ନୂଆଦିଲ୍ଲୀ: ୧୭୬୫ରୁ ୧୯୦୦ ମଧ୍ୟରେ ଭାରତରୁ ୬୪, ୮୨୦ ବିଲିୟନ୍ ଡଲାରର ସଂପତ୍ତି ଲୁଟ୍ କରିଥିଲା ବ୍ରିଟେନ୍ । କିନ୍ତୁ ଏହାର ଫାଇଦା ସେଠାକାର ହାତଗଣତି କେତେ ଜଣ ଧନୀ ବ୍ୟକ୍ତିଙ୍କୁ ମିଳିଛି । ୧୩୫ ବର୍ଷରୁ ଅଧିକ ସମୟର ଏହି ଔପନିବେଶିକ କାଳରେ ବ୍ରିଟେନ୍ ଲୁଟ୍ କରିଥିବା ସଂପତ୍ତିର ଅଧାରୁ ଅଧିକ ଦେଶର ୧୦ ପ୍ରତିଶତ ଧନୀ ବ୍ୟକ୍ତିଙ୍କ ପାଖକୁ ଯାଇଛି । ଭାରତରୁ ଲୁଟ୍ ହୋଇଥିବା ସଂପତ୍ତିରୁ ୩୩, ୮୦୦ ବିଲିୟନ୍ ଡଲାରର ସଂପତ୍ତି ବ୍ରିଟେନ୍ର ୧୦ ପ୍ରତିଶତ ଧନୀଙ୍କ ପାଖରେ ରହିଛି ବୋଲି ‘ଅକ୍ସଫାମ ଇଣ୍ଟରନ୍ୟାସନାଲ୍’ ରିପୋର୍ଟରୁ ଜଣାପଡ଼ିଛି । ତେବେ ଏହି ରିପୋର୍ଟ ଓ୍ବାର୍ଲଡ୍ ଇକୋନୋମିକ୍ ଫୋରମର ବାର୍ଷିକ ବୈଠକର ପ୍ରଥମ ଦିନରେ ପ୍ରକାଶ ପାଇଛି ।
ରିପୋର୍ଟର ଶୀର୍ଷକ ‘ଟେକର୍ସ, ନଟ୍ ମେକର୍ସ’ ଥିବା ବେଳେ ଏହାକୁ ସୋମବାର ସାର୍ବଜନୀନ କରାଯାଇଛି । ଏଥିରେ ବିଭିନ୍ନ ରିପୋର୍ଟ ଏବଂ ଅଧ୍ୟୟନକୁ ନେଇ ଦାବି କରାଯାଇଛି ଯେ, ଆଧୁନିକ ବହୁରାଷ୍ଟ୍ରୀୟ ନିଗମ (ମଡର୍ଣ୍ଣ ମଲ୍ଟିନ୍ୟାସନାଲ୍ କର୍ପୋରେସନ୍) ଉପନିବେଶବାଦ ଯୋଗୁଁ ତିଆରି ହୋଇଛି । ଅକ୍ସଫାମ୍ ପକ୍ଷରୁ କୁହାଯାଇଛି ‘ଐତିହାସିକ ଔପନିବେଶିକ ଯୁଗରେ ବ୍ୟାପକ ଅସମାନତା ଏବଂ ଲୁଟ୍ର ମାନସିକତା ଆଧୁନିକ ଜୀବନକୁ ଆକାର ଦେଉଛି । ଏହା ଏକ ଅତ୍ୟଧିକ ଅସମାନ ବିଶ୍ବର ନିର୍ମାଣ କରିଛି । ଏମିତି ଏକ ବିଶ୍ବ ଯାହା ବର୍ଣ୍ଣବୈଷମ୍ୟବାଦକୁ ଆଧାର କରି ବିଭାଜିତ ହେବାରେ ଲିପ୍ତ ରହିଛି । ଏମିତି ଏକ ବିଶ୍ବ ଯେଉଁଠି, ଦକ୍ଷିଣରୁ ସଂପତ୍ତି ଲୁଟି ପାଶ୍ଚାତ୍ୟର ସବୁଠାରୁ ଧନୀମାନଙ୍କୁ ଫାଇଦା ଦିଆଯାଉଛି ।
ବିଭିନ୍ନ ଅଧ୍ୟୟନକୁ ଆଧାର କରି ଅକ୍ସଫାମ୍ ଆକଳନ କରିଛି ଯେ, ୧୭୬୫ ଏବଂ ୧୯୦୦ ମଧ୍ୟରେ ବ୍ରିଟେନ୍ର ସବୁଠାରୁ ଧନୀ ଶ୍ରେଣୀର ୧୦ ପ୍ରତିଶତ ବ୍ୟକ୍ତିଙ୍କୁ ଭାରତରୁ ୩୩, ୮୦୦ ବିଲିୟନ୍ ଆମେରିକୀୟ ଡଲାରର ସଂପତ୍ତି ଦିଆଯାଇଛି । ଏହି ଧନ, ଲଣ୍ଡନର ଭୂପୃଷ୍ଠକୁ ଢ଼ାଙ୍କିବା ଲାଗି ୫୦ ବ୍ରିଟିଶ୍ ପାଉଣ୍ଡର ଯେତିକି ନୋଟ୍ ଦରକାର ପଡ଼ିବ ତାଠାରୁ ୪ ଗୁଣ ଅଧିକ । ସେପଟେ ଔପନିବେଶିକ କାଳକୁ ବିଷାକ୍ତ ଗଛର ଫଳ ବୋଲି ଆଖ୍ୟା ଦେବା ସହ ରିପୋର୍ଟରେ ଦର୍ଶାଯାଇଛି, ଭାରତର କେବଳ ୦.୧୪ ପ୍ରତିଶତ ମାତୃଭାଷା ବ୍ୟବହାର ହେଉଛି ଏବଂ କେବଳ ୦.୩୫ ପ୍ରତିଶତ ଭାଷାକୁ ପଢ଼ାରେ ବ୍ୟବହାର କରାଯାଇଛି । ବ୍ରିଟିଶ ଶାସନ ସମୟରେ ଜାତି, ଧର୍ମ, ଲିଙ୍ଗ , ଭାଷା ନିର୍ବିଶେଷରେ ସବୁ କ୍ଷେତ୍ରରେ ଭାରତୀୟଙ୍କୁ ଶୋଷଣ କରାଯାଇଛି ଏବଂ ବିଭାଜନ କରାଯାଇଛି ବୋଲି ଅକ୍ସଫାମ୍ ରିପୋର୍ଟରେ କୁହାଯାଇଛି ।
