ଉଦଳା, ୦୯/୧୧ : ପାରିବାରିକ କଳହର କରୁଣ ପରିଣତି। ବୋହୂକୁ ମାରି ଟାଙ୍ଗିଦେଲେ ଶାଶୁଘର ଲୋକେ। ଖୁଣ୍ଟା ଥାନା ମାଠିଆଭଙ୍ଗା ଗ୍ରାମରେ ଏଭଳି ଅଭାବନୀୟ ଘଟଣା ଘଟିଛି। ଗ୍ରାମର ଆରତୀ ସେଠିଙ୍କୁ ତାଙ୍କ ସ୍ଵାମୀ, ଶାଶୁ ଓ ନଣନ୍ଦ ମିଶି ହତ୍ୟା କରିଥିବା ଅଭିଯୋଗ ହୋଇଛି। ପୋଲିସ ୩ ଜଣଙ୍କୁ ଅଟକ ରଖି ପଚରାଉଚରା କରୁଛି।
ସୂଚନାନୁଯାୟୀ, ଖୁଣ୍ଟା ଥାନା ମାଠିଆଭଙ୍ଗା ଗ୍ରାମର ଆରତୀ ସେଠିଙ୍କୁ ତାଙ୍କ ଶାଶୁ ଘର ଲୋକ ବାରମ୍ଵାର ନିର୍ଯାତନା ଦେଉଥିଲେ। ଏନେଇ ସେ ପୂର୍ବରୁ ଅନେକ ଥରେ ଏନେଇ ବାପଘରେ ଜଣାଇଥିଲେ। ଏପରିକି ବହୁବାର ଆରତୀ ତାଙ୍କ ବାପଘରେ ରହୁଥିଲେ। ତେବେ ଶୁକ୍ରବାର ହଠାତ୍ ଆରତୀଙ୍କ ଝୁଲନ୍ତା ମୃତଦେହ ଉଦ୍ଧାର ହୋଇଥିଲା। ତାଙ୍କ ସ୍ଵାମୀ ସୁମନ୍ତ ସେଠି ଏନେଇ ବାପଘରକୁ ଖବର ଦେଇଥିଲେ। ଝିଅ ଆତ୍ମହତ୍ୟା କରିଥିବା କହିଥିଲେ। ବାପଘର ଲୋକେ ଘଟଣାସ୍ଥଳରେ ପହଞ୍ଚି ଝିଅର ମୃତଦେହ ଦେଖିଥିଲେ। ହେଲେ ଝିଅର ଆତ୍ମହତ୍ୟା କଥାକୁ ବିଶ୍ଵାସ କରିପାରି ନଥିଲେ। ଶାଶୁଘର ଲୋକ ହତ୍ୟାକରି ଝିଅକୁ ଟାଙ୍ଗି ଦେଇଥିବା ଥାନାରେ ଅଭିଯୋଗ କରିଥିଲେ। ଅଭିଯୋଗ ପରେ ଖୁଣ୍ଟା ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିବା ସହ ତଦନ୍ତ ଆରମ୍ଭ କରିଛି। ସାଇଣ୍ଟିଫିକ୍ ଟିମ୍ ଘଟଣାସ୍ଥଳରେ ଆହୁରି ଅଧିକ ତଦନ୍ତ ଚଳାଇଛି। ଆରତୀଙ୍କ ସ୍ଵାମୀ ସୁମନ୍ତ ସେଠି, ଶାଶୁ ଶାନ୍ତିଲତା ସେଠି ଓ ନଣନ୍ଦ ତିଳତୋମା ସେଠିଙ୍କୁ ଥାନାରେ ଅଟକ ରଖି ପୋଲିସ ପଚରାଉଚରା କରୁଛି।
