ମୁମ୍ବାଇ: ସାରା ଦେଶରେ ଗଣେଶ ଚତୁର୍ଥୀ ପାଳନ କରାଯାଉଛି । ଲୋକମାନେ ଏହି ପର୍ବକୁ ବଡ଼ ଧୁମଧାମରେ ପଳନ କରୁଛନ୍ତି । ସେହିଭଳି ମହାରାଷ୍ଟ୍ରରେ ଠାକରେ ବ୍ରଦର୍ସ ଏକାଠି ଗଣେଶ ଚତୁର୍ଥୀ ପାଳନ କରିଛନ୍ତି । ଶିବସେନା (ୟୁବିଟି) ନେତା ଉଦ୍ଧବ ଠାକରେ ନିଜ ପରିବାର ସହିତ ତାଙ୍କ ଭାଇ ଏବଂ ମହାରାଷ୍ଟ୍ର ନବନିର୍ମାଣ ସେନା (ଏମଏନଏସ୍) ମୁଖ୍ୟ ରାଜ ଠାକରେଙ୍କ ବାସଭବନ 'ଶିବତୀର୍ଥ'କୁ ଯାଇଥିଲେ। ରାଜ ଠାକରେ ପ୍ରତିବର୍ଷ ସହରର ଦାଦର ଅଞ୍ଚଳରେ ଥିବା ତାଙ୍କ ବାସଭବନରେ ଭଗବାନ ଗଣେଶଙ୍କ ପୂଜା କରନ୍ତି । ଶିବସେନା ନେତା ଆଦିତ୍ୟ ଠାକରେ ଏବଂ ତାଙ୍କ ମାଆ ରଶ୍ମି ମଧ୍ୟ ଉଦ୍ଧବଙ୍କ ସହିତ ରାଜ ଠାକରେଙ୍କ ଘରକୁ ଯାଇଥିଲେ ଏବଂ ପରିବାର ସହିତ ଶ୍ରୀ ଗଣେଶଙ୍କୁ ଦର୍ଶନ କରିଥିଲେ।
ମୁମ୍ବାଇରେ ବିଏମସି ନିର୍ବାଚନ ପୂର୍ବରୁ ରାଜ ଠାକରେଙ୍କ ଘରକୁ ଉଦ୍ଧବ ଯିବା ଘଟଣା ବହୁତ ଗୁରୁତ୍ୱପୂର୍ଣ୍ଣ ବୋଲି ବିବେଚନା କରାଯାଉଛି। ଉଭୟ ପରିବାର ପ୍ରାୟ ୨ ଘଣ୍ଟା ଧରି ଏକାଠି ରହିଥିଲେ। ପ୍ରାୟ ୨୨ ବର୍ଷ ପରେ ଉଦ୍ଧବ, ରାଜ ଠାକରେଙ୍କ ଘରକୁ ଯାଇଥିଲେ । ଉଭୟ ପରିବାର ଏକାଠି ଗଣେଶ ଉତ୍ସବ ପାଳନ କରିଥିଲେ । ଏହି ସମୟରେ ଉଭୟ ନେତା ସେମାନଙ୍କ ଜେଜେବାପା ପ୍ରବୋଧନକର ଠାକରେ ଏବଂ ବାଲାସାହେବ ଠାକରେଙ୍କ ଫଟୋ ସାମ୍ନାରେ ଠିଆ ହୋଇ ଫଟୋ ମଧ୍ୟ ଉଠାଇଥିଲେ । ଦୁଇ ଭାଇଙ୍କ ସାକ୍ଷାତର ଫଟୋ ମଧ୍ୟ ସୋସିଆଲ ମିଡିଆରେ ପ୍ରକାଶ ପାଇଛି ।
ଗତ ତିନି ମାସ ମଧ୍ୟରେ ତୃତୀୟ ଥର ପାଇଁ ଦୁଇ ଭାଇ ଏକାଠି ହୋଇଥିଲେ । ପୂର୍ବରୁ ମରାଠୀ ଭାଷା ବିବାଦ ସମୟରେ ଉଦ୍ଧବ ଠାକରେ ଏବଂ ରାଜ ଠାକରେ ଗୋଟିଏ ମଞ୍ଚରେ ଏକାଠି ହୋଇଥିଲେ । ଉଦ୍ଧବ ଠାକରେଙ୍କ ଜନ୍ମଦିନ ଅବସରରେ ମାତୋଶ୍ରୀ ଯାଇ ତାଙ୍କୁ ଅଭିନନ୍ଦନ ଜଣାଇଥିଲେ ରାଜ ଠାକରେ । ମାତୋଶ୍ରୀରେ ପହଞ୍ଚିବା ପରେ ଶିବସେନା ସମର୍ଥକମାନେ ରାଜଙ୍କୁ ଭବ୍ୟ ସ୍ୱାଗତ କରିଥିଲେ । ଉଭୟ ଭାଇ ବାଲାସାହେବ ଠାକରେଙ୍କ ଫଟୋ ସାମ୍ନାରେ ଫଟୋ ଉଠାଇଥିଲେ । ଆଗାମୀ ବିଏମସି ନିର୍ବାଚନରେ ଉଭୟ ଭାଇ ରାଜ ଏବଂ ଉଦ୍ଧବ ଏକାଠି ହୋଇପାରନ୍ତି ବୋଲି କଳ୍ପନାଜଳ୍ପନା ଚାଲିଛି । କିନ୍ତୁ ପରିବାର ଭାବରେ ଏକାଠି ହୋଇଥିବା ଭାଇମାନେ ଏପର୍ଯ୍ୟନ୍ତ ନିର୍ବାଚନୀ ରାଜନୀତିରେ ଏକାଠି ହେବା ବିଷୟରେ କୌଣସି ଘୋଷଣା କରିନାହାନ୍ତି।
ସେହିପରି ୟୁବିଟି ନେତା ଏବଂ ବିଧାୟକ ମହେଶ ସାୱନ୍ତ କହିଛନ୍ତି ଯେ, ଏହା ଏକ ପାରିବାରିକ ବୈଠକ ଥିଲା ଏବଂ ଏହାକୁ ରାଜନୀତିର ଦୃଷ୍ଟିକୋଣରୁ ଦେଖାଯିବା ଉଚିତ୍ ନୁହେଁ। ଉଭୟ ଭାଇ ଏକାଠି ଅଛନ୍ତି ଏହା ଖୁସିର କଥା । କିନ୍ତୁ ଉଭୟ ନେତା ନିର୍ବାଚନୀ ରାଜନୀତିରେ ଏକାଠି ହେବା ବିଷୟରେ ନିଷ୍ପତ୍ତି ନେବେ । କିନ୍ତୁ ଆମର ଇଚ୍ଛା ହେଉଛି, ସେମାନେ ଏକାଠି ହୁଅନ୍ତୁ।
