କେନ୍ଦୁଝର, ୩୦/୧୦:୧୧ କେଭି ବିଦ୍ୟୁତ୍ ସଂସ୍ପର୍ଶରେ ଆସି ଟେଣ୍ଟ କର୍ମଚାରୀ ମୃତ । ମୃତକ ସରେଣ୍ଡା ଅଞ୍ଚଳର ଜଗମୋହନ ମୁଣ୍ଡାଙ୍କ ପୁଅ ନରେନ୍ଦ୍ର ମୁଣ୍ଡା ବୋଲି ଜଣାପଡ଼ିଛି । ସେ ବଡ଼ବିଲ ସ୍ଥିତ ମନିଷା ଟେଣ୍ଟ ହାଉସରେ କାମ କରୁଥିଲେ । କେନ୍ଦୁଝର ଜିଲ୍ଲା ବଡ଼ବିଲ ଷ୍ଟେସନ ରୋଡ଼ରେ ଏଭଳି ଅଘଟଣ ଘଟିଛି ।
ସୂଚନା ମୁତାବକ, ନରେନ୍ଦ୍ର ମୁଣ୍ଡା ଦୀପାବଳି ପାଇଁ ବୁଧବାର ସକାଳେ ବଡ଼ବିଲ ଷ୍ଟେସନ ରୋଡ଼ ସ୍ଥିତ ଜଣେ ବ୍ୟକ୍ତିଙ୍କ ଘରେ ଲିଚୁ ଲାଇଟ୍ ଲଗାଉଥିବାବେଳେ ଏହି ଅଘଟଣ ଘଟିଥିଲା । ଅସାବଧାନତା କାରଣରୁ ଘର ଉପର ଦେଇ ଯାଇଥିବା ୧୧ କେଭି ବିଦ୍ୟୁତ୍ ତାର ସଂସ୍ପର୍ଶରେ ଆସିଯାଇଥିଲେ । ଏହା ଦେଖି ସ୍ଥାନୀୟଲୋକେ ତୁରନ୍ତ ତାଙ୍କୁ ସେଠାରୁ ଉଦ୍ଧାର କରି ବଡ଼ବିଲ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ଚିକିତ୍ସା ପାଇଁ ନେଇଥିଲେ । ସେଠାରେ ତାଙ୍କର ମୃତ୍ୟୁ ଘଟିଥିଲା । ପରେ ଏହି ଘଟଣା ସମ୍ପର୍କରେ ବଡ଼ବିଲ ପୋଲିସକୁ ଅବଗତ କରାଇଥିଲେ । ଖବର ପାଇ ଘଟଣାସ୍ଥଳରେ ବଡ଼ବିଲ ପୋଲିସ ପହଞ୍ଚି ମୃତଦେହକୁ ଜବତ କରି ବ୍ୟବଚ୍ଛେଦ ପାଇଁ ପଠାଇବା ସହ ଅଧିକ ତଦନ୍ତ ଜାରି ରଖିଛି ।
