ଭୁବନେଶ୍ୱର/ଚନ୍ଦକା,୨୧/୦୯: ଚନ୍ଦକାରୁ କ୍ୟାବ୍ ଡ୍ରାଇଭରଙ୍କ ମୃତଦେହ ମିଳିବା ଘଟଣାରେ ନୂଆ ମୋଡ଼। ଏହି ଘଟଣା ପାଇଁ ଚାକିରି କେଳେଙ୍କାରୀ କଥା ସାମ୍ନାକୁ ଆସିଛି । କ୍ୟାବ୍ ଡ୍ରାଇଭର ବିଦ୍ୟାଧର ସାହୁଙ୍କ ହତ୍ୟା ରହସ୍ୟ ପଛରେ ଜଣେ ମାଡାମ୍ଙ୍କ ହାତ ଥିବା ସନ୍ଦେହ କରାଯାଉଛି ।
ଶନିବାର ରାଜଧାନୀରେ ଜଣେ ଟ୍ୟାକ୍ସି ଡ୍ରାଇଭରଙ୍କୁ ଅପହରଣ କରି ଅତି ନିର୍ମମ ଭାବେ ହତ୍ୟା କରାଯାଇଥିଲା । ମୃତକ ହେଲେ ବଡ଼ଗଡ଼ କେନାଲ ରୋଡ୍ରେ ରହୁଥିବା ଖୋର୍ଦ୍ଧା ବାଣପୁର ଥାନା ଅଧୀନ ଅରାଙ୍ଗ ଗ୍ରାମର ବିଦ୍ୟାଧର ସାହୁ(୩୫) । ବିଦ୍ୟାଧରଙ୍କ ମୃତଦେହ ଚନ୍ଦକା-ବାରଙ୍ଗ ରାସ୍ତାର ଦାରୁଠେଙ୍ଗ ନିକଟ ଜୁଝଗଡ଼ ରାସ୍ତା କଡ଼ ଜଙ୍ଗଲରୁ ମିଳିଥିଲା । ବିଦ୍ୟାଧରଙ୍କ ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ଥିବା ବେଳେ ବେକରେ ଏକ ଧଳା ଗାମୁଛାରେ ଫାଶପଡ଼ି ଥିଲା । ତେଣୁ ବିଦ୍ୟାଧରଙ୍କୁ ନିସ୍ତୁକ ମାଡ଼ ପରେ ଗାମୁଛାରେ ତଣ୍ଟି ଚିପି ହତ୍ୟା କରାଯାଇଥିବା ଅନୁମାନ କରାଯାଉଛି । କନ୍ଷ୍ଟେବଳ ଶୁଭମିତ୍ରା ସାହୁଙ୍କ ହତ୍ୟାକାଣ୍ଡ ଘଟଣା ପଦାକୁ ଆସିବାର ଦୁଇ ଦିନ ପରେ ଜଣେ ଟ୍ୟାକ୍ସି ଡ୍ରାଇଭରଙ୍କୁ ଅପହରଣ କରି ହତ୍ୟା କରାଯିବା କମିଶନରେଟ୍ ପୁଲିସର ଚିନ୍ତା ବଢ଼ାଇ ଦେଇଛି ।
ଘଟଣାସ୍ଥଳରେ ବଡ଼ଗଡ଼ ଏବଂ ଚନ୍ଦକା ଦୁଇ ଥାନାର ପୁଲିସ ସାଇଣ୍ଟିଫିକ୍ ଟିମ୍ ସହ ତନାଘନା ଆରମ୍ଭ କରିଥିଲେ । ଏନେଇ ବଡ଼ଗଡ଼ ଥାନା ପୁଲିସ ଅପହରଣ ଓ ହତ୍ୟା ମାମଲା ରୁଜୁକରି ତଦନ୍ତ କରୁଛି । ପ୍ରାଥମିକ ତଦନ୍ତରୁ ଚାକିରି ଠକେଇରୁ ଏହି ହତ୍ୟାକାଣ୍ଡ ଘଟିଥିବା ପୁଲିସ ଜାଣିବାକୁ ପାଇଛି । ବିଦ୍ୟାଧରଙ୍କ କାରରୁ ଜବତ ହୋଇଥିବା କିଛି କାଗଜ ପତ୍ରରୁ ଏଭଳି ସୂଚନା ମିଳିଛି । ଏହି ହତ୍ୟାକାଣ୍ଡ ପଛରେ ଜଣେ ମହିଳାଙ୍କ ସମ୍ପୃକ୍ତି ଥିବା ସନ୍ଦେହ କରାଯାଉଛି । ପୁଲିସ ଜଣଙ୍କୁ ଅଟକ ରଖି ପଚରାଉଚରା କରୁଛି ।
ବିଦ୍ୟାଧରଙ୍କ ପତ୍ନୀ ମାମିନା ଖଟୁଆ ବଡ଼ଗଡ଼ ଥାନାରେ କରିଥିବା ଅଭିଯୋଗ ଅନୁଯାୟୀ, ତାଙ୍କ ସ୍ୱାମୀ ଓଲା, ଉବେରରେ ଡ୍ରାଇଭର ଭାବେ କାମ କରନ୍ତି । ଗତ ୧୫ ତାରିଖ ସକାଳ ୭ଟା ବେଳେ ସେ କାର୍(ଓଡି ୦୨ସିସି-୪୨୩୭) ନେଇ ଘରୁ ବାହାରି ଯାଇଥିଲେ । ମଧ୍ୟାହ୍ନରେ ଖାଇବାକୁ ଘରକୁ ଆସି ନଥିଲେ । ତେଣୁ ସେ ବିଦ୍ୟାଧରଙ୍କୁ ଫୋନ୍ କରିଥିଲେ । ହେଲେ ବିଦ୍ୟାଧର ଫୋନ୍ ଉଠାଇ ନଥିଲେ ।
ତେଣୁ ସେ ବାହାରକୁ ଭଡ଼ାରେ ପଳାଇଥିବା ସନ୍ଦେହ କରି ମାମିନା ଆଉ ଫୋନ୍ କରି ନଥିଲେ । ଦୁଇଦିନ ଧରି ସେ ବାରମ୍ବାର ଫୋନ୍ କରିଥିଲେ ମଧ୍ୟ ବିଦ୍ୟାଧର ଫୋନ୍ ଉଠାଇ ନଥିଲେ । ବିଦ୍ୟାଧରଙ୍କ ସାଙ୍ଗସାଥୀମାନଙ୍କୁ ମଧ୍ୟ ମାମିନା ଫୋନ୍ କରି ନିରାଶ ହୋଇଥିଲେ । ୧୮ ତାରିଖ ରାତି ସାଢ଼େ ୧୧ଟାରେ ବିଦ୍ୟାଧରଙ୍କ ମୋବାଇଲରୁ ମାମିନାଙ୍କ ମୋବାଇଲକୁ ଏକ କଲ୍ ଆସିଥିଲା । ସେପଟରୁ ଜଣେ ବ୍ୟକ୍ତି କହିଥିଲେ, ତୁମ ସ୍ୱାମୀ ଆମ ପାଖରେ ଅଛି । ଆମକୁ ୨ କୋଟି ଟଙ୍କା ଦେଲେ ତୁମ ସ୍ୱାମୀଙ୍କୁ ଛାଡ଼ିବୁ ବୋଲି ସେ ଧମକ ଦେଇଥିଲେ । ତେଣୁ ଭୟଭୀତ ହୋଇ ମାମିନା ଶୁକ୍ରବାର ଏନେଇ ବଡ଼ଗଡ଼ ଥାନାରେ ଅଭିଯୋଗ କରିଥିଲେ । ପୁଲିସ ଏକ ନିଖୋଜ ମାମଲା ରୁଜୁକରି ତଦନ୍ତ ଆରମ୍ଭ କରିଥିଲା ।
ସେପଟେ ବିଦ୍ୟାଧରଙ୍କ ସହକର୍ମୀମାନେ ମଧ୍ୟ ତାଙ୍କୁ ଖୋଜାଖୋଜି କରୁଥିଲେ । ଶନିବାର ଅନ୍ୟ ଜଣେ କ୍ୟାବ୍ ଡ୍ରାଇଭର ଚନ୍ଦକା-ବାରଙ୍ଗ ରାସ୍ତାର ଦାରୁଠେଙ୍ଗ ନିକଟରେ ବିଦ୍ୟାଧରଙ୍କ କାର୍କୁ ଦେଖି ଆଖପାଖରେ ଖୋଜାଖୋଜି କରିଥିଲେ । କିଛି ଦୂରରେ ଜଙ୍ଗଲ ଭିତରେ ବିଦ୍ୟାଧରଙ୍କ ମୃତଦେହ ପଡ଼ିଥିବା ଦେଖି ସେ ତାଙ୍କ ପରିବାର ଏବଂ ପିସିଆର ପୁଲିସକୁ ଖବର ଦେଇଥିଲେ । ବିଦ୍ୟାଧରଙ୍କ ପରିବାର ଏବଂ ଚନ୍ଦକା ଥାନା ପୁଲିସ ପହଞ୍ଚି ଛାନ୍ଭିନ ଆରମ୍ଭ କରିଥିବା ବେଳେ ଘଟଣାସ୍ଥଳରେ ବଡ଼ଗଡ଼ ଥାନା ପୁଲିସ ମଧ୍ୟ ପହଞ୍ଚିଥିଲା । ସାଇଣ୍ଟିଫିକ୍ ଟିମ୍ ଡ଼କାଇ ପୁଲିସ ତଦନ୍ତ ଆରମ୍ଭ କରିଥିଲା । କାର୍ ଥୁଆ ହୋଇଥିବା ସ୍ଥାନରୁ କିଛିଦୂରରେ ବିବ୍ୟାଧରଙ୍କ ମୃତଦେହ ପଡ଼ିଥିବା ବେଳେ କାର୍ଠାରୁ ମୃତଦେହ ପଡ଼ିଥିବା ପର୍ଯ୍ୟନ୍ତ ଘୋଷଡ଼ା ଚିହ୍ନ ଥିଲା । ବେକରେ ଗାମୁଛା ଫାଶ ପଡ଼ିଥିବା ବେଳେ ଶରୀରର ବିଭିନ୍ନ ସ୍ଥାନରେ କ୍ଷତଚିହ୍ନ ଥିଲା । ନିକଟରେ ଏକ ମଦ ବୋତଲ ଓ ଗ୍ଲାସ୍ ପଡ଼ିଥିଲା । ଏକ ଛତା ମଧ୍ୟ ସେଠାରୁ ମିଳିଥିଲା । ବିଦ୍ୟାଧରଙ୍କୁ ନିସ୍ତୁକ ମାଡ଼ ମରାଯିବା ପରେ ତାଙ୍କ ବେକକୁ ଗାମୁଛାରେ ଚାପି ହତ୍ୟା କରାଯାଇଥିବା ପୁଲିସ ସ୍ପଷ୍ଟ ହୋଇଥିଲା । ହତ୍ୟା କରିବା ପରେ ତାଙ୍କୁ ଘୋଷାଡ଼ି ନେଇ ଜଙ୍ଗଲ ଭିତରେ ଫିଙ୍ଗି ଦିଆ ଯାଇଥିଲା । ଏହି ହତ୍ୟାକାଣ୍ଡରେ ଏକାଧିକ ବ୍ୟକ୍ତିଙ୍କ ସଂପୃକ୍ତି ଥିବା ପୁଲିସ ଅନୁମାନ କରୁଛି । କାର୍ ଭିତରୁ ଏକ ବ୍ୟାଗ୍ ମିଳିଥିଲା । ସେଥିରୁ ଜଣେ ମହିଳାଙ୍କର କିଛି କାଗଜପତ୍ର ଜବତ ହୋଇଥିଲା ।
ବିଦ୍ୟାଧରଙ୍କ ଭଉଣୀଙ୍କ କହିବା ଅନୁଯାୟୀ, ଖଣ୍ଡଗିରି ଅଞ୍ଚଳର ଜଣେ ମାଡାମ୍ଙ୍କୁ ବିଦ୍ୟାଧର ସକାଳୁ ଭଡ଼ାରେ ନେଇ ଯାଆନ୍ତି । ତାଙ୍କୁ ଅଫିସରେ ଛାଡ଼ିବା ପରେ ଅନ୍ୟ ଭଡ଼ାରେ ଯାଇଥାନ୍ତି । ପୁଲିସ ତଦନ୍ତରୁ ଜାଣିବାକୁ ପାଇଛି ଉକ୍ତ ମାଡାମ୍ ଏକ ପ୍ଲେସ୍ମେଣ୍ଟ ସଂସ୍ଥା କରିଥିଲେ । ଶତାଧିକ ଆଶାୟୀଙ୍କଠାରୁ ଚାକିରି କରାଇ ଦେବାକୁ କହି ପ୍ଲେସ୍ମେଣ୍ଟ ସଂସ୍ଥା କୋଟି କୋଟି ଟଙ୍କା ଆଦାୟ କରିଥିଲା । ବିଦ୍ୟାଧର ଓ ଅନ୍ୟଜଣେ ଯୁବକ ମିଶି ଏହି ସଂସ୍ଥା ପାଇଁ ପିଲା ଯୋଗାଡ଼ କରିବା ସହ ଆଶାୟୀଙ୍କଠାରୁ ଟଙ୍କା ଆଦାୟ କରି ମାଡ଼ାମଙ୍କୁ ଦେଉଥିଲେ । ଉକ୍ତ ଟଙ୍କାରୁ କିଛି ବିଦ୍ୟାଧର ଆତ୍ମସାତ୍ କରିଥିବା ପୁଲିସ ଅନୁମାନ କରୁଛି । ଯେଉଁ କାରଣରୁ ତାଙ୍କୁ ପ୍ଲେସ୍ମେଣ୍ଟ ସଂସ୍ଥା ପକ୍ଷରୁ ଅପହରଣ କରି ହତ୍ୟା କରାଯାଇଥିବା ପୁଲିସ ସନ୍ଦେହ କରୁଛି ।
ଅନ୍ୟପକ୍ଷରେ ଚାକିରି ପାଇ ନ ଥିବା କିଛି ଆଶାୟୀ ଟଙ୍କା ଫେରି ପାଇବା ପାଇଁ ବିଦ୍ୟାଧରଙ୍କୁ ବାରମ୍ବାର ଫୋନ୍ କରୁଥିବା ପରିବାର ଲୋକଙ୍କଠାରୁ ପୁଲିସ ଜାଣିବାକୁ ପାଇଛି । ହତ୍ୟାକାଣ୍ଡ ସ୍ଥଳରୁ ଜବତ କାର୍ରୁ ଉକ୍ତ ମାଡାମ୍ଙ୍କ ବିଷୟରେ ପୁଲିସ କିଛି ସୁରାକ୍ ପାଇଛି । ଉକ୍ତ ମହିଳାଙ୍କ ମୋବାଇଲ ସୁଇଚ୍ ଅଫ୍ ରହିଛି । ତେଣୁ ଏହି ହତ୍ୟାକାଣ୍ଡ ପଛରେ ଉକ୍ତ ମହିଳାଙ୍କର ସଂପୃକ୍ତି ଥିବା ମଧ୍ୟ ପୁଲିସ ସନ୍ଦେହ କରୁଛି । ଉକ୍ତ ମହିଳାଙ୍କୁ ପୁଲିସ ଖୋଜାଖୋଜି କରୁଛି । ଜଣେ ପୁରୁଷ ଅପହର୍ତ୍ତା ମାମିନାଙ୍କ ସହ ମୁଣ୍ଡ ଜାମିନ୍ ବାବଦ ଅର୍ଥ ଦାବି କରିଥିବାରୁ ଏହି ହତ୍ୟାକାଣ୍ଡ ପଛରେ ଏକାଧିକ ବ୍ୟକ୍ତିଙ୍କ ସମ୍ପୃକ୍ତି ଥିବା ସ୍ପଷ୍ଟ ହୋଇଛି । ସେପଟେ ବିଦ୍ୟାଧରଙ୍କ ମୋବାଇଲ୍ ମିଳିନାହିଁ । ତେଣୁ ପୁଲିସ ତାଙ୍କ ମୋବାଇଲ୍ ଫୋନ୍ର କଲ୍ ଡିଟେଲ୍ ଯାଞ୍ଚ କରୁଛି ।
ବିଦ୍ୟାଧରଙ୍କ ଭାଇଙ୍କ କହିବା ଅନୁଯାୟୀ, ଗତକାଲି ଦିନ ସାଢ଼େ ଗୋଟାଏ ବେଳେ କଟକ ଟାଙ୍ଗୀ ଟୋଲ୍ ଗେଟ୍ରେ ବିଦ୍ୟାଧରଙ୍କ କାର୍ ନମ୍ବରରେ ଦେଢ଼ ଶହ ଟଙ୍କା ଚାଲାଣ କଟିଥିବା ତାଙ୍କ ମୋବାଇଲକୁ ମେସେଜ୍ ଆସିଛି । ତେଣୁ ଭୁବନେଶ୍ୱରରୁ ଚଣ୍ଡିଖୋଲ ଦେଇ ଯାଇଥିବା ଜାତୀୟ ରାଜପଥର ବିଭିନ୍ନ ସ୍ଥାନରେ ଲାଗିଥିବା ସିସିଟିଭି ଫୁଟେଜକୁ ମଧ୍ୟ ପୁଲିସ ଯାଞ୍ଚ କରୁଛି । ସେପଟେ ବଡ଼ଗଡ଼ ଥାନା ପୁଲିସ ଅପହରଣ ସହ ହତ୍ୟା ମାମଲା ରୁଜୁକରି ଶବ ବ୍ୟବଚ୍ଛେଦ କରାଇ ମୃତଦେହକୁ ବିଦ୍ୟାଧରଙ୍କ ପରିବାର ଲୋକଙ୍କୁ ହସ୍ତାନ୍ତର କରିଛି ।
ଏହି ଅପହରଣ ଓ ହତ୍ୟା ମାମଲା ସମ୍ପର୍କରେ ଡିସିପି ଜଗମୋହନ ମୀନା ଗଣମାଧ୍ୟମକୁ ଦେଇଥିବା ଏକ ବିବୃତ୍ତିରେ ଉଲ୍ଲେଖ କରିଛନ୍ତି, ଏହି ଘଟଣାରେ ଜଣଙ୍କୁ ଅଟକ ରଖି ପଚରାଉଚରା କରାଯାଉଛି । ଉକ୍ତ ଯୁବକ ପୁଲିସକୁ ଦେଇଥିବା ବୟାନ ଅନୁସାରେ ବିଦ୍ୟାଧର ଅପହର୍ତ୍ତାଙ୍କ କବଳରେ ଥିବା ବେଳେ ଆତ୍ମହତ୍ୟା କରିଦେଇଥିଲେ । ଅପହର୍ତ୍ତାମାନେ ଭୟରେ ବିଦ୍ୟାଧରଙ୍କ ମୃତଦେହକୁ ଆଣି ଏଠାରେ ଫିଙ୍ଗି ଦେଇ ପଳାଇଥିଲେ । ବିଦ୍ୟାଧର ଚାକିରି କରାଇ ଦେବା ବାହାନାରେ ଅନେକଙ୍କଠାରୁ ଟଙ୍କା ନେଇଥିଲେ । ସେମାନଙ୍କ ମଧ୍ୟରୁ କେତେଜଣ ଗତ ୧୫ ତାରିଖରେ ତାଙ୍କୁ ଅପହରଣ କରି ନେଇଥିଲେ । ଟଙ୍କା ଫେରସ୍ତ ପାଇଁ ବିଦ୍ୟାଧରଙ୍କୁ ମୁଣ୍ଡ ଜାମିନ୍ ରଖିଥିଲେ । ପରିବାର ଲୋକଙ୍କ ନିକଟରେ ୨ କୋଟି ଟଙ୍କା ଦାବି କରିଥିଲେ ।
