ୱେଲିଂଟନ,୧୬/୧୧: ନ୍ୟୁଜିଲାଣ୍ଡର ଭେଟେରାନ ପେସ୍ ବୋଲର ଟିମ୍ ସାଉଦି ଟେଷ୍ଟ କ୍ରିକେଟରୁ ଅବସର ଘୋଷଣା କରିଛନ୍ତି । ଚଳିତ ବିଶ୍ୱ ଟେଷ୍ଟ ଚାମ୍ପିଅନସିପ୍ ଚକ୍ର (୨୦୨୩- ୨୫) ଶେଷ ହେବା ସହ ସେ ଦୀର୍ଘ ୧୭ବର୍ଷର କ୍ୟାରିୟରରେ ପୂର୍ଣ୍ଣଛେଦ ପକାଇବେ ବୋଲି ସ୍ପଷ୍ଟ କରି ଦେଇଛନ୍ତି । ଆସନ୍ତା ଇଂଲଣ୍ଡ ବିପକ୍ଷ ଘରୋଇ ଟେଷ୍ଟ ସିରିଜ ଖେଳି ସାଉଦି ବିଦାୟୀ ନେଇପାରନ୍ତି । ଯଦି ନ୍ୟୁଜିଲାଣ୍ଡ ଟେଷ୍ଟ ଚାମ୍ପିଅନସିପ୍ ଫାଇନାଲ୍କୁ ଉନ୍ନୀତ ହୁଏ, ତା’ହେଲେ ସେ ଆସନ୍ତା ବର୍ଷ ଫାଇନାଲ୍ (ଜୁନ ୧୧ରୁ ୧୫ତାରିଖ) ଖେଳି ଅବସର ନେବେ ।
ସାଉଦି ଅବସର ଘୋଷଣା କରି କହିଛନ୍ତି ଯେ, ଗତ ଭାରତ ବିପକ୍ଷ ସିରିଜ ଶେଷ ହେବା ପରେ ମୁଁ ଅବସର ଘୋଷଣା କରିବାର ଥିଲା । ମାତ୍ର ଦଳର ଟେଷ୍ଟ ଚାମ୍ପିଅନସିପ୍ ଫାଇନାଲ୍ ଖେଳିବା ସମ୍ଭାବନା ଥିବାରୁ ନିଷ୍ପତ୍ତି ବଦଳାଇଥିଲି । ଦୀର୍ଘ ୧୭ବର୍ଷ ଧରି ନ୍ୟୁଜିଲାଣ୍ଡ ପକ୍ଷରୁ ପ୍ରତିନିଧିତ୍ୱ କରିଥିବାରୁ ଗର୍ବ ଅନୁଭବ କରୁଛି । ଏବେ ଅବସର ସମୟ ଆସିଯାଇଛି ।’ ସାଉଦି ୨୦୦୮ରେ ଇଂଲଣ୍ଡ ବିପକ୍ଷରେ ଟେଷ୍ଟ ପଦାର୍ପଣ କରିଥିଲେ । ଏହାପରେ ସେ ଦଳର ସ୍ଥାୟୀ ସଦସ୍ୟ ରହି ଆସିଥିଲେ ।
ସେ ହେଉଛନ୍ତି ନ୍ୟୁଜିଲାଣ୍ଡର ସର୍ବାଧିକ ୱିକେଟ୍ ହାସଲକାରୀ ବୋଲର । ସେ ୩ଟି ଫର୍ମାଟକୁ ମିଶାଇ ମୋଟ ୭୭୦ଟି ୱିକେଟ୍ ନେଇ ସାରିଛନ୍ତି । ଟେଷ୍ଟରେ ୧୦୪ଟି ମ୍ୟାଚ୍ ଖେଳି ୩୮୫ଟି ୱିକେଟ୍ ନେଇଥିବାବେଳେ ଦିନିକିଆରେ ୧୬୧ ମ୍ୟାଚ୍ରୁ ୨୨୧ଟି ଏବଂ ଟି-ଟ୍ୱେଣ୍ଟିରେ ୧୨୬ ମ୍ୟାଚ୍ରୁ ୧୬୪ଟି ୱିକେଟ୍ ହାସଲ କରିଛନ୍ତି । କ୍ୟାରିୟର ମଧ୍ୟରେ ସେ ୪ଥର ଦିନିକିଆ ବିଶ୍ୱକପ୍, ୭ଥର ଟି-ଟ୍ୱେଣ୍ଟି ବିଶ୍ୱକପ୍, ୨ଥର ଚାମ୍ପିଅନ୍ସ ଟ୍ରଫି ଏବଂ ବିଶ୍ୱ ଟେଷ୍ଟ ଚାମ୍ପିଅନସିପ୍ ଖେଳିଛନ୍ତି ।
