ପାଟନା: ବିହାରର ପୂର୍ବତନ ମୁଖ୍ୟମନ୍ତ୍ରୀ ଲାଲୁ ଯାଦବଙ୍କ ବଡ଼ ପୁଅ ତେଜପ୍ରତାପ ଯାଦବ ଜଣେ ପୋଲିସ ଅଧିକାରୀଙ୍କୁ ଧମକ ଦେବା ସହ ହୋଲି ଅବସରରେ ନାଚିବାକୁ ବାଧ୍ୟ କରିଛନ୍ତି । ଏହି ଘଟଣାର ଏକ ଭିଡିଓ ମଧ୍ୟ ସାମ୍ନାକୁ ଆସିଛି । ତେଜପ୍ରତାପ ଯାଦବ ମଞ୍ଚ ଉପରେ ବସି ତଳେ ବସିଥିବା ଲୋକଙ୍କୁ ମାଇକ୍ ଧରି ନିର୍ଦ୍ଦେଶ ଦେଉଥିବାର ଦେଖାଯାଇଛି । ଏହି ସମୟରେ ସେ ଜଣେ ପୋଲିସକର୍ମୀଙ୍କୁ 'ନୃତ୍ୟ' କରିବାକୁ ବାଧ୍ୟ କରିଛନ୍ତି । ଏହା ସହିତ ଯଦି ସେ ସେମାନଙ୍କ କଥା ନ ମାନିବେ ତେବେ ତାଙ୍କୁ ନିଲମ୍ବିତ କରିବାକୁ ମଧ୍ୟ ଧମକ ଦେଇଛନ୍ତି ତେଜପ୍ରତାପ । ଏହି ଭିଡିଓଟି ପାଟନାରେ ତେଜପ୍ରତାପ ଯାଦବଙ୍କ ଘରେ ଆୟୋଜିତ କାର୍ଯ୍ୟକ୍ରମର ବୋଲି ଜଣାପଡ଼ିଛି ।
VIDEO | A policeman was seen dancing on the instruction of RJD leader Tej Pratap Yadav during Holi celebration at his residence in Patna. #tejpratapyadav #Holi #Patna pic.twitter.com/oCIP0kL03r
— Press Trust of India (@PTI_News) March 15, 2025
ତେଜପ୍ରତାପ ଯାଦବଙ୍କ ଏହି ଭିଡିଓ ସାମ୍ନାକୁ ଆସିବା ପରେ ବିହାରର ରାଜନୀତି ସରଗରମ ହୋଇଛି । ଜେଡିୟୁର ରାଷ୍ଟ୍ରୀୟ ମୁଖପାତ୍ର ରାଜୀବ ରଞ୍ଜନ ଏହି ଭିଡିଓ ଉପରେ କହିଛନ୍ତି ଯେ, ଏବେ ବିହାରରେ ଏପରି କାର୍ଯ୍ୟକଳାପ ପାଇଁ କୌଣସି ସ୍ଥାନ ନାହିଁ । ଜଙ୍ଗଲ ରାଜର ଯୁଗ ଶେଷ ହୋଇଛି, କିନ୍ତୁ ଲାଲୁ ଜୀଙ୍କ ପ୍ରଥମ ରାଜକୁମାରଙ୍କ କାର୍ଯ୍ୟ ଦେଖନ୍ତୁ । ସେ ଜଣେ ପୋଲିସ କର୍ମଚାରୀଙ୍କୁ ନାଚିବାକୁ ନିର୍ଦ୍ଦେଶ ଦେଉଛନ୍ତି ଏବଂ ଯଦି ସେ ନ ମାନିଲେ କାର୍ଯ୍ୟାନୁଷ୍ଠାନର ଧମକ ଦେଉଛନ୍ତି। ଲାଲୁ ପରିବାରକୁ ବୁଝିବାକୁ ପଡିବ ଯେ, ବିହାର ଏବେ ବଦଳି ଯାଇଛି । ପରିବର୍ତ୍ତିତ ବିହାରରେ ଏପରି କାର୍ଯ୍ୟ ପାଇଁ କୌଣସି ସ୍ଥାନ ନାହିଁ ବୋଲି ସେ କହିଛନ୍ତି ।
#WATCH | On video of Police personnel complying with RJD leader Tej Pratap Yadav's instructions to dance at the Holi celebration at his residence in Patna, BJP spokesperson Shehzad Poonawalla says, "Like father, like son. First, the father - as the then CM used to make law dance… pic.twitter.com/mkkv2NYfZi
— ANI (@ANI) March 15, 2025
ତେଜପ୍ରତାପ ଯାଦବଙ୍କ ଏହି ଭିଡିଓ ସାମ୍ନାକୁ ଆସିବା ପରେ, ଭାରତୀୟ ଜନତା ପାର୍ଟିର ମୁଖପାତ୍ର ଶେହଜାଦ ପୁନାୱାଲା କହିଛନ୍ତି ଯେ, ‘ଯେପରି ପିତା ସେହିପରି ପୁଅ । ପୂର୍ବରୁ ତତ୍କାଳୀନ ମୁଖ୍ୟମନ୍ତ୍ରୀ ଭାବରେ ପିତା ଆଇନକୁ ନିଜ ତାଳେ ତାଳେ ନଚାଉଥିଲେ ଏବଂ ବିହାରକୁ ଜଙ୍ଗଲ ରାଜରେ ପରିଣତ କରିଥିଲେ । ଏବେ ପୁଅ କ୍ଷମତା ବାହାରେ ଥିବା ସତ୍ତ୍ୱେ ଧମକ ଏବଂ ଚାପ ମାଧ୍ୟମରେ ଆଇନ ଓ ଆଇନର ରକ୍ଷକମାନଙ୍କୁ ନିଜ ତାଳେ ତାଳେ ନଚାଇବାକୁ ଚେଷ୍ଟା କରୁଛନ୍ତି । ଯଦି ପୋଲିସ କର୍ମଚାରୀ ନାଚୁ ନାହାନ୍ତି ତେବେ ସେ ନିଲମ୍ବିତ କରିବାକୁ ଧମକ ଦେଉଛନ୍ତି । ଏହା ଦର୍ଶାଉଛି ଯେ, ଆରଜେଡି ଜଙ୍ଗଲ ରାଜରେ ବିଶ୍ୱାସ କରେ । ଯଦି ସେମାନେ ଭୁଲରେ ମଧ୍ୟ କ୍ଷମତାକୁ ଆସନ୍ତି, ତେବେ ସେମାନେ ଆଇନ ଭାଙ୍ଗିବେ ଏବଂ ଆଇନର ରକ୍ଷକମାନଙ୍କୁ ନଚାଇବେ । ଏହା ଏକ ଟ୍ରେଲର । ତେଣୁ ସେମାନଙ୍କୁ କ୍ଷମତାରୁ ଦୂରେଇ ରଖିବା ଗୁରୁତ୍ୱପୂର୍ଣ୍ଣ ବୋଲି ପୁନାୱାଲା କହିଛନ୍ତି ।
