ନୂଆଦିଲ୍ଲୀ: ଦୁନିଆରେ ପ୍ରତି ବ୍ୟକ୍ତିଙ୍କୁ କୌଣସି ନା କୌଣସି ଜିନିଷ ପ୍ରତି ଭୟ ଥାଏ । କିଏ ଅନ୍ଧାରକୁ ଭୟ କରେ ତ କିଏ ପୋକଜୋକ ଦେଖିଲେ ଭୟ କରନ୍ତି । କିନ୍ତୁ କେହି ଫଳ ଦେଖିଲେ ଭୟ କରୁଥିବା ଆପଣ ଜାଣିଛନ୍ତି କି ? ସାଧାରଣ ଲୋକ ନୁହେଁ ଜଣେ ମନ୍ତ୍ରୀ କଦଳୀ ଦେଖିଲେ ଭୟରେ ଥରି ଉଠୁଛନ୍ତି । ଏପରିକି ତାଙ୍କ ଆଖପାଖରେ କଦଳୀ ରଖିବା ଉପରେ ସେ କଟକଣା ବି ଲଗାଇଛନ୍ତି । ସ୍ବିଡେନର ଲିଙ୍ଗଗତ ସମାନତା ବିଭାଗର ମନ୍ତ୍ରୀ ପାଉଲିନା ବ୍ରାଣ୍ଡବର୍ଗ ଦାବି କରିଛନ୍ତି ଯେ, ତାଙ୍କୁ କଦଳୀ ଦେଖିଲେ ଭୟ ଲାଗୁଛି । ଏକଥା ସମସ୍ତଙ୍କୁ ଚକିତ କରିଛି ।
କଦଳୀ ପ୍ରତି ମନ୍ତ୍ରୀଙ୍କ ଏଭଳି ଭୟକୁ ଦେଖି ସେ ଯେଉଁଠାକୁ ଯାଉଛନ୍ତି ସେଠାରେ ତାଙ୍କ କର୍ମଚାରୀ ଏଥିପ୍ରତି ବିଶେଷ ଧ୍ୟାନ ଦେଉଛନ୍ତି । ପାଉଲିନା ବ୍ରାଣ୍ଡବର୍ଗ ନିଜର ଏହି ଫୋବିଆ ବା ଭୟକୁ ନେଇ ସାରା ବିଶ୍ବରେ ଏବେ ଚର୍ଚ୍ଚାର ପରିସରକୁ ଆସିଛନ୍ତି । ସେ କଦଳୀକୁ ଭୟ କରୁଥିବା ନେଇ ୨୦୨୦ରେ ଏକ୍ସ ମାଧ୍ୟରେ ନିଜ ଦେଶର ଲୋକମାନଙ୍କୁ ଜଣାଇଥିଲେ । ସେ ନିଜ ପୋଷ୍ଟରେ ଲେଖିଥିଲେ ଯେ, ‘ମୋତେ ବାନାନା ଫୋବିଆ (କଦଳୀକୁ ଭୟ) ଅଛି । ଲୋକଙ୍କୁ ଏହି କଥା ବିଚଳିତ କରିପାରେ କିନ୍ତୁ ଏହା ହିଁ ସତ ।’ ତେବେ ଏହି ପୋଷ୍ଟଟି ଭାଇରାଲ୍ ହେବା ପରେ ଏହାକୁ ଡିଲିଟ୍ କରିଦିଆ ଯାଇଥିଲା ।
ସେପଟେ ସ୍ବିଡେନ୍ର ଖବର କାଗଜ ‘ଏକ୍ସପ୍ରେସନ’କୁ ପ୍ରତିକ୍ରିୟା ଦେଇ ପାଉଲିନା ବ୍ରାଣ୍ଡବର୍ଗ କହିଛନ୍ତି ଯେ, କଦଳୀ ସହ ଜଡ଼ିତ ଏହା ଏକ ଆଲର୍ଜି ବୋଲି ଆମେ କହିପାରିବା । ଏହି ଭୟରୁ ମୁକୁଳିବା ଲାଗି ମୋତେ ସହାୟତା ଦରକାର । ପାଉଲିନା ବ୍ରାଣ୍ଡବର୍ଗଙ୍କ କର୍ମଚାରୀ ମଧ୍ୟ ତାଙ୍କର ଏହି ଭୟ ପ୍ରତି ବେଶ ସଚେତନ ଅଛନ୍ତି । ମନ୍ତ୍ରୀଙ୍କ ଗସ୍ତ ପୂର୍ବରୁ ସେମାନେ ମେଲ୍ ମାଧ୍ୟମରେ କଦଳୀ ନରଖିବାକୁ ସଂପର୍କିତ ଅଧିକାରୀଙ୍କୁ ସୂଚନା ଦେଇଥାନ୍ତି ।
ଅନ୍ୟପଟେ ମନ୍ତ୍ରୀଙ୍କ କଦଳୀ ଭୟକୁ ନେଇ ବାଦବିବାଦ ଉପୁଜିବା ପରେ ଦେଶର ପ୍ରଧାନମନ୍ତ୍ରୀ ଉଲ୍ଫ କ୍ରିଷ୍ଟରସନ୍ କହିଛନ୍ତି, ମନ୍ତ୍ରୀଙ୍କ ଏହି ଅସୁବିଧା ତାଙ୍କର କାର୍ଯ୍ୟକୁ ପ୍ରଭାବିତ କରୁନାହିଁ । ମୁଁ ପ୍ରତି ବ୍ୟକ୍ତିଙ୍କ ଭୟକୁ ସମ୍ମାନ କରୁଛି । ଜଣେ କଠିନ ପରିଶ୍ରମୀ କ୍ୟାବିନେଟ ମନ୍ତ୍ରୀ ଏଭଳି ଏକ ଅସୁବିଧାର ସମ୍ମୁଖୀନ ହେଉଛନ୍ତି ଏବଂ ଲୋକେ ତାଙ୍କୁ ଥଟ୍ଟା କରୁଛନ୍ତି ଜାଣି ମୁଁ ମର୍ମାହତ । କିନ୍ତୁ ପାଉଲିନା ବ୍ରାଣ୍ଡବର୍ଗ ଆପଣ ଜଣେ ଭଲ ବ୍ୟକ୍ତି ବୋଲି ପ୍ରଧାନମନ୍ତ୍ରୀ କହିଛନ୍ତି । ତେବେ ଫଳ ପ୍ରତି ଭୟ ସୃଷ୍ଟି ହେବାକୁ କୌଣସି ଫୋବିଆ ଶ୍ରେଣୀଭୁକ୍ତ କରାଯାଇ ନାହିଁ । ତଥାପି ଖାଦ୍ୟ ଭୟକୁ ‘ବିଶିଷ୍ଟ ଓ ପୃଥକ’ ଫୋବିଆ ଶ୍ରେଣୀରେ ସାମିଲ କରିଛି ଇଣ୍ଟରନ୍ୟାସନାଲ୍ କ୍ଲାସିଫିକେସନ୍ ଅଫ ଡିଜିଜ୍ ।
