ଭୁବନେଶ୍ଵର, ୩୦/୧୧ : ଡିଜିପି ସମ୍ମିଳନୀରେ ଆତଙ୍କୀ ଆକ୍ରମଣ ପାଇଁ ଧମକ। ଗୁରୁପତୱନ୍ତ ପନ୍ନୁ ନାଁରେ ଓଡ଼ିଆ ସାମ୍ବାଦିକଙ୍କୁ ଆସିଲା ଧମକପୂର୍ଣ୍ଣ ମେଲ୍। ଖଲିସ୍ତାନୀ ଉଗ୍ରବାଦୀ ପନ୍ନୁ ନାଁରେ ଆସିଛି ଧମକ। ଭୁବନେଶ୍ଵର ବିମାନ ବନ୍ଦରକୁ କରାଯାଇଛି ଟାର୍ଗେଟ୍। ମେଲ୍ରେ ରହିଛି ଡିଜିପି ସମ୍ମିଳନୀ ଭଣ୍ଡୁର ଚେତାବନୀ ଅଡ଼ିଓ। ଆକ୍ରମଣ ଧମକ ମିଳିବା ପରେ କମିଶନରେଟ୍ ପୋଲିସର ବଢିଲା ଟେନସନ୍। ଭୁବନେଶ୍ୱରକୁ ଆସିଲେ ଅତିରିକ୍ତ ଫୋର୍ସ।
ଭୁବନେଶ୍ଵରରେ ୩ ଦିନିଆ ଡିଜିପି ସମ୍ମିଳନୀ ଚାଲିଛି। ଏହି ଅବସରରେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି, ସ୍ଵରାଷ୍ଟ୍ର ମନ୍ତ୍ରୀ ଅମିତ ଶାହ, ଏନଏସଏ ଅଜିତ ଡୋଭାଲ ଓଡ଼ିଶା ଗସ୍ତରେ ଆସିଛନ୍ତି। ଆଜି ଡିଜିପି ସମ୍ମିଳନୀର ଦ୍ଵିତୀୟ ଦିନରେ ଲୋକସେବା ଭବନରେ ବିଭିନ୍ନ କାର୍ଯ୍ୟକ୍ରମ ରହିଛି। ଏହାରି ମଧ୍ୟରେ ଖଲିସ୍ତାନୀ ଆତଙ୍କୀ ଗୁରପତୱନ୍ତ ପନ୍ନୁ ନାଁରେ ଜଣେ ଓଡ଼ିଆ ସାମ୍ବାଦିକଙ୍କୁ ଧମକପୂର୍ଣ୍ଣ ମେଲ୍ ଆସିଛି। ଏହି ମେଲ୍ରେ ଆସନ୍ତାକାଲି ଆକ୍ରମଣ ପାଇଁ ଅଡିଓ ଜାରି କରାଯାଇଛି। ଏହି ଅଡିଓରେ ଭୁବନେଶ୍ଵର ବିମାନବନ୍ଦରକୁ ଟାର୍ଗେଟ୍ କରାଯାଇଛି। ଆସନ୍ତାକାଲି ଭୁବନେଶ୍ଵର ବିମାନ ବନ୍ଦରରୁ ଓଡ଼ାଣ ନଭରିବାକୁ ଚେତାବନୀ ଦିଆଯାଇଛି। ଡିଜିପି ସମ୍ମିଳନୀ ଭଣ୍ଡୁର କରିବାକୁ କୁହାଯାଇଛି। ଏହା ସହ ଖଲିସ୍ତାନୀ ପତାକା ଉଡାଇଲେ ୨୫ ଲକ୍ଷର ପୁରସ୍କାର ରାଶି ଦିଆଯିବ ବୋଲି ମଧ୍ୟ ଉଲ୍ଲେଖ କରାଯାଇଛି। ଏନେଇ ଉକ୍ତ ସାମ୍ବାଦିକ ଡିଜିପିଙ୍କୁ ଜଣାଇଛନ୍ତି। ଥାନାରେ ଅଭିଯୋଗ କରିବେ ବୋଲି ମଧ୍ୟ କହିଛନ୍ତି। ସେପଟେ ଆତଙ୍କବାଦୀ ଧମକ ଆସିଲା ପରେ କମିଶନରେଟ୍ ପୋଲିସର ଟେନସନ୍ ବଢିଛି। ରାଜଧାନୀରେ ସୁରକ୍ଷା ବ୍ୟବସ୍ଥା କଡ଼ାକଡ଼ି କରାଯାଇଛି। ସୁରକ୍ଷା ଦାୟିତ୍ୱରେ ଥିବା ସମସ୍ତ ଅଧିକାରୀଙ୍କୁ ଆଲର୍ଟ କରାଯାଇଛି। ଅତିରିକ୍ତ ଫୋର୍ସ ନିୟୋଜିତ କରାଯାଇଛି। ସମସ୍ତ ଫୋନ କଲ ଉପରେ ନଜର ରଖାଯାଇଛି।
