ଭୁବନେଶ୍ୱର, ୨୮/୦୭ : ବଲାଙ୍ଗୀର ଜିଲ୍ଲା ଟିଟଲାଗଡ଼ରେ ୨୦ ହଜାର ଟଙ୍କାରେ ଶିଶୁ ବିକ୍ରି ଘଟଣାକୁ କଂଗ୍ରେସର ନିନ୍ଦା। କଂଗ୍ରେସ କହିଛି ଯେ, ୬୦ ବର୍ଷ ତଳେ ଓଡ଼ିଶାର ଯେଉଁ କରୁଣ ଚିତ୍ର ଆମେ ଦେଖିଥିଲେ, ୨୦୨୫ରେ ଠିକ୍ ସେହିଭଳି ଚିତ୍ର ସାମ୍ନାକୁ ଆସିଛି। ଗରିବ ବାପା-ମାଆ ଶିଶୁ କନ୍ୟାକୁ ଲାଳନ ପାଳନ କରିବାରେ ଅସମର୍ଥ ହେବାରୁ ଏଭଳି ଦାରୁଣ ଘଟଣା ଘଟିଛି। ରାଜ୍ୟରେ ଏଭଳି ଶିଶୁ ବିକ୍ରି ଘଟଣା ଲଜ୍ଜାଜନକ ଏବଂ ଦୁର୍ଭାଗ୍ୟଜନକ। ଗରିବ ବାପା ମା'ଙ୍କ ପାଖରେ ସରକାରୀ ସହାୟତା ନ ପହଞ୍ଚିବାରୁ ଏଭଳି ଘଟଣା ଘଟିଲା। ସରକାର କ'ଣ କରୁଛନ୍ତି ବୋଲି ପିସିସି ମୁଖପାତ୍ର ପ୍ରଶାନ୍ତ ଶତପଥୀ ପ୍ରଶ୍ନ କରିଛନ୍ତି।
ପିସିସି ସଭାପତିଙ୍କ ନିର୍ଦ୍ଦେଶ କ୍ରମେ ଏକ ତଥ୍ୟ ଅନୁଧ୍ୟାନକାରୀ ଟିମ୍ ଗଠନ ହୋଇଛି। ଏହି ଟିମ୍ ଆଜି ବଲାଙ୍ଗୀରି ଗସ୍ତ କରି ପିସିସିଙ୍କୁ ରିପୋର୍ଟ ଦେବ ବୋଲି ପିସିସି ମୁଖପାତ୍ର କହିଛନ୍ତି।
ପ୍ରକାଶ ଥାଉକି, ଟିଟଲାଗଡ଼ ବ୍ଲକ ଭାଲେଗାଁ ପଞ୍ଚାୟତ ବାରଡ଼େର ଗ୍ରାମର ନଳ ରଣା ତାଙ୍କର ଶିଶୁକନ୍ୟାକୁ ୨୦ ହଜାର ଟଙ୍କାରେ ବିକ୍ରି କରିଥିବା ଅଭିଯୋଗ ହୋଇଥିଲା। ଏନେଇ ଜଣା ପଡ଼ିବା ପରେ ପ୍ରଶାସନ ପକ୍ଷରୁ ତତ୍ପରତା ପ୍ରକାଶ ପାଇଥିଲା। ଘଟଣା ସମ୍ପର୍କରେ ସୂଚନା ପାଇ ପୁଲିସ ଗ୍ରାମକୁ ଯାଇ ପଚରାଉଚୁରା କରିଥିଲା। ବିଳମ୍ଵିତ ରାତିରେ ବରଗଡ଼ ପାଇକମାଳରୁ ଶିଶୁକନ୍ୟାକୁ ଉଦ୍ଧାର କରାଯାଇଥିଲା। ପୁଲିସ ଏବେ ଜନ୍ମଦାତା ବାପା ସହ ମଧ୍ୟସ୍ଥିକୁ ଅଟକ ରଖି ତଦନ୍ତ ଚଳାଇଛି। ଖୋଳତାଡ଼ ବେଳେ ନଳଙ୍କ ଆର୍ଥିକ ଦୁର୍ଗତି ସମ୍ପର୍କରେ ସୂଚନା ମିଳିଛି। ଅଭାବ ଅନଟନରେ ଚଳୁଥିବା ଦମ୍ପତି ତାଙ୍କ ଶିଶୁକନ୍ୟାଙ୍କୁ ବିକ୍ରି କରିଥିବା ଗ୍ରାମବାସୀ କହିଛନ୍ତି।
