ବାଲିପାଟଣା,୧୭/୧୧: ବିଚ୍ ବଜାରରେ ଆତଙ୍କ କରି ଟ୍ରକ୍ ଭାଙ୍ଗିଲା । ପରେ ଟ୍ରକ୍‌ ହେଲପରଙ୍କ ହାତ ଭାଙ୍ଗି ପୋଲିସକୁ ଧକ୍କା ମାରି ଫେରାର ହେଲା ଦୁବୃତ୍ତ । ରାଜଧାନୀ ଉପକଣ୍ଠ ବାଲିପାଟଣା ଥାନା ଅନ୍ତର୍ଗତ ବନମାଳିପୁର ଫାଣ୍ଡି ବନମାଳିପୁର ବଜାରରେ ଏଭଳି ଏକ ଘଟଣା ଘଟିଛି ।

ସୂଚନା ମୁତାବକ, ପଶ୍ଚିମବଙ୍ଗରୁ ଏକ ଆଳୁ ଟ୍ରକ ବନମାଳିପୁର ଆସିଥିଲା । ଏହା ଦେଖି ସ୍ଥାନୀୟ ଅଞ୍ଚଳର ପାର୍ଥ ସେନାପତି ଟ୍ରକ୍ ଚାଳକଙ୍କୁ ଦାଦା ବଟି ମାଗି ଥିଲା । ଏଥିରେ ଚାଳକ ଜଣକ ରାଜି ନହେବାରୁ ଦୁର୍ବୃତ୍ତ ଜଣକ ଟ୍ରକ୍ ହେଲପରକୁ ମାଡ଼ ମାରିବା ସହ ହାତ ମଧ୍ୟ ଭାଙ୍ଗି ଦେଇଥିଲା । ପରେ ଚାଳକକୁ ମଧ୍ୟ ମାଡ ମାରିଥିଲା । ରାଗ ଶାନ୍ତ ନ ହେବାରୁ ଟ୍ରକର ସାମ୍ନା କାଚକୁ ଏକ ଲୁହା ରଡ୍‌ ଦ୍ଵାରା ଭାଙ୍ଗି ଦେଇଥିଲା । ଏହା ଦେଖି ସ୍ଥାନୀୟଲୋକେ ତୁରନ୍ତ ପୋଲିସକୁ ଖବର ଦେଇଥିଲେ । ଖବର ପାଇ ବନମାଳିପୁର ଫାଣ୍ଡି ପୋଲିସ ଘଟଣା ସ୍ଥଳରୁ ଦୁର୍ବୃତ୍ତକୁ କାବୁ କରି ଫାଣ୍ଡିକୁ ନେବା ବେଳେ ଦୁର୍ବୃତ୍ତ ଜଣକ ପୋଲିସକୁ ଧକ୍କା ମାରି ଫେରାର ହୋଇଯାଇଛି । ଏହି ଘଟଣାକୁ ନେଇ ପୋଲିସ ଏକ ମାମଲା ରୁଜୁ କରିବା ସହ ଦୁର୍ବୃତ୍ତକୁ ଧରିବା ପାଇଁ ଚେଷ୍ଟା ଚଳାଇଛି ।