ନୂଆଦିଲ୍ଲୀ: ପ୍ରଥମେ କିଛି ଲୋକ ଫିଲ୍ମ ଦେଖିବା ପାଇଁ ଗଲେ। ଆଉ ତା ପରେ ଫିଲ୍ମ ଦେଖି ଏତେ ଅନୁପ୍ରାଣିତ ହୋଇଯାଇଥିଲେ ଯେ ପୁରା ଗାଁକୁ ନେଇ ମାଟିତଳେ ଲୁଚିରହିଥିବା ଖଜଣା ଖୋଜିବାରେ ଲାଗିଯାଇଥିଲେ। ଆପଣ ଏ ଖବର ପଢି ଆଶ୍ଚର୍ଯ୍ୟ ହେଉଥିବେ ନିଶ୍ଚୟ। କିନ୍ତୁ ଆପଣଙ୍କୁ ଆଶ୍ଚର୍ଯ୍ୟ ଲାଗିଲେ ବି ଘଟଣା ଟି ସତ। ଆଜ୍ଞା ହଁ କିଛି ଏମିତି ଘଟଛି ମଧ୍ୟପ୍ରଦେଶର ବୁରହନପୁରଠାରେ ଥିବା ଏକ ଗାଁରେ। ଯେଉଁଠି ଲୋକମାନେ ନିକଟରେ ରିଲିଜ ହୋଇଥିବା ଛାଭା ଫିଲ୍ମ ଦେଖି ଏତେ ଅନୁପ୍ରାଣିତ ହୋଇଯାଇଥିଲେ ଯେ ଏୈତିହାସିକ ପୃଷ୍ଟଭୂମି ଥିବା ଅଶୀରଗଡ ଦୁର୍ଗ ନିକଟସ୍ଥ ପଡିଆକୁ ଖୋଳି ସୁନା ଖୋଜିବାରେ ଲାଗିଯାଇଥିଲେ।
ଏନେଇ ବିଭିନ୍ନ ସାମାଜିକ ଗଣମାଧ୍ୟମରେ ଏହି ଭିଡିଓ ଭାଇରାଲ ହେବା ପରେ ଘଟଣା ସାମ୍ନାକୁ ଆସିଛି। ଖବର ମୁତାବକ ନିକଟରେ ମୁକ୍ତିଲାଭ କରିଥିବା ଅଭିନେତା ଭିକି କୌଶଲଙ୍କ ଛାଭା ଚଳଚ୍ଚିତ୍ରରେ ଲୁକ୍କାୟିତ ଧନ ସମ୍ପର୍କରେ କୁହାଯାଇଥିଲା। ମୋହଭିରେ ଥିବା ଏହି ସିନକୁ ଲୋକମାନେ ସତ ମାନିନେଇ ଦୁର୍ଗର ଚାରିପାଖେ ଥିବା ପଡିଆକୁ ଖୋଳି ପୋତାଧନ ଖୋଜିବାରେ ଲାଗିପଡିଥିଲେ। ଏହି ଭିଡିଓରେ ଲୋକମାନେ ଟର୍ଚ୍ଚ ଧରି କୋଦାଳରେ ପଡିଆ ଖୋଳି ମାଟିରେ ସୁନା ଖୋଜୁଥିବା ଦେଖାଯାଇଥିଲା।
ତେବେ ଭାଇରାଲ ହୋଇଥିବା ଏହି ଭିଡିଓରେ ଅନେକ ଲୋକ ସୁନା ମୋହର ପାଇଥିବା ନେଇ ଦାବି କରିଥିଲେ। କିନ୍ତୁ ଏହାକୁ ନେଇ ଆଧିକରିକ ସ୍ତରରେ କୌଣସି ପୃଷ୍ଟି କରାଯାଇନାହିଁ। ତେବେ ଜମି ମାଲିକମାନେ ଲୋକମାନଙ୍କ ଏପରି ପାଗଳପଣରେ ଅତ୍ୟନ୍ତ ଅସନ୍ତୁଷ୍ଟ ବ୍ୟକ୍ତ କରିଥିଲେ।
ଏ ସମ୍ପର୍କରେ ମତ୍ତଦେଇ ୱାସିମ ଖାନ ନାମକ ଜଣେ ସ୍ଥାନିୟ ଲୋକ କହିଛନ୍ତି ଯେ “ମୋଭି ଦେଖିବା ପରେ ଲୋକମାନଙ୍କ ମଧ୍ୟରେ ପୋତା ଧନ ପାଇବାକୁ ଗୋଟେ ପ୍ରକାର ପ୍ରତିଯୋଗିତା ଆରମ୍ଭ ହୋଇଯାଇଛି। ବହୁଳ ପରିମାଣରେ ଲୋକ ଆଶିରଗଡ ଦୁର୍ଗ ନିକଟରେ ଜମା ହୋଇ ସୁନା ଖୋଜିବାରେ ଲାଗିପଡିଛନ୍ତି। ସୁନା ପାଇବା ପାଇଁ ମାଟି ଖୋଳି ତନ୍ନତନ୍ନ କରି ଯାଞ୍ଚ କରୁଛନ୍ତି।”
ଏ ସମ୍ପର୍କରେ ଖବର ପାଇ ପୋଲିସ ଗଟମାସ୍ଥଳରେ ପହଞ୍ଚିବା ପରେ ଲୋକମାନେ ଘଟଣାସ୍ଥଳରୁ ଖସି ପଳାଇଥିଲେ। ତେବେ ସେମାନେ ଖୋଳିଥିବା ଗାତ ଗୁଡିକ ପୂର୍ବପରି ପଡିରହିଥିଲା। ପୋଲିସ କିଛି ଜଣଙ୍କୁ ଏନେଇ ପ୍ରଶ୍ନ ପଚାରିବା ପରେ ସେମାନେ ଘଟମାସ୍ଥଳରୁ ପାହୁଲାଏବି କିଛି ପାଇନଥିବା ପୋଲିସକୁ ଜଣାଇଛନ୍ତି। ତେବେ ଏନେଇ ବୁରହନପୁରର ଏସପି ଦେବେନ୍ଦ୍ର ପଟ୍ଟିଦାର କହିଛନ୍ତି ଯେ “ଆମେ ଏ ସମ୍ପର୍କରେ ସୂଚନା ପାଇଛୁ ଓ ଏନେଇ ତଦନ୍ତ ବି ଚଳାଇଛୁ। ଯଦି କେଉଁ ବି ଲୋକ ବେଆଇନ ଭାବେ ଖୋଳାଖୋଳି କରୁଥିବା ଧରାପଡନ୍ତି ତେବେ ତାଙ୍କ ବିରୁଦ୍ଧରେ ଆଇନଗତ କାର୍ଯ୍ୟାନୁଷ୍ଠାନ ନିଆଯିବ।”
