ଫୁଲବାଣୀ ୮/୧୦ : ନିଟରେ ସ୍ଥାନୀୟ ପେଞ୍ଜିସାହିର ଜଗା ମୁଖୀ ନାମକ ଜଣେ ଯୁବକଙ୍କ ମୃତ୍ୟୁ ହୋଇଥିଲା। ଜଗାଙ୍କୁ ହତ୍ୟା କରାଯାଇଥିବା ପ୍ରତିବାଦରେ ଗାନ୍ଧୀ ଛକଠାରେ ରାସ୍ତା ଉପରେ ଶବରଖି, ଟାୟାର୍ ଜାଳି ରାସ୍ତା ଅବରୋଧ କରିଛନ୍ତି ସ୍ଥାନୀୟ ବାସିନ୍ଦା।
ଜଗାଙ୍କୁ ଦାତପାଜୁ ଅଞ୍ଚଳର କିଛି ଯୁବକ ସଂଘବଦ୍ଧ ଭାବ ବାଡ଼େଇ ମାରି ଦେଇଥିବା ଅଭିଯୋଗ ହୋଇଛି। ଗୁରୁତର ଅବସ୍ଥାରେ ତାଙ୍କୁ ରବିବାର ବ୍ରହ୍ମପୁର ମେଡିକାଲକୁ ପଠା ଯାଇଥିଲା । ସେଠାରେ ସୋମବାର ତାଙ୍କର ମୃତ୍ୟୁ ହୋଇଥିଲା। ଏ ନେଇ ପରିବାର ପକ୍ଷରୁ ଟାଉନ ଥାନାରେ ଏତଲା ପରେ ପୁଲିସ୍ ମାମଲା ରୁଜୁ କରି ତଦନ୍ତ କରୁଛି । ଟାଉନ୍ ପୁଲିସ୍ କେତେଜଣଙ୍କୁ ଅଟକ ରଖିଛି ।
ଅପରପକ୍ଷେ ମୃତଦେହ ଫୁଲବାଣୀରେ ପହଞ୍ଚିବା ପରେ ପରିବାର ଲୋକେ ଓ ସାହିବାସିନ୍ଦା ଟାୟାର ଜାଳି ଜାତୀୟ ରାଜପଥ ଅବରୋଧ କରି ବସିଛନ୍ତି । ଫଳରେ ଫୁଲବାଣୀରୁ ଭୁବନେଶ୍ୱର, ବୌଦ୍ଧ, ବ୍ରହ୍ମପୁର ଅଞ୍ଚଳକୁ ଯାତାୟାତ ବାଧାପ୍ରାପ୍ତ ହୋଇଛି । ସଦର ଏସଡିପିଓ ସୁପ୍ରସନ୍ନ ମଲ୍ଲିକ, ତହସିଲ୍ଦାର ସଚ୍ଚିଦାନନ୍ଦ ନାୟକ, ଟାଉନ ଥାନାଧିକାରୀ କନକ କୁମାର ମାଝୀ ପହଞ୍ଚି ବୁଝାସୁଝା କରୁଛନ୍ତି । ଅଭିଯୁକ୍ତଙ୍କୁ ଗିରଫ ଦାବିରେ ଆନ୍ଦୋଳନକାରୀ ଅଡ଼ି ବସିଛନ୍ତି ।
