କାମାକ୍ଷାନଗର,୨।୧୧ : ଢେଙ୍କାନାଳ ଜିଲ୍ଲା ପରଜଙ୍ଗ ଥାନା ଆମ୍ବପଳାସ ଗାଁରେ ରୋଷେଇ ବେଳେ ଗ୍ୟାସ ଟାଙ୍କି ଫାଟି ଘରର ଛାତ ଉଡି ଯାଇଛି । ତେବେ ଅଳ୍ପକେ ବର୍ତ୍ତି ଯାଇଛନ୍ତି ଘରେ ଥିବା ୪ ଜଣ ସଦସ୍ୟ। କଙ୍କଡାହାଡ଼ ବ୍ଲକ ଦଶିପୁର ପଞ୍ଚାୟତର ଗ୍ରାମ ରୋଜଗାର ସେବକ ମମତା ସାହୁଙ୍କ ଘରେ ଘଟିଛି ଅଘଟଣ।
କଙ୍କଡାହାଡ଼ ବ୍ଲକ ଦଶିପୁର ପଞ୍ଚାୟତର ଗ୍ରାମ ରୋଜଗାର ସେବକଙ୍କ ଘରେ ରୋଷେଇ ହେଉଥିବା ବେଳେ କୌଣସି କାରଣ ବସତଃ ଗ୍ୟାସ ଟାଙ୍କିରେ ନିଆଁ ଲାଗିଯାଇଥିଲା। ଫଳରେ ଘରେ ଥିବା ସମସ୍ତ ସଦସ୍ୟ ଘରୁ ବାହାରି ଯାଇଥିଲେ। ନିମିଷକ ମଧ୍ୟରେ ଗ୍ୟାସ ଟାଙ୍କିଟା ଫାଟି ଯାଇଥିଲା। ଗ୍ୟାସ ଟାଙ୍କି ଫାଟି ଯିବା ଯୋଗୁଁ ଛାତ ଘରକୁ ଲାଗି ଥିବା ଆଜବେଷ୍ଟେସ ଘରଟି ଉଡେଇ ନେଇଥିଲା। ସମ୍ପୂର୍ଣ୍ଣ ଘରଟି ନଷ୍ଟ ହୋଇଯାଇଛି। ଖବର ପାଇ ପରଜଙ୍ଗ ଅଗ୍ନିଶମ ବାହିନୀ ଘଟଣା ସ୍ଥଳରେ ପହଞ୍ଚିଥିଲେ। ଏକ ବଡ଼ ବିପତ୍ତିରୁ ପରିବାର ଲୋକେ ବଞ୍ଚି ଯାଇଛନ୍ତି। ତେବେ କିପରି ଏବଂ କାହିଁକି ଗ୍ୟାସ ଟାଙ୍କି ଫାଟିଲା ତାହା ସ୍ପଷ୍ଟ ହୋଇନାହିଁ।
