ନୂଆଦିଲ୍ଲୀ: ଅନ୍ତର୍ଜାତୀୟ କ୍ରିକେଟ ପରିଷଦ( ICC) ମହିଳା ଟି-20 ବିଶ୍ୱକପର କାର୍ଯ୍ୟସୂଚୀ ଘୋଷଣା କରିଛି। ଏହି ବିଶ୍ୱକପ୍ ଆସନ୍ତା ବର୍ଷ ଅନୁଷ୍ଠିତ ହେବ। କାର୍ଯ୍ୟସୂଚୀ ପ୍ରକାଶ ପାଇବା ସହିତ, କେଉଁ ଦଳକୁ କେଉଁ ଗ୍ରୁପରେ ରଖାଯାଇଛି ତାହା ମଧ୍ୟ ସ୍ଥିର ହୋଇଛି। ବିଶେଷ କଥା ହେଉଛି ଯେ, ଭାରତ ଏବଂ ପାକିସ୍ତାନକୁ ପୁଣି ଥରେ ସମାନ ଗ୍ରୁପରେ ରଖାଯାଇଛି। ଏହି ଦୁଇ ଦଳ ମଧ୍ୟରେ ମ୍ୟାଚର ତାରିଖ ମଧ୍ୟ ପ୍ରକାଶ ପାଇଛି। ମହିଳା ଟି-୨୦ ବିଶ୍ୱକପ୍ ୨୦୨୬ରେ ଇଂଲଣ୍ଡରେ ଅନୁଷ୍ଠିତ ହେବାକୁ ଯାଉଛି। ଏହା ବିଶ୍ୱକପର ୧୦ମ ସଂସ୍କରଣ ।
ଜୁନ ୧୨ରେ ବିଶ୍ୱକପର ପ୍ରଥମ ମ୍ୟାଚ୍ ଖେଳାଯିବ । ଆୟୋଜକ ଇଂଲଣ୍ଡ ଏବଂ ଶ୍ରୀଲଙ୍କା ଉଦଘାଟନୀ ମ୍ୟାଚ୍ରେ ସାମ୍ନାସାମ୍ନି ହେବେ । ଏହି ବିଶ୍ୱକପରେ ମୋଟ ୧୨ଟି ଦଳ ଅଂଶଗ୍ରହଣ କରିବେ, ତେଣୁ ଏହା ଏପର୍ଯ୍ୟନ୍ତ ସବୁଠାରୁ ବଡ଼ ବିଶ୍ୱକପ୍ ହେବ ବୋଲି କୁହାଯାଇପାରିବ। ଯଦି ଆମେ ଗ୍ରୁପ୍ ବିଷୟରେ କଥା ହେବା, ତେବେ ICC ଏଥିପାଇଁ ଦୁଇଟି ଗ୍ରୁପ୍ ଗଠନ କରିଛି। ଅଷ୍ଟ୍ରେଲିଆ ବ୍ୟତୀତ ଦକ୍ଷିଣ ଆଫ୍ରିକା, ଭାରତ ଏବଂ ପାକିସ୍ତାନକୁ ଗ୍ରୁପ୍- ୧ ରେ ସାମିଲ କରାଯାଇଛି । ଏହା ବ୍ୟତୀତ ଆଉ ଦୁଇଟି ଦଳ ଆସିବେ, ଏହା ପରେ ନିଷ୍ପତ୍ତି ନିଆଯିବ ।
ଟି-୨୦ ବିଶ୍ୱକପର ଦ୍ୱିତୀୟ ଗ୍ରୁପ୍ ବିଷୟରେ କହିବାକୁ ଗଲେ, ଆୟୋଜକ ଇଂଲଣ୍ଡ ବ୍ୟତୀତ ନ୍ୟୁଜିଲ୍ୟାଣ୍ଡ, ଶ୍ରୀଲଙ୍କା ଏବଂ ୱେଷ୍ଟଇଣ୍ଡିଜକୁ ଏଥିରେ ସାମିଲ କରାଯାଇଛି। ଗ୍ଲୋବାଲ୍ କ୍ୱାଲିଫାୟର୍ ଖେଳିବା ପରେ ଦୁଇଟି ଦଳ ଏଠାକୁ ଆସିବେ। ନିୟମ ଅନୁଯାୟୀ, ସମସ୍ତ ଦଳ ନିଜ ନିଜ ଗ୍ରୁପ୍ର ଅନ୍ୟ ଦଳଗୁଡ଼ିକ ସହିତ ମ୍ୟାଚ୍ ଖେଳିବେ, ଏହା ପରେ ପଏଣ୍ଟ ଟେବୁଲର ଶୀର୍ଷ ଦୁଇଟି ଦଳ ସିଧାସଳଖ ସେମିଫାଇନାଲ୍ ଯିବେ। ସେମିଫାଇନାଲ୍ ମ୍ୟାଚ୍ ୩୦ ଜୁନ୍ ଏବଂ ୨ ଜୁଲାଇରେ ଅନୁଷ୍ଠିତ ହେବ। ଏହା ପରେ, ୫ ଜୁଲାଇରେ ଫାଇନାଲ୍ ମ୍ୟାଚ୍ ଖେଳାଯିବ। ଏହି ମ୍ୟାଚ୍ ଲର୍ଡସରେ ଖେଳାଯିବ।
ଭାରତ ଏବଂ ପାକିସ୍ତାନ ମଧ୍ୟରେ ହେବାକୁ ଥିବା ମ୍ୟାଚ୍ ୧୪ ଜୁନରେ ଖେଳାଯିବ। ଭାରତ ଏବଂ ପାକିସ୍ତାନ ଦଳ ଏବେ କେବଳ ICC କିମ୍ବା ACC ଟୁର୍ଣ୍ଣାମେଣ୍ଟରେ ପରଷ୍ପର ସହିତ ମୁହାଁମୁହିଁ ହେଉଛନ୍ତି । ତେଣୁ ଏହି ମ୍ୟାଚ୍କୁ ନେଇ ଉତ୍ସାହ ଶୀର୍ଷରେ ରହିଛି । ଭାରତ ଏବଂ ପାକିସ୍ତାନ ସମାନ ଗ୍ରୁପରେ ଅଛନ୍ତି, ତେଣୁ ସେମାନେ କେବଳ ଲିଗ୍ ପର୍ଯ୍ୟାୟରେ ପରସ୍ପର ସହିତ ମୁହାଁମୁହିଁ ହୋଇପାରିବେ ।
