାରମ୍ବାର ହୋଇଥାଏ ।
ଦୁର୍ବଳ ଲାଗିବା: ଇମ୍ୟୁନିଟି ଦୁର୍ବଳ ଥିଲେ ଲଗାତାର ଥକ୍କା ଓ ଦୁର୍ବଳ ଲାଗିଥାଏ । କିଛି କାମ କରିବାକୁ ଇଚ୍ଛା ହୁଏନି । ଆରାମ କରିବା ସତ୍ତ୍ବେ ଏହା ଠିକ୍ ହୋଇନଥାଏ ।
ପେଟ ସମସ୍ୟା: ଶରୀରର ପାଚନ ତନ୍ତ୍ର ଇମ୍ୟୁନ ସିଷ୍ଟମର ଏକ ଗୁରୁତ୍ବପୂର୍ଣ୍ଣ ଅଂଶ । ଏଥିରେ ଗଡବଡ ହେଲେ ପେଟରେ ଭଲ ବ୍ୟାକ୍ଟେରିଆ କମିଯାଏ ଓ ପେଟ ସମସ୍ୟା ଦେଖାଦିଏ ।
